Luka 20:10 - Tosi Tapu

¹⁰ I le temi tau o le vite, na kakau loa e ia se tagata fakasausau ki le kau tagata faivite, ke lotou soli ake kiate ia lona vaega i le fua o le vite. Kae na tamate a ia e le kau tagata faivite, ti na lotou kakau a ia ke ano mo ona lima ata.

Luka 20:10 Iomraidhean Croise

Uluaki tosi o Sau 22:24

Koia na fakafeofi ake loa Setesiasi, vosa o Kenaana, ti na paai loa e ia le kalaafau o Mikea, o pati : Pe na ulu atu ifea iate au le laumalie o le Eteleno ke masau kiate koe ?

Lua tosi o Sau 17:13

Na valoki loa e le Eteleno a Iselaele mo Suta ki ana polofeta fuli mo le kau kikite katoa, o pati kia latou : Kotou tafoki mai mei okoutou ala veveli, ti ke kotou tausi aku fakatotonu mo aku lao, o mulimuli katoa ki le lao leia na kau fakatotonu ki okoutou tamana ti na kau soli atu kia koutou i aku tagata fakasausau, le kau polofeta.

Uluaki tosi o Koloniko 19:4

Ti na too loa e Anune a tagata fakasausau a Tavite, o tele olatou kaukava mo kotii lua olatou kofu o fakatautonu mo loto malie o olotou tega. Ti na kakau loa e ia latou ke ano.

Lua tosi o Koloniko 16:10

Na ita veli loa Asa ki le polofeta, ti na tuku loa e ia a ia ki le pilisoni, o tupu ko lona vesia ki folafola ana. Ti na fakavelivelii loa e Asa i le temi lena ni iki o le kakai.

Neemia 9:26

Kae na lotou malaga loa kiate koe. Na lotou tiaki loa lau lao ki muli, ti na lotou tamate loa lau kau polofeta leia na kolekole kia latou ke toe liliu mai kiate koe, ti na lotou fai loa kiate koe ni nea veveli.

Neemia 9:30

Na ke kataki kia latou i ni fetuu mauke, ti na ke fakatokaga kia latou ki lou Laumalie, i lau kau polofeta ; kae na leaise tokaga fua olatou taliga. Koia na ke tuku ai loa latou ki lima o ni kakai matapule.

Pesalemo 1:3

E tatau a ia mo se laakau na to i tafa se tafeaga vai, Leia e fua i lona temi, Ti e leaise gini lona lau : Ko nea fuli ala e fai e ia e manuia kiate ia.

Selemia 2:30

Na ano noa laku taai akoutou fanau ; Na leaise lotou tokaga fua ki le akonaki. Na kai e lakoutou seleta akoutou kau polofeta, Ofaipe se laione maumau.

Selemia 20:2

Ti na paai loa e Pasule le polofeta ko Selemia, ti na velo loa e ia a ia ki le pilisoni leia na tuu i le matapa aluga o Pesamino, i le fale o le Eteleno.

Selemia 35:15

Na kau kakau atu kia koutou aku tagata fakasausau fuli, le kau polofeta, na kau kakau atu latou koi usu, o pati kia koutou : Kotou tasi toe liliu mai mei lona ala veli, kotou fai akoutou gaoi ke malilie, aua na kotou ano o tausi ki ni iki ake atua kese, o tupu ke kotou nonofo loa i le fenua leia kua kau soli kia koutou mo okoutou tamana. Kae na leaise tokaga mai okoutou taliga, ti na leaise kotou fakalogo mai kiate au.

Selemia 5:24

E leaise lotou pati i olatou loto : Ke tou i ki le Eteleno, lotatou Atua, Leia e soli ia le ua i lona temi Le ua i mua mo le ua i muli, Ti e taupau ia kia tatou a vasaa ke tuuti ai le fulumeto.

Luka 13:34

Selusalemi, Selusalemi, leia e tamate ia le kau polofeta mo tuki fatui ia latou ala na kakau mai kiate koe, kua tua fia loku loto ke tanaki au fanau, ofaipe se tanaki e se ufa lona toloaki i lalo o ona kapakau, kae na leaise kotou loto ki ai !

Luka 20:11

Na toe kakau loa e ia se tasi ake tagata fakasausau, ti na lotou tamate loa a ia, ti mo pati velii loa a ia, ti mo toe kakau loa a ia mo ona lima ata.

Luka 20:9

Ti na tuku loa e ia ki le kakai le folafola fakatata leinei : Na to e se tagata se vite, ti na tuku e ia a ia ke tausi e ni tagata faivite, kae na mavae loa a ia i le fenua o fualoa.

Soane 15:16

E leaise ko koutou ala na filifili ia au ; kae ko au, kua kau filifili koutou, ti kua kau fakanofo koutou, o tupu ke kotou ano, ti ke kotou maua se fua, ti ke tologa lokoutou fua, o tupu ko nea fuli ala e kotou kole loa ki loku Tamana i loku suafa, ke soli atu e ia kia koutou.

Loma 7:4

Koia, ei oku fetaina, ko koutou foki, kua kotou mamate, i le tino o Kilisito, ki nea o le lao, o tupu ke kotou fakalogo ki se tasi ake, ki leia kua toe tuuake mei le kau mate, talie ke tou maua ni fua ki le Atua.