Numelo 15:3 - Tosi Tapu

³ e kotou momoli loa ki le Eteleno ni sakilifisio tutu katoa e le afi mo ni sakilifisio fakafetai, pe ki le fakasoko o se fakapapau, pe i le loto malie, pe i aso fakafiafia. E kotou filifili loa ki sakilifisio ana se pipi tagata, pe ko se ovi, pe ko se koti fafine, ti e kau tali malie loa le afu manogi o sakilifisio ana, ko au ko le Eteleno.

Numelo 15:3 Iomraidhean Croise

Senesi 8:21

Na nanamu loa le Eteleno ki le manogi o le sakilifisio, ti na pati loa a ia i lona loto : E leaise kau toe fakamalaia loa le kele o tupu ko le tagata, talie e veveli a manatu o le loto o le tagata mei lona ikiiki ; ti e leaise kau toe tautea loa a nea fuli e mauli, ofaipe le nea leinei kua kau fai.

Esetalasi 7:17

Koia, e ke tokaga loa o totogi ki le paaga lena ni pipi tagata, mo ni ovi tagata, mo ni akeno, mo nea fuli ala e aoga ki moliga, mo moliga vino ti mo lolo, ti e ke momoli loa a nea ana i aluga o le aletale o le fale o lokoutou Atua i Selusalemi.

Pesalemo 54:6

Ko leinei, ko le Atua ko loku tokoi, Ko le Aliki ko le pou o loku laumalie.

Ekesote 29:18

E ke tutu loa le ovi tagata katoa i le aletale ; ko se failaulau lena ki le Eteleno, ko se sakilifisio leia e tutu e le afi, ti e manogi malie a ia ki le Eteleno.

Ekesote 29:25

E ke too loa a nea ana i olatou lima, ti e ke tutu loa latou i le aletale, i aluga o le failaulau ; ko se sakilifisio tutu katoa a ia e le afi i mua o le Eteleno, ti e manogi malie a ia ki le Eteleno.

Ekesote 29:41

E ke momoli loa le lua o akeno i le afiafi, mo se moliga magiti ti mo se vino ofaipe leia i le usu ; ko se sakilifisio tutu a ia e le afi, ti e manogi malie a ia ki le Eteleno.

Levitiko 10:13

E kotou kai loa latou i se ganea tapu. Ko le vaega a ia e tuku kiate koe, Alone mo ou vosa, i moliga ala kua fai ki le Eteleno, o mulimuli ki fakatotonu ala na tuku mai e le Eteleno kiate au.

Levitiko 27:2

Masau ki fanau a Iselaele, o ke pati loa kia latou : Ka fai loa e se tagata se fakapapau mamafa ke momoli se tasi ki le Eteleno, e fakasoko loa e ia lana fakapapau, o soli loa e ia le totogi o le tagata lena, o mulimuli ki le lekula leinei :

Levitiko 7:16

Ti kapau e fai e se tasi se sakilifisio fakafetai ki le soko o se fakaamu pe i lona loto malie, e kai loa le vikitima i le aso leia e momoli ai loa e ia a ia, ti e kai loa le nea leia e toe loa i leia ake aso.

Numelo 28:27

E kotou momoli loa se failaulau, ko se nea manogi a ia ki le Eteleno, ko ni pipi tagata e lua, mo se ovi tagata e tasi, ti mo ni akeno fetuu taki tasi e fitu.

Numelo 29:8

E kotou momoli loa se failaulau, ko se nea manogi a ia ki le Eteleno, ko se pipi tagata e tasi, mo se ovi tagata e tasi, ti mo ni akeno fetuu taki tasi e fitu : e lotou lee mele fuli loa.

Numelo 6:15

mo se kete pane sala fakatupu, mo ni keke ala na fai ki se falina mea leia na lusi fakatasi mo le lolo, mo ni pane lalapa sala fakatupu ala kua pani ki le lolo, ti mo moliga falina mo lipasio masani.

Mateo 3:17

Ti ko leinei, na kalaga loa se leo mei le lagi, o fakasa a masau anei : Ko ia leinei ko loku Alo alofaina, leia kua kau tuku ki ai loku alofa katoa.

Lua tosi ki le kau Kolinto 2:15

Talie ko le kaloni tatou o Kilisito ki le Atua, ia latou ala kua fakamauli, ti mo latou ala e mamate :

Lua tosi ki le kau Kolinto 2:16

Ki ni iki, ko se sauga o le mate, leia e soli ia le mate ; ki ni iki ake, ko se sauga o le mauli leia e soli ia le mauli. Ti ko ai e feauga ki le gaoi lasi lena ?

Efeso 5:2

ti kotou saele i le alofa, o faifaitaki kia Kilisito, leia na alofa kia tatou, ti na soli a ia totonu ki le Atua o tupu ko tatou, ofaipe se moliga mo se sakilifisio manogi ki le Atua.

Tetelonome 12:11

Ti e ia loa se ganea leia e filifili loa e le Eteleno, lokoutou Atua, ke fakanofo ai lona suafa. Ko lena loa le ganea leia e tonu ke kotou ave ki ai a nea fuli ala na kau fakatotonu kia koutou, akoutou failaulau, mo akoutou sakilifisio, mo vaega kau agafulu, mo uluaki fua, mo akoutou moliga fuli ala kua kotou fakapapau ke fai ki le Eteleno ke fakasoko ai akoutou fakapapau.

Tetelonome 12:17

E leaise feala loa ke ke kai i ou matapa le vaega kau agafulu o lau fulumeto, mo lau vino foou, mo lau lolo, mo manu uluaki o lau kau manu lalasi mo lau kau manu liliki, mo se moliga ki se fakapapau, mo au moliga alofa, mo au uluaki fua.

Tetelonome 12:6

Ko lena loa le ganea leia e tonu ke kotou momoli ai loa akoutou failaulau, mo akoutou sakilifisio, mo akoutou vaega kau agafulu, mo akoutou moliga alofa, mo akoutou moliga ki ni fakapapau, mo manu uluaki o akoutou kau manu lalasi mo akoutou kau manu liliki.

Filipe 4:18

Kua kau maua nea fuli, ti kua kau nofo i le mou ; kua kau apele pipi i koloa, i laku tali meia Epafolotito le nea leia e au meia koutou ofaipe se kaloni manogi malie, pe se sakilifisio leia e tali e le Atua, ti e mata malie kiate ia.