6 अनि माक येसुना आग्याते ताकानाय मया आन्दु अनि इदे आग्याता पालन कियाना साटि निमाट पहलेटाले केन्जतोरिट।
येसु असा इतुर, “निमाट नावाताल मया इरान्तोरिट ते नावा आग्यातुन मानेमायकिट।
अनि नावा आग्यातुन येचुन अदेन मानेमान्तोर ओरे नावागा मया इरान्तोर। अनि बोर नावागा मया इरान्तोर ओन नावोर बाबो मया किन्तोर, अनि नना वने ओन मया किस आपुनतुन ओन तोहका।”
अनि येसु ओन उत्तर हितुर, “बोरायि नाकुन मया कियानुर ते ओर नावा पोल्लोतुन मानेमायनुर, अनि नावोर बाबो ओन मया कियानुर अनि माक इवुर ओना हेरे दाकोम अनि ओनासंगे मन्दाकोम।
अनि नना आपुनोर बाबोना आग्यातुन मानेमास दरोज ओना मयाते मन्तोना अदामे निमाट वने नावा आग्यातुन मानेमायकिट ते नावा मयाते मन्ट।
अनि नना मिकुन हिन्तोना ओद आग्या निमाट मानेमायकिट ते निमाट नावोर गोतियाह आन्दिट।
अनि निमाट बारायि मुनेटाले करिहतोरिट ओदे पोल्लो मियासंग मनि। बारायि निमाट मुनेटाल करियितोरिट ओद मियासंग मनि ते निमाट वने मरिनिगा अनि परमेस्वर बाबोनिगा मनकिट।
मति बोरायि ओना पोल्लोता पालन कियानुर ते ओनागा परमेस्वरना मया खरोय पुरा आता। अनि माक ओनासंग संबन्दते मन्तोरोम इन्जोर इदेनते माक पुन्तोरोम।
हे प्रिय गोतियालोरक, नना मिकुन बोदायि पुनाल आग्या कोटोन मति ओदे आग्या मुनेटाले मिकुन पुटता। इद जुनाल आग्या निमाट केन्जतोरिट ओदेय पोल्लो आन्दु।
अनि बाताल आयि माक तलकान्तोराट ते ओर मावा प्रार्थना केन्जान्तोर इन्जोर माक पुन्तोराट ते बाताल आयि माक ओन तलकताट अद माकुन पुटता इन्जोर वने पुन्तोर।
बाक्याकि परमेस्वरदुन मया कियाना मन्जे माक ओना आग्यातुन मानेमायाना इन्जोर मन्ता अनि ओना आग्या कटिन हिले।
अनि इदेक, हे हेलाळ, माक वरोर दुसरोना संग मया किम्ट इन्जोर बोदायि पुनाल आग्या लेहका आयो मति पहलेटाले मावा हेरे मता ओदे आग्यातुन नना मिकुन कोटस विनन्ति किन्तोना।