1е Петра 2:12 - Новый Завет на эскимосском языке

¹² Пинитун кияҳтык акулңитни ухпықа̄нӷилңӯт, лю̄рақ лъңита сыӷлытун пистыңунинаюкаңиси. Ысҳақумыхтыки аныӷныҳқилъыси усюқылъықа̄т Кияӷнық Аӷныӷани Христосым тагилъҳан.

1е Петра 2:12 Iomraidhean Croise

От Матфея 10:25

Итагнаӷияҳқа̄гуқ малихся̄ҳта апыҳтуӷистымитун лъӣқуми, қыпҳаҳталъю умӣлыгмитун лъӣқуми. На̄сқӯтилӷӣ ныңлъюгутминың, Веельзевулымың атӣмакатху, ныңлъюгутаңи сыӷлыӷатаӷа̄люки атиӷьяҳқақӣт.

От Матфея 5:11

Қуястылъылгӯси югыт сыӷлықӯқаңиси, амью̄ткыхкаңиси, иқлъыңиқуткыхкаңиси малихся̄ҳтыңутыхпысиның хўаңамнун.

От Матфея 5:16

Таўатыҳпигақ ниӷухси кӯкхутыстыху югнун ысҳӣсқылъюку аныӷныҳқилъыҳси, ынка̄м усюқнакаңат Атази қилягмылңуқ».

От Матфея 9:8

Юлӷутыт ысҳапаглюку талъюӷьюкат, усюқыхка̄т Кияӷнық таўатылңуӷмың аҳтуӷьяҳқа̄нӷилъылискаңи югыт.

От Луки 1:68

«Йықай усюқылътыху Атанық Кияӷныӷа Израилым, қаюҳлъяк итымусяҳтуӷӣ юни.

От Луки 19:44

На̄фқылъықа̄тын, туқуқуҳлъықӣтлъю юхтын миңлъютыхпык илюңанилңӯт, талўа ата̄сиқ уйӷак нымининъанӷитуқ. Тама̄кут қамахлъютың пияҳқа̄гут қаюҳлъяк лӣгикынӷилъкын Кияӷныӷым югулияҳтуқақсяқаңатын!»

От Луки 6:22

Қуяслъылгӯси югыт угумикынӷиси, иҳсякынӷиси, сыӷлықӯнӷиси, сыӷлыӷуникаңисилъю. Таўатын пӣқӣси қаюҳлъяк малихся̄ҳтыкыхкаңиси Иӷныӷан Югым!

От Иоанна 13:31

Иуда а̄ньян Иисус пикақ: «Хўа̄ ма̄тын югыт ысҳаӷа̄т натын Иӷныӷа Югым қӯлвалъыңылъҳа, ынка̄м лъңакун Кияӷнық қӯлвалъыңуқ.

Деяния 15:14

Симон Петырым уңипа̄тӣлъю натын Кияӷныӷым накмикуқыстылъҳи язычнигыт лъңанун катам югулюки. Таўатын пилъыӷмикун лӣгикыстыкақӣ лъңитлъю пиниқнилюки.

Деяния 24:13

Ынка̄ңам таўатын пимаңинъыӷңаӷма ипапиҳқынъа̄нӷита̄т.

Деяния 25:7

Тагисятху, Иерусалимыӷмӣт Иудеит каңлъюқаҳлъюку анахута̄таҳлъягуманика̄т иўырңа ипапиҳқыпагниңиткӣт анахутылъҳи.

Деяния 28:22

Хўаңкута лӣсюгаҳпут лъпынун сямың сюмыҳтаӷа̄ткақутаңи тама̄кут ухпықилӷӣт Иисусымың, қаюҳлъяк лӣсимакаҳпут нани алңунак сыӷлықӯӷақӣт».

К Римлянам 12:17

Китум сыӷлытун пикаңиси, акитыхпынаки сыӷлытун. Пӣқитыки пинилӷӣт тугуклъиӷьюгналӷӣт тамаҳа̄нун.

К Римлянам 13:13

Пинитун кияҳтылъта катам югыстун кияҳлъыҳӣт ниӷугани аӷныӷым. Сыӷлытун тыӷигниқыфқа̄мта, сю̄мыфқа̄мта, алңунак алңунасыӷафқамта, пилъюўатыфқа̄мта, ақинатыфқа̄мта.

К Римлянам 14:18

Та̄кут атуқлъюки қыпҳа̄тилӷӣм Христосымун, ыфқуҳлъықа̄ Кияӷнық, итагнақылъықа̄тлъю югыт.

К Римлянам 15:9

Христос тагика̄лӷӣлъю язычнигнун усюқысқылъюку Кияӷнық наңлъыхталъҳанун. Игақңа̄қ Акузитни Игақыхкани: «Ынка̄ңам усюқылъықамкын акулңитни язычнигыт, илягаҳлъықуңалъю усюқилъыӷмың атыҳпынун».

1е Коринфянам 14:25

Қаманлъиқыхкӣ аксяқңалӷӣт қайвиҳқылъықут. Ынка̄м қуңуҳлъюни манигуҳлъықа̄ Кияӷнық. Хўатын пилъықуқ: «Ипапыста̄қ, Кияӷнық хўа̄нтуқ лъпысини».

2е Коринфянам 1:12

Уна ысҳа қука̄югусиҳпут, сюмыҳтаӷалъымта уңипа̄тӣлъю кияҳта̄лъыҳпут хўани нунами ипапиҳқыңъа̄қлъю, пиниқиңа̄қлъю, кияң лъпысинун. Таўатын пӣқукут Кияӷныӷым пиниқиңалӷӣкун каюсилъҳакун, нака̄н югым пыҳқинылъҳакун.

2е Коринфянам 13:7

Юӷаӷақукут Кияӷныӷмун каюсӣтысқылъюси анахутыфқа̄фси писқылъюси. Иўырңа юӷа̄ңунӷитукут ипапиҳқынъалюку лъпысинун Кияӷныӷмун итагнақуманилюта. Итупилъ хўаңкута юӷа̄ткақамси ылъқуӷутңа̄н писқылъюси, қайўа югыт пиӷңата̄лъю итагнақылъҳинъилюта Кияӷныӷмун.

2е Коринфянам 8:21

Ынка̄м тама̄кын апалъюқлъюку атуқсюгақаҳпут Кияӷныӷми ылъқуӷутңалӷӣ, югнилъю ылъқуӷутңалӷӣ.

К Ефесянам 2:3

Қамахлъюта кияҳтыка̄гукут тама̄кустун югыстун. Атуқыхкақапут сыӷлыҳқыңъалӷӣт пиюкылъҳи югусимталъю, умьюгамталъю. Ынка̄м қамахлъюта алъхықа̄тымнъың сыӷлыҳқыстыңулюта, аӷью̄лъыңнақңуяҳтукут Кияӷныӷым сякша̄лъҳакун.

К Ефесянам 4:22

Хўатын апыҳтуқақӣси: сыӷлыӷыт пиюкылъыҳпыси пӯҳлъықӣсилъю, на̄фқылъықӣсилъю. Тама̄кын апалъюқлъюку пыхтыки наңаӷнылюсилъю, кияҳта̄лъқысяқысилъю.

К Филиппийцам 1:27

Сяяӷңа̄тңа нагныӷутыки кияҳта̄лъыси Христосым апыҳтулъҳатун Пинилӷӣтхун Уңипатхун. Ынка̄м ысҳаӷьяҳтуқумси, налиӷмың авӣтыӷңа̄ӷма нагақуқумси, лӣгикылъықақа ата̄систун пилъыҳси. Лӣгикылъықақалъю қырңаҳпыси ныкывӷанъақуткылъыси Пинилӷӣт Уңипат аңуяхпысиның.

К Филиппийцам 4:8

Ынка̄ңам ухпықа̄лгутымни, на̄ңнӣтаңакун посланияма уңипа̄сюўамси сюмыҳтаӷа̄ткумаңинӣсқылъюки пинилӷӣтлъю, усюқсяҳқатлъю хўатылңӯт: тама̄кут ипапигыт, қӯлваӷьяҳқат, ылъқуӷутңалӷӣт, пылюңилңӯт, пиниқсяҳқат, тама̄кутлъю пинитун акузиткысяҳқат.

1е Фессалоникийцам 4:12

Таўатын пикуфси ныӷьюкна̄нӷитасилъю алңунак аклъюкыхкаҳси, ухпықа̄нӷилңӯтлъю сӣвакылъықӣси.

1е Тимофею 2:2

Юӷа̄ткики умӣлгыт, қамахлъюкилъю иглыӷутилӷӣт, кияҳсяҳқа̄люта ныкыхмылъюта манигӯсималюта, қӯлва̄малюкулъю Кияӷнық.

1е Тимофею 4:12

Китумун алңунак паляқыстыхпына̄н аңлинҳа̄малъҳын. Иўырңа ухпықанун успута̄ўи акузилъыҳпыгун, сялъыҳпыгун, пиниқылъыҳпыгун, ухпықилъыҳпыгун, пылюңилъютын кияҳтылъыҳпыгун.

1е Тимофею 5:10

Амалъықа тамаңан лӣсимака̄т қыпҳалъыхтуляңа, катам авақутани пинитун аңлистылъҳатун, упуӷаныҳтуляңа, ухпықа̄лгутми итыгӣт уӷвуҳтуӷақлъюки, каюсиӷӣқлъюни сыӷлылӣлӷӣның, қӯнпыңлъю пинитун пӣқылӷӣ.

К Евреям 13:18

Юӷа̄ткитыкут. Лӣсимакапут умьюгамта анахутылъҳинъӣлъю, қаюҳлъяк ӣўлың пиюкылъқаҳпут ылъқуӷутңалӷӣ пияҳқа̄люку.

К Евреям 13:5

Кияҳтык пакигныӷухпынаси манимун, итагнаӷақитыклъю сятуталыхпысистун. Кияӷнық пика̄гуқ: «Унинъа̄нӷитңўа̄ӷамси; пыхна̄нӷитңўа̄ӷамси».

От Иакова 3:13

Кина акулыхпысинита пыҳқинылӷӣ, лӣгикималӷӣлъю? Таўатытылъыни кылгулъигу пинитун кияҳта̄лъыӷмикун, аныӷныҳқилъыӷмикунлъю қусывыгңаӷми.

1е Петра 2:15

Кияӷныӷым Пиюкылъқақа пинитун пилъыҳпысигун ныпӣҳтысқылъюки налъю̄қат тымңитхўамың акузилъҳӣт.

1е Петра 3:16

Иўырңа кӣмсиӷақитыки қусывыхлъылиӷлюси, сӣвакилъылиӷлюси. Сыӷлыҳқынӷилъкуфси умьюгаси сыӷлыӷнина̄нӷитут. Ынка̄м югыт сыӷлықӯқаңиси пинитун кияҳтылъыҳпысиның Христосыкун, кайңуюхлъықут таўатын акузилъыӷмыхның.

1е Петра 4:11

Тунусялгыт акузимун акузилит Кияӷныӷым акузитаңаның. Тунусялгыт қыпҳга̄тимун қыпҳга̄тилит икнақылъылиӷлютың Кияӷныӷым тӯныхка̄ның. Ынка̄м сялъыҳпысигун тамаҳа̄кун Кияӷнық усюқылъыңылъықуқ Иисус Христосыкун. Лъңан пика̄т ниӷуҳқылъықлъю, аҳтуӷьяҳқа̄нӷилъықлъю қӯнпырухлъяк кынлыңуна̄н. Аминь.

2е Петра 3:11

Қамахлъютың тама̄кут уӷугьяҳқа̄таңитның, лъпыси югни натылъыкыстык? Кияҳта̄лъыси пылюңилъит, Кияӷныӷмунлъю аюқлъит,