К Евреям 4:12 - Новый Завет на эскимосском языке

¹² Акузитаңи Кияӷныӷым уңува̄т қыпҳа̄гут. Ӣпхатаӷаҳтут алңунак иңлюхтун ипыхсяқаның сявихпагның. Ка̄путкаюгӯт қамавырухлъяк уңувасимлъю, таӷныӷамлъю ка̄тутңалъҳыхкынун, нафлъютлъю па̄тҳытлъю ка̄тутңалъҳитнун. Кияӷныӷым акузитаңи нанқихтикаюгӯт югым сюмыҳтаӷалъҳаныңлъю, сянақылъҳаныңлъю.

К Евреям 4:12 Iomraidhean Croise

От Луки 8:11

«Та̄на уңипаӷа̄н хўатын писӣгуқ: Пӣтутыт Кияӷныӷым акузиткӣ.

От Иоанна 12:48

Китум алңунак иҳсякыхкаңаңалъю, тугуклъинӷилъкакилъю акузитынка нанқихтистыкаҳқалгӯқ. Акузитыт акузиткыхканка нанқихлъықа̄т киңулиӷми аӷныӷми,

От Иоанна 6:51

Хўаңа уңувалъылитикаюгӯңа, нықыкшаңлъяқ укикақ қилягмың. Китум алңунак ныӷыхкумигу та̄на нықыкшаңлъяқ, кияҳсяҳқа̄гуқ қӯнпырухлъяк. Та̄на нықыкшаңлъяқ кымыкшакақа, тӯнақыхкыхка нунам юги уңувалъыңысқылъюки».

Деяния 2:37

Югыт нагалъюку Петр, сыӷлыӷьюхлъякат ынка̄м Петырлъю, апостолылгутаңилъю а̄птыкӣт: «Ухпықа̄лгутымнъи, сянақыста?»

Деяния 4:31

Юӷаныӷмың та̄қақутлъю қырңуӷутфигат мыңтыӷақ уфсюгуткақ. Аглыӷналӷӣм Таӷныӷам имиқӣ қамахлъюки, ынка̄м тытухпынатың уңипаӷьягуткат Кияӷныӷым уңипа̄мың.

Деяния 5:33

Агӷистыт сякшитутка̄лӷӣт Петырым кӣмсиӷьястың таўатын, рыпалъ туқусюкақыхкаңит апостолыт.

Деяния 7:38

Та̄наңӯқ Моисей сивунымнъиткақ қырңуӷутақңата килга̄ни Синайым найӷаҳан туңаңани. Таўани на̄йӷами яқулгым алыҳқуӷьятни тугукӣ Кияӷныӷым Лӣлиҳтӯсӣ апыҳтӯсят натын кияҳтылъыҳқамың. Та̄хкын а̄пқӣ та̄кут сивунымнъун ынка̄м лъңита нагныҳтыкақӣт хўаңкунъун.

К Римлянам 1:16

Кайңукигатанка Пинилӷӣт Уңипат: Кияӷныӷым аҳтуӷьяҳқа̄нӷилъқӣ югулилъыӷмун тамаҳа̄нун ухпықилӷӣнун. Сивуклъютың уңипақыхка̄гут Иудеянун та̄хкын язычнигнун.

1е Коринфянам 1:24

Иўырңа хўаңкунъун Кияӷныӷым накмикыхка̄нун Иудеяңуӷңа̄мта, язычнигыңуӷңа̄мта таўатынъыӷитуқ. Христосым туқулъҳан қақӯракун лӣтыстыкақӣлъю Кияӷныӷым аҳтуӷьяҳқа̄нӷилъҳаныңлъю, пыҳқинылъҳаныңлъю.

2е Коринфянам 2:17

Угляпихлъыҳӣстун кинкустун аюқынӷитукут сялин қыпҳаӷьяҳқа̄нӷилңуӷыстун тама̄кын қыпҳақамың. Пинилӷӣт уңипат пӣқӣт иляңистун қыпҳақастун аюқнилюки алъхыӷутусиҳқат кияҳта̄ӷусиҳқамун. Иўырңа хўаңкута ата̄сӣӷмылъюта ипапиҳқылъюта қыпҳаӷақукут; а̄пҳақапут уңипат Кияӷныӷым писқылъҳатун, каяхтылъҳатун уңипаҳтыңулюталъю, қыпҳаҳтыңулюталъю Христосымун.

2е Коринфянам 4:2

Иҳсяягуткақапут аксяқыхкатлъю, кайңуналӷӣтлъю. Пӯҳсигатапут югыт, алъяңуҳсигатапутлъю Кияӷныӷым акузитаңи. Хўатыҳлъюўа̄қлъю апыҳтӯсяқақапут Кияӷныӷым ипапилъҳи, ынка̄ңам югыт лӣлъықӣлъю натылңӯтфут ысҳа̄манӷани Кияӷныӷым.

К Ефесянам 5:13

Иўырңа қамахтыңъўа̄ӷлютың алӣҳтыкумың ниӷугмун, та̄ўа натытыҳпига̄таңи хўатыҳлъюўа̄қ алӣҳлъықут, қаюҳлъяк сяңўа̄ қамахлъюни ниӷугым ысҳаӷьяҳқа̄ҳтыслъықа̄.

К Ефесянам 5:26

Ухпықат аглыӷнаҳсяқақӣ аҳтуӷьяҳқа̄нӷилъҳакун акузитми, пылюңиҳсяқақӣлъю аӷвиглюки мыҳқун.

К Ефесянам 6:17

А̄тыху югулилъық на̄сқуӷӣта̄люку, Таӷныӷамлъю сявихпага, Кияӷныӷым акузитка̄.

1е Фессалоникийцам 2:13

Игамсиқаюгвикумаңина̄ңўа̄ҳпутлъю Кияӷнық уна апалъюқлъюку: хўаңкунъың нагақуӷлюку тугуклъиӷаҳси Кияӷныӷым уңипа̄. Лъпыси тугуклъиӷаҳси Кияӷныӷмың уңипа̄, нака̄н югның уңипа̄люку. Та̄наңӯқ Кияӷныӷым уңипаҳпига̄ қыпҳалӷӣ лъпысини ухпықилӷӣни.

1е Фессалоникийцам 5:23

Кияӷныӷым ныкыхмылъылитистым ӣӷўиҳтыңъўа̄ӷлюси пылюңиҳлъиси. Авутңитыслъики таӷныӷаси, уңувасиси, югусиси Атаныҳпут Иисус Христос тагикан.

К Евреям 13:7

Нықамиклъюки иглыӷутистыси уңипақикат лъпысинун Кияӷныӷым акузитаңаның. Нықамиклъюки натын кияҳтыка̄таңи ынка̄м ухпылъылгунақитык лъңистун.

От Иакова 1:18

Кияӷныӷым лъңан катам Пиюкылъқақа, тӯналюта нутаӷамың уңувалъыӷмың уңипа̄кун ипапиҳқылъҳым. Таўатын пика̄гуқ, хўаңкута мыгнуналъыҳпига̄сқылъюта улима̄ӷьяхаӷминың.

1е Петра 1:23

Алъхынқихтыка̄гуси. Уңувалъыӷраӷаҳси туқукаюгмың пиңунӷитуқ, иўырңа туқуңигалңуӷмың пиңӯқ. Алъхынқихтыка̄гуси Кияӷныӷым акузитаңитхун, уңувалӷӣт, кынлыңилңӯт.

Откровение 1:16

Аӷынқигныӷминың тугумӣқыфтӣ ма̄ӷраӷвинлык иӷалықыта̄ӷыт, қа̄нӷаныңлъю а̄нуқ сявихпак иңлюхтун хинакык ипыхсяқак. Хина̄ ниӷухлъяк аӷныӷым қука̄н сиқинӷӯҳтылъҳатун.

Откровение 19:15

Қа̄нӷаның а̄нуқ ипылӷӣ сявихпак, та̄хун қамахтыңъўа̄ӷлюки накумӣт кая̄лъқуҳлъықӣ. Иглыӷулъықӣ сявикынӷаӷмың анагуталиӷлюни. Та̄хкын тутмаҳлъықӣ аңуяни катам югыт тутмаӷақылъҳистун виноградыт қагыҳқӯсигнилңӯт. Та̄на тутмалъық сякша̄лъыҳлъяка̄ Кияӷныӷым Аҳтуӷьяҳқаҳа̄нӷилңӯм.

Откровение 19:21

Пилъюўаҳтым кӯникун иглыҳлъыҳӣм туқуқуӷӣ сявихпахкун қаныӷминың а̄ныхкакун. Та̄хкын қамахлъютың қаўа̄гыт ныӷӣт кымыхкўа̄ӷит кыпсюқӣналъыӷмыхнун.

Откровение 2:16

Авутыҳқылъюси сыӷлыҳқынъаниҳтык! Пинӷилъкуфси қантаӷақун такулъықамси. Та̄хкын пилъюўаҳлъықанка тама̄кут югыт сявихпагмың қанымнилңуӷмың.

Откровение 2:23

Туқулъықанкалъю авақутӣ. Ынка̄м қамахлъютың ухпықат юӷаӷвигнилңӯт лӣлъықа̄тңа хўаңаңӯқ лӣсимакилӷӣ югым тамаӷаҳми сюмыҳтаӷалъҳитныңлъю, илюмикыхкӣтныңлъю. Аӷью̄ӷьяҳқақамси тамаӷаҳпыси сыӷлыҳқытулыхпысистун.

Откровение 20:4

Та̄хкын ысҳаӷанка умӣлгусит ақумутат, ақумгалӷӣтлъю та̄кутхун. Кияӷныӷым нанқихтияҳқа̄ҳтыстыкӣ югның. Ысгаӷанкалъю уңувасӣт тама̄кут на̄сқўиҳтуқӣт апалъюқлъюку Иисус. Уңипақыхкақыхкаңат ипалъық Иисусым қайвиҳқыхка̄, акузитаңилъю Кияӷныӷым. Та̄кут манигӯсимаңитут тыӷикусялъю̄гмун, налиӷмың наңаӷныӷанун. Талўа қагумыхтыхун, налиӷмың ӣхмыхтыхун алъхыҳтылъҳита̄т налъюнӣлъкута̄ тыӷикусялъю̄гым. Уңуваҳтӯлъютың иглыӷутилгусиӷа̄т Христос тысяча аюмиқулъыӷнун.