К Евреям 2:8 - Новый Завет на эскимосском языке

⁸ иглыӷутистыңлъяқақанлъю сямун тамаҳа̄нун». Таўанилъю Акузитни Игақыхкани игақңа̄қ, Кияӷныӷым улима̄қа̄ ю̄к «иглыӷутистыңулюку сямун тамаҳа̄нун». Та̄на хўатын писӣгуқ сяңўа̄ қамахлъюни илятңа̄қ иглыӷутилъҳанун. Нақамлъю сялин ысҳӣгатаҳпут ю̄к иглыӷутилӷӣ сямун тамаҳа̄нун.

К Евреям 2:8 Iomraidhean Croise

От Матфея 28:18

Иисусым такулюки пикӣ: «Қамахлъюни аҳтуӷьяҳқа̄нӷилъық қилягмилъю, нунамилъю хўаңамнун тагивақа̄гуқ.

От Иоанна 13:3

Иисусым лӣсимакыхкаңа Атам тӯныхкақыхкаңа аҳтуӷьяҳқа̄нӷилъыӷмың сямун тамаҳа̄нун. Лӣсимакыхкаңалъю Кияӷныӷмың пиңутни, аглялъыҳқанилъю Кияӷныӷмун.

От Иоанна 3:35

Атам пиниқыпихта̄ Иӷныни, ынка̄м аҳтуӷьяҳқа̄нӷилъылиткақа̄ сямун тамаҳа̄нун.

К Евреям 1:13

Кияӷныӷым пимаңитңўа̄ӷӣ налиҳӣнӣт яқулыни хўатын: «Ақуми хўагун аӷынқигнымкун, кынляңа аңуяхтын тунымалӣтыстылъымнун итыгаҳпык асиңанун».

К Евреям 1:2

Иўырңа укуни киңулиӷни аӷныӷни алыҳқуқақӣлъю Иӷныӷмикун. Лъңакун Кияӷнық нунаңлъяқа̄гуқ, накмикыхкақӣлъю пилӣтысқылъюку сяңўа̄ тамаҳа̄н.

К Евреям 2:5

Кияӷныӷым накмикылъҳитӣ яқулгыт иглыӷутисқылъюки сивумылңуӷмун нунакаҳқамун. (Та̄наңӯқ нуна акузиткыхкыфут.)

1е Петра 3:22

Иисус Христос қилягмун маюӷлюни аӷынқигныӷанитуқ Кияӷныӷым. Ынка̄м иглыӷутңўӣ қамахлъюки яқулгыт, қилягым иглыӷутистыңи, аҳтуӷьяҳқа̄нӷилъҳытлъю.

Откровение 1:18

Уңувалӷӣңӯңа! Туқука̄яҳтуңа, иўырңа ӣи, уңуваңӯңа қӯнпырухлъяк кынлыңуна̄н. Қипыталгӯңа Туқулъыӷмыңлъю, Адымыңлъю.