1е Петра 2:16 - Новый Завет на эскимосском языке

¹⁶ Кияҳтык итымңалӷӣстун иўырңа итымңалъыҳси атуқыфқа̄н сыӷлыӷмун. Кияҳтык қыпҳаҳтыля̄ӷулюси Кияӷныӷмун.

1е Петра 2:16 Iomraidhean Croise

От Матфея 23:13

«Иўырңа сыӷлыӷўа̄ӷунақңӯси лъпыси апыҳтуӷикаюгни Лӣлиҳтӯсяның, Фарисеинилъю! Пинӣюгныӷӯси! Ӯмгутақаси итыӷнақылӷӣт Атаныҳпагулъҳанун Қилягым. Лъпыси катам ӣтҳигатуси, аӷулӣҳтақасилъю итыӷьюлӷӣт!

От Иоанна 15:22

Тагилюңа алыҳқӯмаңисяқумки лӣнъаянӷитут сыӷлыҳқылъиҳтың. Иўырңа хўа̄ анагнӣлъқавигӣтӣ сыӷлыҳқылъыӷмыхның.

К Римлянам 6:18

Итымутка̄гуси сыӷлыҳқылъыӷмың ынка̄м қыпҳаҳтыля̄ӷуҳтыка̄гуси ылъқуӷутңалъыӷмун.

К Римлянам 6:22

Иўырңа ма̄тын итымулъюси сыӷлыҳқылъыӷмың қыпҳаҳтыля̄ӷуҳтыка̄гуси Кияӷныӷмун. Ынка̄м Кияӷныӷым пылюңӣҳтысимӣси, алъхыӷутысимӣсилъю кынлыңилңуӷмың уңувалъыӷмың.

1е Коринфянам 7:22

Қыпҳаҳтыля̄қ накмикыхка̄ Атанӷым, лъңан итымңалӷӣка̄. Таўатыҳпигақ қыпҳаҳтыля̄ӷунӷилңуқ ю̄к накмикыхка̄ Христосым, лъңан қыпҳаҳтыля̄қа̄.

К Галатам 5:1

Христосым хўаңкута итымуткақутаңаның, итымыпӣгума̄кут. Ынка̄ңам ныкывӷатык аӷулӣлъка̄люси, қыпҳаҳтыля̄ӷуҳнықихтыхпынаси Лӣлиҳтӯсянун.

К Галатам 5:13

Ухпықа̄лгутымни, Кияӷныӷым тахсиқақӣси итымңалъыӷмун Христосыкун. Та̄ўаңинақ атуқыхпына̄н итымңалъыҳси атуӷьяҳқа̄люки сыӷлыҳқыңъалӷӣт пиюкылъҳи югусим. Итупилъ қыпҳа̄тыки иляси пиниқылъыҳпысигун.

К Ефесянам 6:6

Пилӣтистыси қа̄ткитыки қайўа ысҳапанӷитыӷңӣси. Қыпҳаҳтык ыфқуҳналюки пилӣтистыси катам ыфқуҳтылъыҳпысистун Атанық. Илюхпысиның атуқитыху Кияӷныӷым пиюкылъҳа Христосымун қыпҳаҳтыля̄қылӷӣстун.

К Колоссянам 3:24

Нықамиклъюку Атанӷӯқ Христос қыпҳа̄ткаҳси. Алъхыҳлъықаҳси акилыҳтӯсяҳси лъңаның. Акилыҳтӯсяқ акықусяқыхкақа̄ тӯнылъықнилюку югминун.

1е Фессалоникийцам 2:5

Лӣсимакаҳси усюқӯҳсяҳтӯнӷитамси налиӷмың сякыңвиксяҳтӯнӷитамси. Кияӷнық лӣсимакистыкаҳпут.

От Иакова 1:25

Кияӷныӷым ылъқуӷутңалӷӣт Лӣлиҳтӯсӣ итымутыстӣқут югның. Югым лӣнъақумаңинақумики та̄кут Лӣлиҳтӯсят, пуйгухпынаки атуқыхкумики Кияӷныӷым қуясяҳқақа̄ сялъҳакун тамаҳа̄н.

От Иакова 2:12

Акузилъыҳпысигун, сялъыҳпысигун пира̄мсилюси қаюҳлъяк лъпысиңӯси нанқихсяҳқат мыгнуналъыҳпигаҳқун Лӣлиҳтӯсякун. Та̄м Лӣлиҳтӯсям итымуткақӣси атуқысқылъюку Кияӷныӷым пиюкылъҳа лъпысинун.

2е Петра 2:19

Апыҳтуӷистысиӷўа̄ӷыт уңипа̄ткақӣт тама̄кут югыт итымңанилюки сямун алңунак пиюкылъҳитнун, лъңит катам итымңаңунӷитыӷңа̄ӷмың. Қыпҳаҳтыля̄ӷӯт сыӷлыҳқылъыӷмыхнун ынка̄м сыӷлыҳқылъҳита на̄фқысяқлъыгўӣ. Ю̄к қыпҳаҳтыля̄ӷӯқ алңунак сямун иглықатақилӷӣмың лъңанун.

От Иуды 1:4

Қырңуӷунъыҳпысини малигутақут, иўырңа уңипа̄сигатӣси сямың апыҳтуӷьюгақнилюси. Тама̄кут югыт тугуклъиӷьюгигата̄т Иисус Христос та̄наңинаҳақ Иглыӷутистывут, Атаныҳпутлъю. Ынка̄м алъяңуҳтақа̄т апыҳтӯсяқ Кияӷныӷым наңлъыхталъҳаның аюқылӷӣ. Хўатын пӣқут: «Кияӷнық наңлыхтаҳлъяхтуқ, сыӷывутикаюгӯқ ынка̄м итагнаҳтуқ распутствагңамта». Қавңарухлъяк Кияӷныӷым уңипа̄ткақӣлъю аӷью̄ҳлъықнилюку кина алңунак апыҳтуӷилӷӣ таўатын.