Ekesote 18:12 - Tosi Tapu

¹² Ti na momoli loa e Setelo, tamana o le avaga o Moisese, se failaulau mo ni sakilifisio fakafetai ki le Atua. Na au loa Alone mo le kau matua fuli o Iselaele o kau i le kaitasi mo le tamana o le avaga o Moisese, i mua o le Atua.

Ekesote 18:12 Iomraidhean Croise

Senesi 12:7

Na sa loa le Eteleno kia Apalamo, o pati : E kau soli loa le fenua leinei ki lou sakoga. Ti na fakatuu loa e Apalamo i le ganea lena se aletale ki le Eteleno, leia na sa kiate ia.

Senesi 26:25

Na fakatuu loa e ia i le ganea lena se aletale, ti na faikole loa a ia i le suafa o le Eteleno, ti na fakatuu loa e ia i le ganea lena lona falela. Na kenu loa e tagata fakasausau a Isaake i ai se sosoni.

Senesi 26:30

Na fai loa e Isaake kia latou se kai lasi, ti na lotou kai loa mo inu.

Senesi 31:54

Ti na momoli loa e Sakopo se sakilifisio i le mauga, ti na fakaafe loa e ia ona fetaina ki se kaitasi. Na lotou kai loa, ti na lotou momoe loa i le mauga i le po lena.

Senesi 4:4

Ti na fai foki e Apele, i lona potu, sana failaulau ki uluaki tupu o lana kau manu ti mo olatou gako. Na tali loa e le Eteleno a Apele mo lana failaulau.

Senesi 43:25

Na lotou teuteui loa lalatou moliga o fakatalitali ke kaku ake Sosefo i le lalatea ; talie kua oki i le fakasa kia latou e lotou kai loa mo Sosefo i lona fale.

Senesi 8:20

Na fakatuu loa e Noe se aletale ki le Eteleno ; ti na too loa e ia ni manu i manu mea fuli mo manu lele mea fuli, ti na momoli loa e ia ni failaulau i le aletale.

Lua tosi a Samuele 9:7

Na pati loa Tavite kiate ia : Aua na ke i, talie e kau loto ke kau fakasa kiate koe le nea e malie, o tupu ko Sonatane, lou tamana. E kau liufaki loa kiate koe a kele fuli o Saulo, lou tupuna, ti e ke kai tuumau loa i loku laupapa.

Lua tosi o Koloniko 30:22

Na masau loa a Esekiasi ki loto o le kau Levi fuli, ala na fakasa ia se atamai lasi ki le tausi o le Eteleno. Na lotou kai loa a vikitima i aso e fitu, o lotou momoli ni sakilifisio fakafetai, ti mo fakavikiviki ki le Eteleno, le Atua o olatou tamana.

Sopo 1:5

Ti ka oki a aso fakafiafia, e kakau loa e Sopo ke au kiate ia ona vosa, ke fakamea latou ; e tuu ake loa a ia i le mafoata o momoli ni failaulau o fakatatau ki le lasi o ana fanau ; talie na pati a Sopo : E feala ke agasala oku vosa ti ke lotou masau sala ki le Atua i olatou loto. Ko lena le fai masani a Sopo.

Sopo 42:11

Na au loa a fetaina, mo tuagaane, ti mo kaukaunea mago o Sopo o fakatele mai kiate ia, ti na lotou kakai fakatasi loa mo ia i lona fale. Na lotou aloalofa loa kiate ia mo fakafimalie a ia i malaia fuli ala na teki e le Eteleno kiate ia, ti na lotou tasi soli loa kiate ia se potu aulo mo se mama aulo.

Sopo 42:8

Kotou too i le lakaga nei ni pipi tagata e fitu mo ni akeno tagata e fitu, ti kotou ano ki laku tagata fakasausau ko Sopo, ti kotou momoli se failaulau o tupu ko koutou. E faikole loa laku tagata fakasausau ko Sopo o uiga mo koutou, ti ko loku alofa kia Sopo toka tasi leia e leaise kau tautea ai loa koutou o mulimuli ki lokoutou valelea ; talie na leaise kotou masau kiate au i le maoki, ofaipe laku tagata fakasausau ko Sopo.

Ekesote 18:13

I leia ake a aso, na ekeeke loa Moisese o fakamaaui le kakai, ti na talitali loa le kakai i ona mua mei le usu o kaku ki le afiafi.

Ekesote 2:16

Na maua e le tagata faisakilifisio o Matiane ni taineliki e toka fitu. Na lotou au loa o asu vai, ti na lotou fakaapele loa a fakainuaga o manu ke fakainu ai a kau manu o lolatou tamana.

Ekesote 2:20

Na pati loa Leuele ki ona taine : Kofea a ia ? Kolea na kotou tiaki ai le tagata lena ? Kotou kalagai a ia ke au mua o kai.

Ekesote 20:24

E ke fakatuu loa kiate au se aletale kele, ti e ke momoli loa i ai au failaulau mo au sakilifisio fakafetai, mo au ovi fafine, mo au pipi tagata. I ganea fuli ala e kau fakamanatu ai loa loku suafa, e kau au loa kiate koe, ti e kau tapuaki loa kiate koe.

Ekesote 24:11

Na leaise siki loa e le Eteleno lona lima ki fakafofoga o fanau a Iselaele. Na lotou tio loa ki le Atua, ti na lotou kai loa mo inu.

Ekesote 24:5

Na kakau loa e ia ni tama tupulaga o fanau a Iselaele, ke lotou momoli ki le Eteleno ni failaulau, ti ke lotou tamate ni pipi tagata ki ni sakilifisio fakafetai.

Ekesote 3:1

Na fagai e Moisese le kau manu o lona tamana, le tagata faisakilifisio o Matiane ; ti na ave loa e ia le kau manu ki muli o le toafa, ti na kaku loa a ia ki le mauga o le Atua, i Olepe.

Ekesote 33:7

Na siki loa e Moisese le falela, o fakatuu a ia i le tua nofolaga, o mamao i le nofolaga. Na fakaigoa loa e ia a ia ko le falela o le felavei ; ti ko latou fuli ala na fia felavei mo le Eteleno na ano loa ki le falela o le felavei, i tua o le nofolaga.

Taniela 10:3

Na leaise kau kai loa se nea kai malie, ti na leaise ulu loa se kanoi manu pe ko se vino ki loku gutu, ti na leaise kau pani loa se lolo o kaku ki le oki o vasaa ana e tolu.

Numelo 10:29

Na pati loa Moisese kia Opapi, vosa o Leuele, tagata o Matiane, tamana o le avaga o Moisese : E motou ano ki le fenua leia na pati ki ai le Eteleno : e kau soli loa a ia kia koutou. Au ke tou ano, ti e motou fai loa kiate koe se nea malie, talie kua fakapapau le Eteleno ke fai se nea malie ki Iselaele.

Luka 14:1

I se aso sapato, na ulu loa Sesu o kai i le fale o se tasi o le kau pule o le kau faliseo. Ti na lama a ia e le kau faliseo.

Luka 14:15

Ko se tasi o latou ala na eke i le laupapa kai, i lana logo ki folafola ana, na pati loa kia Sesu : Manuia leia e kai loa i le puleaga o le Atua !

Uluaki tosi ki le kau Kolinto 10:18

Kotou tio ki le kau Iselaele i le kanofi : ko latou ala e kai ia vikitima pe leaise lotou komunio mo le aletale ?

Uluaki tosi ki le kau Kolinto 10:21

E leaise mafai ke kotou inu le ipu o le Aliki, ti mo le ipu o le kau temonio ; e leaise mafai ke kotou kau ki le laupapa o le Aliki, ti mo le laupapa o le kau temonio.

Uluaki tosi ki le kau Kolinto 10:31

Koia ka kotou kai ai, pe kotou inu, pe kotou fai se nea fua, kotou fai a nea fuli ke fakakololia ai le Atua.

Tetelonome 12:7

Ko lena loa le ganea leia e tonu ke kotou kai ai loa i mua o le Eteleno, lokoutou Atua, ti ke kotou fakafiafia ai loa, koutou mo okoutou famili, o tupu ko nea fuli ala ka fai loa e okoutou lima ti ka tapuakii loa e le Eteleno, lokoutou Atua.

Tetelonome 27:7

E ke momoli foki mo ni sakilifisio fakafetai, ti e ke kai loa i lena ti mo ke fakafiafia loa i mua o le Eteleno, lou Atua.