К Евреям 6:1 - Новый Завет на эскимосском языке

¹ Ынка̄м лӣтылътыки апыҳтӯсят аңтанӣтканун ухпықанун аюқылӷӣт. Лӣтңўа̄қақаси апыҳтӯсюхўа̄қат Христосымың аюқылӷӣт ынка̄ңам лӣнъықихсяҳқақынӷитаси. Лӣтңўа̄ӷума̄си атуқсяҳқа̄фқӣта пиналюки тама̄кут туқумун аюқылӷӣт. Лӣнъықихсяҳқақынӷитаҳсилъю ухпықилъыӷмың аюқылӷӣ Кияӷныҳқун,

К Евреям 6:1 Iomraidhean Croise

От Матфея 21:29

Иӷныӷан пика̄: “Ўӣн пиюнӷитуңа”. Иўырңа аӷныӷми та̄кўани авутыҳқылъюни қыпҳаӷьяқақ.

От Матфея 21:32

Иоанным Крестителым уңипа̄сяҳтуқақӣси натын кияҳтылъыҳқамың Кияӷныӷым пиюкылъҳатун, иўырңа ухпықумаңитаҳси. Нақам налогмың қырңуҳтистытлъю, аӷнатлъю акикикаюгыт югусимыхның ухпықыхкақа̄т. Талўа киңуңаның ысҳапакақыӷңа̄ҳпысики ухпықыхкаңат Иоанн, паниның лъпыси авутыҳқылъюсилъю сыӷлыҳқынъанилъҳитуси, ухпықумаңитаҳсилъю».

От Матфея 3:2

Хўатын пикақ: «Авутыҳқылъюси та̄қитык сыӷлыҳқынъыӷмың, қаюҳлъяк Атаныҳпагулъҳа Қилягым ка̄сяҳтӯма̄қ».

От Матфея 4:17

Галилеямун утыӷнилъыӷминың кынлыклъюку Иисусым пӣнлиқа̄ уңипақилъыни: «Авутыҳқылъюси сыӷлыҳқынъаниҳтык, қаюҳлъяк Атаныҳпагулъҳа Қилягым ка̄сяҳтӯма̄қ».

От Матфея 5:48

Лъпыси авақутақңутаңаның Атахпыси қилягмылңӯм пиниҳтык таўатыҳпигақ Атахпыси пинилъҳатун».

От Матфея 7:25

Ыслъялъюгуҳтыҳлъягьялӷӣми, кӣўыт улывумаӷмың, ануқлъиҳлъягьялӷӣмилъю, таўалъӣма мыңтыӷақ ӯлъҳумаңилңуқ қаюҳлъяк уйӷахкун ныкыфтыка̄лӷӣ.

От Марка 1:1

Пинилӷӣт Уңипат Иисус Христосымың аюқылӷӣт, Иӷныӷаның Кияӷныӷым пӣнлиқа̄гут хўатын:

От Марка 6:12

Ынка̄м малихся̄ҳтыт аӷуляқлъютың уңипақикат югнун авутыҳқылъюки сыӷлыҳқынъанӣсқылъюки.

От Луки 6:48

Юхтун мыңтыӷаңлъялӷӣтун аюқуқ. Нуна сямавырухлъяк ля̄глюку уйӷагмун, тунымиӷлюку та̄хун ныкыфлъықа̄ мыңтыӷақ. Кӣўык улывыҳлъяглютык таўалъӣма мыңтыӷақ қапшахтылъҳилъкаңа қаюҳлъяк уйӷагмың тунымиӷлюни ныкыфтыка̄лӷӣ.

От Иоанна 12:44

Иисус акилӷӯкақ: «Китум алңунак ухпықыхкумиңа, хўаңаңинаӷма ухпықыхпынаңа, ухпықңўа̄ Каяхтистыка.

От Иоанна 14:1

Иисус пиля̄тақақ: «Қа̄мнаси сыӷлылӣҳтыстыхпынаки, сиӷимакитыху Кияӷнық, сиӷимакитыңъа хўаңалъю.

От Иоанна 5:24

Ипа пӣмси, китум нагаскумики акузитынка, ухпықыхкумигулъю каяхтистыка, кынлыңилңуӷмың уңувалъылгӯқ. Нанқихтылъыңна̄нӷитуқ аӷью̄ӷьяҳқа̄люни қаюҳлъяк туқумың уңувалъыӷмун лъӣқа̄гуқ.

Деяния 11:18

Таўатын Петырым пийистың қалъыгнаниӷлютың, йыӷлыги усюқыхка̄т Кияӷнық. Пикат: «Та̄ўа лӣгикаҳпут Кияӷныӷым талўа язычнигыт пилъыҳқалисимакаңи авутыҳқысқылъюки сыӷлыҳқылъҳитның, уңувалъыңысқылъюкилъю кынлыңилңуӷмың уңувалъыӷмың!»

Деяния 17:30

Сивунӷани агани югыт сялин налъюклъюку Кияӷнық, аӷью̄ӷьюгумаңитӣ аӷью̄сяқыӷңа̄та. Иўырңа ма̄тын қылӷўӣ қамахлъюки югыт на̄нсяӷңа̄та авутыҳқылъюки, сыӷлыҳқынъанӣсқылъюки.

Деяния 2:38

Петырым кӣмсиқӣ: «Авутыҳқылъюси, сыӷлыҳқынъаниӷлюси қӣвитык Кияӷныӷмун, крестиӷытыклъю А̄тҳакун Иисус Христосым, сыӷлыҳқылъыси сыӷывутылъыңысқылъюки, ынка̄м Кияӷныӷым тунусякык Аглыӷналӷӣк Таӷныӷак алъхыҳтыкык.

Деяния 20:21

Қывӯлъюки қылӷақсяӷанка Иудеитлъю, Грегытлъю авутыҳқылъюки сыӷлыҳқынъаниқата қӣвысқылъюки Кияӷныӷмун, ухпықисқылъюкилъю Атанымнъың Иисус Христосымың.

Деяния 26:20

Сивуклъюңа уңипақӣңа Дамаскыми та̄хкын Иерусалимыми, тамаңанилъю Иудеями. Уңипақӣңа Иудеянунлъю, язычнигынунлъю авутыҳқылъюки сыӷлыҳқынъаниӷлюки қӣвысқылъюки Кияӷныӷмун, пинитунлъю писқанка ипапиҳқуткысқылъюку авутыҳқылъютың сыӷлыҳқынъанӣматаңи.

Деяния 3:19

Тама̄кын апалъюқлъюку авутыҳқылъюси, сыӷлыҳқынъаниӷлюси қӣвитык Кияӷныӷмун. Ухпықитыху Атанық ынка̄м сяңихлъықӣ сыӷлыҳқылъыси.

1е Коринфянам 13:10

Иўырңа ӣӷўилңуқ ка̄скан, қамахлъютың ӣӷўинъыӷилңӯт авӣӷуҳсяҳқа̄гут.

1е Коринфянам 2:6

Аңтанӣтканун ухпықанун апыҳтӯсяқақа Кияӷныӷым пыҳқинылъҳа. Иўырңа та̄на пыҳқинылъық нунамың пиңунӷитуқ, талўа иглыӷутистыңаның. Қантаӷақун авӣӷусяҳқа̄гут.

2е Коринфянам 7:1

Пиниқыхкамни илякумта̄мни, Кияӷнық тама̄куның акықусяңлъяқа̄таңаның хўаңкунъун, укмаңиҳся̄лътыки алъя̄ҳӣна̄т нукыхнӣ югусимталъю, таӷныӷамталъю. Пылюңиҳтыңъўа̄ӷылъта қаюҳлъяк аликаҳпут Кияӷнық.

2е Коринфянам 7:10

Кияӷныӷым атуқақа̄ қивӷулъық югнун авутыҳқылъюки сыӷлыҳқылъҳитның, югулилъыңысқылъюки. Китум алңунак авутыҳқуткынъа̄нӷита̄ югулилъық. Иўырңа қивӷулъық нунамың пи туқустӣқуқ.

К Ефесянам 2:1

Сивунӷани таӷныӷаси туқуңаяҳтут қаюҳлъяк қа̄ткумаңилъкыси Кияӷнық, сыӷлыҳқыстыңуяҳтусилъю.

К Ефесянам 2:5

Қайўа таӷныӷапут туқуңаяӷңӣта апалъюқлъюки сыӷлыҳқылъыпут, Кияӷныӷым уңуваҳтӣлъю малигулъюта Христосымун. (Югулика̄гуси Кияӷныӷым наңлъыкылъҳакун.)

К Ефесянам 4:12

Та̄кут тунусялиткақӣ апыҳтӣсқылъюки Кияӷныӷым юги лъңитнун қыпҳа̄тысқылъюку лъңа. Кияӷнық таўатын пика̄гуқ лъңитнун ныкыфтысқылъюку Христосым югусӣ.

К Колоссянам 1:28

Ынка̄м уңипақңўа̄ҳпут Христос тамаҳа̄нун. Қамахлъюку пыҳқинылъыҳқун, кылыңася̄ӷақапутлъю, апыҳтуӷақапутлъю қамахлъюки югыт. Таўатын пӣқукут тагинъалюки ата̄сикаҳтӣта югыт Кияӷныӷым наю̄тңалъҳанун аңтанӣтка̄люки Христосыкун.

К Колоссянам 3:14

Қамахлъютың тама̄кут мыгнунаҳтут иўырңа пиниқылъық мыгнуналъыҳпига̄гуқ. Пиниқутылъҳым ата̄сӣҳтыңъўа̄ӷӣлъю.

К Колоссянам 4:12

Епафрас, қыпҳаҳтыңа Христос Иисусым, лъпысиның пиңӯқ, лъңанлъю сю̄мқақӣсиңуқ. Ӣўлың та̄куңинаҳа̄гның юӷа̄ткақӣси аңтанӣтысқылъюси, лӣсимакңъўа̄ӷысқылъюку сяңўа̄ Кияӷныӷым писқысюлъҳа лъпысинун, лъпысинунлъю қамахтыңъўа̄ӷлюку пиюкылъҳа пикысқылъюку.

1е Тимофею 3:16

Налъюнықнаҳаңунаки ухпықапут апыҳтӯсят Кияӷныӷым қайвиҳтыкӣ сыӷлыҳлъягӯтлъю, ипапыста̄ӷӯтлъю: Христос алъхықа̄гуқ югусипигулюни, Кияӷныӷым Таӷныӷахкынка лӣсимакыстӣ тама̄кут лъңан пикӣ ылъқуӷутңатаңи, яқулгытлъю ысҳақақа̄т. Уңипақыхка̄гуқ нунатаҳа̄ни тамаҳа̄ни, ухпықыхкақа̄т нунатаҳа̄ни тамаҳа̄ни, та̄хкын қилягмун маю̄ткагуқ.

1е Тимофею 6:19

Таўатын пикумың кахпахлъықа̄т аклъюңи лъмыхнун. Та̄на аклъюңи аюгилңӯгуқ тунымақ а̄гнакаҳқӣтнилңуқ. Ынка̄м уңувалъыңылъықут уңувалъыпигмың.

2е Тимофею 2:19

Иўырңа аюгилңуқ тунымақ Кияӷныӷым ныкыхтыка̄ қапшахтыпагниңитуқ. Та̄хун тунымакун игақңа̄т акузитыт: «Атанӷым лӣсимакӣ лъми пини». Хўатынлъю игақңа̄қ: «Кина алңунак туқлъюӷилӷӣ а̄тҳаның Атаныӷым, сыӷлытун пиныӷмың та̄қлъи».

К Евреям 11:6

Ухпықилъңунани китум алңунак ыфқуҳтыпагниңита̄ Кияӷнық. Кина алңунак тагиюкуми Кияӷныӷмун ухпықыпыста̄ӷьяҳқақа̄ Кияӷнылгунилюку, акилыҳтуӷьяҳқақӣлъю иваӷипӣлӷӣт лъңаның.

К Евреям 12:13

Таклъяҳтики тӯмңи тутмалъыҳпык, та̄хкын кая̄лңуқ иӷун а̄нқаӷна̄нӷитуқ нафлъюминың, иўырңа на̄лъҳулъықуқ.

К Евреям 7:11

Лӣлиҳтӯсяни игақңа̄қ священнигыт киңунқысяҳқақӣ Левийем. Лъңита Лӣлиҳтӯсят апыҳтӯткақӣт югнун, иўырңа қыпҳақа̄т Кияӷныӷмун нӯҳутка̄гуқ. Тама̄кын апалъюқлъюку югыт аклъюка̄гут священнигымың Мелхиседекытун аюқылӷӣмың, Ааронытун аюқынӷилңуқ.

К Евреям 9:14

Тама̄кут пылюңиӷияқлъыгуката югыт югусӣтның, та̄ўа Христосым а̄ўан ўата пилъықӣ. Пылюңиҳлъықӣ умьюгаси сятңунӷилңуӷның ухпықилъыӷның лъпысинун қыпҳа̄тысқылъюку уңувалӷӣ Кияӷнық. Кынлыңилңӯгныкун Таӷныӷагныкун, Христос сыӷлыҳқылъҳилңуқ, тӯныхка̄гуқ лъңаның катам Кияӷныӷмун аҳқутңулюни.

От Иакова 1:4

Та̄хкын нуқынъыҳтулъыҳси нагныӷнакыси. Ынка̄м таўатын пикуфси аңтанӣлъықуси, ӣӷўиҳлъықуси нӯӷьяҳқа̄хпынаси.

1е Петра 1:21

Христосыкун ухпықаҳси Кияӷнық. Лъңан уңуваҳтыкақа̄ Христос туқулъыӷмың, қӯлваҳлъякақа̄лъю. Тама̄кын апалъюқлъюку ухпықилъыҳси, сиӷималъыҳси Кияӷныӷмун аюқуқ.

1е Петра 5:10

Иўырңа натыңӣҳақ икфиқылъыҳпыси киңуңаның, Кияӷныӷым пиниқиңаҳлъягым тамаңанун, лъңан катам налъҳуся̄лъықӣси сямың тамаҳа̄ның. Ухпықилъыси икнақуҳсяҳлъықӣ, айыпсюгиҳсяҳлъықӣ, аӷулӣҳтыслъықӣ. Кияӷныӷым накмикыхкақӣси Христосыкун илятысқылъюси кынлыңилңуӷмун а̄ңылъыҳлъягминун.

1е Иоанна 4:12

Китум алңунак ысҳӣгатңўа̄ӷа̄ Кияӷнық; пиниқускумта Кияӷнық кияҳтыңъӯқ илюмнъи, пиниқылъҳалъю ӣӷўиӷьяҳқа̄гуқ илюмнъи.