Откровение 1:4 - Новый Завет на эскимосском языке

^4-6 Укут посланият Иоаннымың пиңӯт ухпықанун қырңгутқаюгнун ма̄ӷраӷвинлыгни юӷаӷвигни Асиями. Наңлъыхталъықлъю, ныкыхмылъықлъю лъпысинилъик Кияӷныӷмың, ма̄ӷраӷвинлык таӷныӷа̄ның, Иисус Христосымыңлъю. Кияӷныӷӯқ кияҳлъыҳӣ ма̄тын, лъңаңӯқ кияҳлъыҳӣ сивунӷани, лъңаңӯқ тагияҳқақ. (Та̄кут ма̄ӷраӷвинлык таӷныӷат сивуңанитут Кияӷныӷым умӣлгусӣн ақумута̄н.) Иисус Христос ата̄сӣӷмылңӯгуқ лӣсимакиста ипапилъыӷмун. Лъңаңӯқ Кияӷныӷым уңуваҳсюхўа̄қа̄ туқулъыӷмың. Лъңаңӯқ иглыӷутистыңат умӣлгита нунам. Лъңаңӯқ пиниқилӷӣ хўаңкунъың, а̄ўмикунлъю, итымуткақӣлъю сыӷлыҳқылъымнъың. Атаныҳпагулъыӷминитыстӣлъю, священнигаңуҳтыстӣлъюлъю Кияӷныӷминун Атамун. Иисус Христосым алъхыҳлъикык ниӷуҳқылъықлъю, аҳтуӷьяҳқа̄нӷилъықлъю иглыӷутимун қӯнпырухлъяк кынлыңуна̄н! Аминь.

Откровение 1:4 Iomraidhean Croise

От Иоанна 1:1

Пӣнлиӷьюхўа̄лъыӷмың Акузин таўантыкақ, Акузин Кияӷныӷмыткақ, Акузин Кияӷныӷулӷӣ.

Деяния 19:10

Таўатын пикақ ма̄лӷук аюмиқулъҳык, ынка̄м тамаҳаӷмың Иудеитлъю, Грегытлъю Асиямылңӯт нагақуқӣт акузитаңи Атанӷым.

Деяния 2:9

Хўа̄ хўа̄нтутут Парфыӷмӣт, Мидыӷмӣт, Еламыӷмӣт, Месопотамияӷмӣт, Иудеяӷмӣт, Каппадокияӷмӣт, Понтыӷмӣт, Асияӷмӣт,

К Римлянам 1:7

Қамахлъюси лъпыси Римымылңуӷни Кияӷныӷым пиниқыхкӣтни, туқлъюқӣтнилъю юкналюси: Кияӷныӷым Атамта, Атанӷымлъю Иисус Христосым каюсӣлъиси, ныкыхмылъылисилъилъю.

1е Коринфянам 1:3

Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

2е Коринфянам 1:2

Йықай Кияӷныӷым Атамта, Атанымталъю Иисус Христосым тӯнлиси қуястылъыӷмыңлъю, ныкыхмылъыӷмыңлъю.

К Евреям 13:8

Иисус Христос алмысиқақа̄ иӷивгақ, аӷныӷми, қӯнпырухлъяклъю.

От Иакова 1:17

Қамахлъютың пинилӷӣтлъю, сялъҳўа̄ҳӣлңӯтлъю тунусят қилягмың пиңӯт. Тама̄кут Атамың пиңӯт улимаӷистыңаның қамахлъюни ниӷугым; алъяңуҳсигатуқлъю, мамлыхтыстиңигатуқлъю.

Откровение 1:1

Хўани игани игақңа̄т Кияӷныӷым алӣҳтыкӣ Иисус Христосымун. Кияӷныӷым алӣҳтыкақӣ лъңанун лӣгикыстысқылъюки қыпҳаҳтыни сяңўа̄т пияҳтуңыстаӷнилюки. Ынка̄м Христосым каяхтыкақа̄ яқулыни қыпҳаҳтыминун Иоаннымун тама̄кут лӣсимакысқылъюки.

Откровение 1:11

Хўатын пӣқ: «Игақуҳқи игатхун ысҳақаҳтын. Та̄хкын туюӷнакытын ухпықанун қырңуӷуткаюгнун ма̄ӷраӷвинлыгни юӷаӷвигни: Ефесымылңӯт, Смирнамылңӯт, Пергиямылңӯт, Фиатирамылңӯт, Сардисымылңӯт, Филадельфиямылңӯт, Лаодикиямылңӯтлъю».

Откровение 1:17

Ысҳаӷьямкун итыга̄н мануңакун ӯлъҳаҳтуңа туқукастун. Иўырңа аӷынқигныӷминың ӣхминың ся̄флъюңа пӣңа: «Алиңыхпынаң, хўаңа сивулӣгуңалъю, киңулӣгуңалъю.

Откровение 1:20

Ысҳаӷатын ма̄ӷраӷвинлык иӷалықыта̄ӷыт аӷынқигныӷма ӣханилңӯт, ма̄ӷраӷвинлыклъю золотат кынылӷутат тунымӣт, та̄кут сямың писӣтаңи сялин қайвиҳтылъҳитут. Хўатын писӣгут: Ма̄ӷраӷвинлык иӷалықыта̄ӷыт яқулгӯт. Кияӷныӷым уңипаҳтыкӣ ухпықанун қырңуӷуткаюгның ма̄ӷраӷвинлыгни юӷаӷвигни. Ма̄ӷраӷвинлык кынылӷутам тунымӣ та̄куңӯт ма̄ӷраӷвинлык юӷаӷвигыт».

Откровение 1:8

«Хўаңа Альфаңӯңалъю, Омегаңӯңалъю», пӣқ Атанық Кияӷнық, Аҳтуӷьяҳқа̄нӷитыҳлъяк. Лъңаңӯқ кияҳлъыҳӣ ма̄тын, лъңаңӯқ кияҳлъыҳӣ сивунӷани, лъңаңӯқ тагияҳқақ.

Откровение 1:9

Иоанныңӯңа, ухпықа̄лгуткаҳпысиңа. Икфиқуңа лъпысистун қаюҳлъяк Иисусым Атаныҳпагулъҳан пикӣлъю. Лъңакун икфиқылъыпут нуқытутапут. Агляҳтыстыка̄гуңа қӣҳқамун а̄тқылӷӣ Патмосымың қаюҳлъяк уңипақыхкынка Кияӷныӷым акузитаңи, уңипақлъю Иисусымың аюқылӷӣ.

Откровение 16:5

Нагақуӷақа иглыӷутилӷӣ мыӷның яқулык пилӷӣ: «Ка̄й, Аглыӷналӷӣ Кияӷнық, лъпыңӯқ ма̄тын кияҳлъыҳӣ, лъпыңӯқ қӯнпың кияҳлъыҳӣ! Нанқихтилъыҳтынлъю, аӷью̄ӷилъыҳтынлъю ылъқуӷутңа̄т.

Откровение 2:12

«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Пергамым. Уна уңипақ сявихпалыгмың пиңӯқ иңлюхтун хиналык ипыхсяқамың.

Откровение 2:18

«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Фиатирам. Уна уңипақ Иӷныӷаның Кияӷныӷым пиңӯқ. Ӣскык кумаӷӯгук кынӷыстун, итыгӣ қылмыҳтутка̄т сӣлюм қылмыҳсялӷатун.

Откровение 2:8

«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Смирнам. Уна уңипақ хўаңамның пиңӯқ: Сивулӣгуңалъю, киңулӣгуңалъю, туқулюңа уңувақа̄гуңа.

Откровение 22:16

«Хўаңа, Иисус, каяхтыкақақа яқулъка лъпысинун ухпықанун юӷаӷвигнилңуӷнун. Апыҳлъықа̄к укук лъпысинун: “Хўаңа Давидым киңунқа̄ңа, хўаңа ниӷугракыхта̄гуңа уна̄ңум иӷалықыта̄ӷа”».

Откровение 22:8

Хўаңа, Иоанн, нагаткақанкалъю, ысҳақақанкалъю тама̄кут. Нагақуӷақңамкилъю, ысҳаӷақңамкилъю тама̄кут, нӣнӷутуңа яқулгым итыга̄ни манигуӷналюку, кылгувикистыка тама̄кын.

Откровение 3:1

«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Сардисым. Та̄на Кияӷныӷым ма̄ӷраӷвинлык таӷныӷа̄ның пилык ма̄ӷрагвинлыклъю иӷалықыта̄лык, пӣқ: “Лӣсимакамси ся̄қыстык. Югыт пӣқӣси уңуванилюси иўырңа туқуңа̄си.

Откровение 3:14

«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Лаодикиям. Уна уңипақ Аминымың пиңӯқ. Ата̄сӣӷмылңӯгуқ, ипапиҳқыңъалӷӣңӯқ лӣсимакиста. Лъңакун Кияӷныӷым улимакақа̄ сяңўа̄ қамахлъюку.

Откровение 3:7

«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Филадельфиям. Уна уңипақ Аглыӷналӷӣмың, Ипапигмың пиңӯқ. Лъңанитуқ Давидыми қипытақ. Қылъпыҳтыкумигу амик, китум алңунак умыгна̄нӷита̄. Ӯмкумигулъю амик, китум алңунак қылъпыҳна̄нӷита̄.

Откровение 4:5

Умӣлгусим ақумутаҳлъягыхкының калъюгым ниӷўа̄хпахтӣ, лывыклъюхтӣ, тыңъа̄хтӣлъю пӣт. Сивухкыни умӣлгусим ақумутаҳлъягым та̄ўа ма̄ӷраӷвинлык нанит кумаңалӷӣт, та̄кут ма̄ӷраӷвинлыгуфтут таӷныӷӣ Кияӷныӷым.

Откровение 4:8

Ынка̄м стамат Уңувалӷӣт тамаҳаӷмың аӷвинлыгның яқулгутутыфтут, ынңа̄талъ югусӣт ийыҳлъягуфтут талўа қамавык яқҳўита асиңитнун. Аӷныҳтӯма̄н унухтӯма̄н та̄қигалңӯт иляганыӷмың: «Аглыӷналӷӣ, аглыӷналӷӣ, аглыӷналӷӣ, Атанӷӯқ Кияӷнық, Аҳтуӷьяҳқаҳа̄нӷитыҳлъяк, лъңаңӯқ ма̄тын, лъңаңӯқ сивунӷани, лъңаңӯқ тагияҳқақ!»

Откровение 5:6

Та̄хкын ысҳаӷақа Пынъӣӷаҳақ ныкывӷалӷӣ ся̄ӷўани умӣлгусим ақумутам. Қукӣтнитыфтуқ стамат уңувалӷӣт, утфатлъю. Пынъӣӷаҳақ ысҳақа̄люни никимқун туқуткақ. Ма̄ӷраӷвинлыгның сиӷунылгуфтуқ, ма̄ӷраӷвинлыгныңлъю ийылгуфтуқ. Та̄кут ийыт ма̄ӷраӷвинлык таӷныӷақӣ Кияӷныӷым, каяхтыкӣ тамаҳа̄нун нунам.

Откровение 8:2

Та̄хкын ысҳаӷанка та̄кут ма̄ӷраӷвинлык яқулгыт ныкывӷалӷӣт Кияӷныӷым сивуңакун. Тамаҳаӷмың қалӷиҳта̄тыңӯтут.