Ekesote 34:13 - Tosi Tapu

¹³ Kae e kotou maumaui loa olatou aletale, e kotou momoi loa olatou fakatata, ti e kotou tekai loa olatou laakau tapu.

Ekesote 34:13 Iomraidhean Croise

Uluaki tosi o Sau 14:15

Na taai loa e le Eteleno a Iselaele, ti e fai loa a ia pe se fa u leia e lu i le atu vai ; e taaki loa e ia a Iselaele mei le fenua malie lena na soli e ia ki olatou tamana, ti e fakamavete loa e ia latou ki leia atu fetuu o le vaitafe, talie na lotou fau ni olatou fakatata ke ita ai le Eteleno.

Lua tosi o Sau 10:27

Na lotou maumaui loa le fakatata o Paale, ti na lotou toe maumaui foki mo le fale o Paale, ti na lotou fakaliliu loa a ia ko se fale vao o kaku mai ki le aso nei.

Lua tosi o Sau 18:4

Na fakapuli loa e ia a ganea taualuga, ti na maumaui loa e ia a fakatata, ti na sele loa e ia ki lalo a pou tapu, ti na momoi loa e ia le gata sila leia na fai e Moisese, o tupu na tutu e fanau o Iselaele ni nea fakamanogi i ona mua o kaku mai ki le aso lena.

Lua tosi o Sau 23:14

Ti na fatifatii loa e ia a fakatata ti na maumaui loa e ia mo taulaatua, ti na fakaapele loa e ia ki ivii tagata a tuuaga o fakatata ana.

Lua tosi o Koloniko 14:3

Na fakatotonu loa e ia ki Suta ke afa le Eteleno, le Atua o ona tamana, ti ke fai le lao mo ana fakatotonu.

Lua tosi o Koloniko 15:16

Na too foki e le sau ko Asa mei lona tinana ko Maaka, lona tuulaga fafine sau, o tupu na fai e ia se fakatata o Asetalate. Na maumaui loa e Asa lona taulaatua o momoliki ti na fakatotonu loa e ia ke tutu a ia i le liua o Setolone.

Lua tosi o Koloniko 17:6

Na tupu loa o lasi lona loto i ala o le Eteleno, ti na toe fakapuli foki e ia i Suta a fakatata mo ganea taualuga.

Lua tosi o Koloniko 24:18

Ti na lotou tiaki loa le fale o le Eteleno, le Atua o olatou tamana, kae lotou tausi loa ki Asetalate mo taulaatua. Na vilo loa le sausau o le Eteleno ki Suta mo Selusalemi, o tupu ko agasala ana.

Lua tosi o Koloniko 31:1

I le oki o nea fuli ana, ko latou fuli o Iselaele, ala na nofo i ai, na ano loa ki kolo o Suta, ti na lotou maumaui loa a fakatata mo taulaatua, ti na lotou maumaui loa a ganea taualuga fuli mo aletale i Suta katoa mo Pesamino, mo Efalaimi, ti mo Manase. Ti na tasi toe liliu loa a fanau fuli o Iselaele ki lona kolo, mo lona fale.

Lua tosi o Koloniko 33:19

Ko lana faikole mo le tali a le Atua kiate ia, ana agasala, mo ana agasala ti mo ana agatuu, mo ganea ala na laga ai loa e ia ni ganea taualuga ti na fakatuu ai loa e ia ni taulaatua mo ni fakatata togi i mua o lana fakasemala, e tosi le nea lena i le tosi a Osai.

Ekesote 23:24

Aua na ke punou loa i mua o olatou atua, ti aua na ke tausi loa kia latou ; aua na ke fakatatau loa a aga o kakai ana, kae e ke maumaui loa latou ti e ke fatifatii loa olatou fakatata.

Esaia 17:8

E leaise toe tio loa a ia ki aletale, Gaoiaga o ona lima, Ti e leaise toe tokaga loa a ia ki nea ala na fau e ona maikao, A taulaatua o Asetalate mo fakatata o le laa.

Esaia 27:9

Koia na fakamolemole loa i ai le agasala a Sakopo, Ti ko leinei le fua o le fakamolemole o lana agasala : Kua fakaliliu e le Eteleno a fatu fuli o aletale Ke tatau mo ni fatu lase ala kua efu ; Ti e leaise toe fakatuu ake loa ki aluga a taulaatua o Asetalate mo fakatata o le laa.

Selemia 17:2

E tatau lalatou manatu ki alatou fanau mo lalatou manatu ki olatou aletale Ti mo olatou taulaatua o Asetalate i tafa o laakau lalasi, I mauga liliki taualuga.

Mikea 5:14

E kau fai loa laku tautea i le ita, mo le fakainaina ki puleaga Ala na leaise fakalogo.

Numelo 33:52

Ke kotou kapu loa i okoutou mua a kakai fuli o le fenua, ke kotou maumaui loa a fakatata fatu fuli mo fakatata ukamea fuli o olatou atua, ti ke kotou maumaui loa olatou ganea tapu fuli.

Tetelonome 16:21

Ke aua na ke fakatuu loa se taulaatua i tafa o le aletale leia e ke fakatuu ia loa ki le Eteleno, lou Atua.

Tetelonome 16:22

Ti ke aua na ke fakatuu ia loa se fatu tapu. Talie ko nea ana e fakalialia ki ai le Eteleno, lou Atua.

Tetelonome 7:5

Kae ko leinei le nea leia e kotou fai loa kia latou : Ke kotou maumaui loa olatou aletale, ti ke kotou fatifatii loa olatou fakatata fatu, ti ke kotou tutuuti loa olatou pou tapu, ti ke kotou tutu loa i le afi olatou taulaatua.

Tuifakamaau 2:2

ti ko koutou, ke aua na kotou fai loa se sai mo le kakai o le fenua leinei, kae ke kotou maumaui loa olatou aletale. Kae na leaise kotou fakalogo ki loku leo. Kolea na kotou fai ai le nea lena ?

Tuifakamaau 6:25

I le pouli lena, na pati loa le Eteleno kia Seteone : Too loa le pipi tagata muli o lou tamana ti mo se tasi ake pipi tagata e fetuu fitu. Maumaui loa le aletale o Paale leia na fakatuu e lou tamana, ti ke sele loa ki lalo le pou tapu leia e tuu i ona tafa.

Tuifakamaau 6:26

Ti ke toe fakatuu loa i le tumutumu o le ganea taualuga lena, se aletale ki le Eteleno, lou Atua. Ti e ke too loa le lua o pipi tagata, ti e ke fai loa se failaulau, ki le fafie o le pou tapu leia na ke aga o tuuti.