К Филиппийцам 2:9 - Новый Завет на эскимосском языке

⁹ Тама̄кын апалъюқлъюку Кияӷныӷым ныкыхтыкақа̄ Иисус а̄ңылъыҳпига̄люку, атиқақа̄лъю Атаныӷмың а̄ңылъыҳпигаӷмың атыӷьяхаӷның.

К Филиппийцам 2:9 Iomraidhean Croise

От Матфея 11:27

Атама тагивақақа̄ сяңўа̄ қамахтыңъўа̄ӷлюку. Китум алңунак налъюка̄ Иӷнық, иўырңақун Атам. Китум алңунак налъюка̄ Ата, иўырңақун Иӷныӷым, ынка̄м Иӷныӷым накмикыхкаминун лӣтыслъықа̄ Ата.

От Матфея 28:18

Иисусым такулюки пикӣ: «Қамахлъюни аҳтуӷьяҳқа̄нӷилъық қилягмилъю, нунамилъю хўаңамнун тагивақа̄гуқ.

От Луки 10:22

Та̄хкын Иисусым пикӣ югыт: «Атама тӯнума̄ңа сямың тамаҳа̄ның. Китум алңунак налъюка̄ Иӷнық кинаңутаңа, иўырңақун Атам. Китум алңунак налъюка̄ Ата кинаңутаңа, иўырңақун Иӷныӷым. Иӷныӷымлъю лӣтыслъықа̄ Ата китумун алңунак накмикыхкаминун».

От Иоанна 13:3

Иисусым лӣсимакыхкаңа Атам тӯныхкақыхкаңа аҳтуӷьяҳқа̄нӷилъыӷмың сямун тамаҳа̄нун. Лӣсимакыхкаңалъю Кияӷныӷмың пиңутни, аглялъыҳқанилъю Кияӷныӷмун.

От Иоанна 17:11

Агляӷьяҳтуңыстаҳтуңа лъпынун, нунамынъаниӷьяҳтуңыстаҳтуңа, иўырңа лъңит нунамылъықут. Аглыӷналӷӣ Ата, афлъыңакики аҳтуӷьяҳқа̄нӷилъҳакун атыҳпык, тагивақаҳтын хўаңамнун, ата̄сӣсқылъюки ата̄сӣлъымтыхун.

От Иоанна 17:12

Лъңитнилъюңа афлъыңакыхкақанка аҳтуӷьяҳқа̄нӷилъҳакун атыҳпык, тагивақаҳтын хўаңамнун. Кылыңакыхкақанка, ынка̄м талўа ата̄сиқ ифлъялъҳитуқ, иўырңақун ата̄сиқ ю̄к ифлъяяҳқақ, Акузитыт Игақыхкат апыӷӣӷысқылъюки.

От Иоанна 17:5

Ынка̄ңам Ата̄й, манухпынисималюңа қӯлваӷңа қӯлвалъыӷмың хўаңа пиксяқымның лъпынилъюңа, сивуңани нунам улималъҳан.

Деяния 5:31

Ынка̄ңам қӯлваӷналюку Иисус аӷынқигныӷмикун ныкыхтыкақа̄ Иглыӷутистыңулюкулъю, Югулиӷистыңулюкулъю. Таўатын пикақа̄ Израилыӷмӣт авутыҳқысяҳқа̄ҳтысқылъюки сыӷлыҳқынъанӣсқылъюки, қӣвысқылъюки Кияӷныӷмун, сыӷывунъалюкилъю сыӷлыҳқылъҳитның.

К Ефесянам 1:10

Кияӷныӷым успықылъыни апыӷӣҳлъықа̄ пилъыҳқаҳлъюгўа̄ӷми. Қамахтыңъўа̄ӷлюки улима̄ни қилягмылңӯтлъю, нунамылңӯтлъю қырңуҳлъықӣ, Христосымун иглыӷутысқылъюки.

К Колоссянам 1:18

Лъңа на̄сқӯгуқ ухпықанун юӷаӷвигмылңуӷнун, лъңан югусиқӣ. Лъңан югусиқ уңуваңустыңъўа̄. Лъңаңӯқ уңуваӷьюхўа̄қақ туқулъыӷмың, ынка̄м қулиҳпига̄гуқ сямун тамаҳа̄нун.

2е Фессалоникийцам 1:12

Ынка̄м а̄тҳа Атанымта Иисусым қӯлвалъыңылъықуқ лъпысигун, лъпысилъю лъңакун қӯлвалъыңылъықуси нафуҳталъҳакунлъю, наңлъыхталъҳакунлъю Кияӷнымта, Атанымталъю Иисус Христосым.

К Евреям 1:4

Кияӷныӷым қулӣҳтыкақа̄ Иӷнық яқулыгның, атылиткақа̄лъю иңья̄тңалӷӣмың а̄тҳитның.

К Евреям 1:9

Пиниқан ылъқуӷутңалъық, угумикан анахутңалъық. Тама̄кын апалъюқлъюку Кияӷнық, Кияӷныҳпык накмикума̄тынлъю, қӯлва̄ма̄тынлъю пакихулъюку иляхпының. Ынка̄ңам қуястиҳлъяхтуқ аңиҳақатынлъю мысӣӷмың».

К Евреям 12:2

ысҳа̄маклъюку Иисус, пӣнлиӷистыңалъю, апыӷӣӷистыңалъю ухпықилъымта. Кайңунаҳтуқ туқулъыҳқақ қақӯракун, иўырңа Иисусым пикаткумаңита̄ кайңусяӷа̄тылъық. Йыӷлыги накмӣқа̄гуқ икфиқналюни қақӯракун апалъюқлъюку қуялъық алъхыҳсяҳқани. Ынка̄м ма̄тын ақумга̄қ аӷынқигныӷани Кияӷныӷым.

К Евреям 2:9

Иўырңа ысҳаӷаҳпут Иисус! Кияӷныӷым натыңӣҳақ укаваҳтыстыкақсяӷа̄ яқулыгның. Ма̄тын ысҳаӷаҳпут қаҳпалюни ниӷуҳқылъыӷмыңлъю, қӯлвалъыӷмыңлъю қаюҳлъяк икфиқлъюни туқука̄гуқ. Кияӷныӷым пиниқылъҳа апалъюқлъюку, Иисус туқука̄гуқ тамаҳа̄нун.

1е Петра 3:22

Иисус Христос қилягмун маюӷлюни аӷынқигныӷанитуқ Кияӷныӷым. Ынка̄м иглыӷутңўӣ қамахлъюки яқулгыт, қилягым иглыӷутистыңи, аҳтуӷьяҳқа̄нӷилъҳытлъю.

2е Петра 1:17

Иисусым алъхыҳтақңагу қӯлвалъықлъю, ниӷуҳқылъықлъю Кияӷныӷмың Атамың, нагақуқақа̄ мыңа Кияӷныӷым, Қулиҳпига̄лӷӣ Ниӷуҳқыңъаҳлъяк. Атам пикақа̄: «Унаңӯқ пиниқыпихтыкыхка Иӷнықа, ыфқуқыпихтыкыхка».

3е Иоанна 1:7

қаюҳлъяк иглыӷаңӯт апалъюқлъюку Христос. Тугуклъиӷиңигатут ухпықа̄нӷилңуӷның каюсилъыӷмың

Откровение 11:15

Та̄хкын ма̄ӷраӷвинлӣтаңита яқулгым қалӷиҳта̄тни қалӷиҳта̄. Игляхтупихлъютың мыт қилягми пӣт: «Атаныҳпагулъҳа нунам атаныҳпагулъқа̄ҳта̄к Атанымталъю, Христосыңанлъю, ынка̄м Лъңа иглыӷутилъықуқ қӯнпырухлъяк кынлыңуна̄н!»

Откровение 19:16

Аткуя̄ӷакунлъю, қухтуқа̄кунлъю игақңафтуқ атық хўатын: «умӣлга умӣлгыт, атанӷа атанӷыт».

Откровение 3:21

Кая̄лъқӣлюңа ынка̄м ақумга̄ңа ся̄ӷўани Атама умӣлгусӣкун ақумутахкынкун. Таўатыҳпигақ кая̄лъқӣлӷӣ ақумыслъықақа ся̄мкун умӣлгусигныкун ақумутамкун.

Откровение 5:12

Игляхтулютың пӣқут: «Пынъӣӷаҳақ туқуткақ, итагнаҳтуқ алъхыҳсяҳқа̄люку аҳтуӷьяҳқа̄нӷилъық, аклъюңи, пыҳқинылъық, икнақылъық, қӯлвалъық, ниӷуҳқылъық, усюқылъықлъю!»