लूकाल 11:4 - पवित्र पोल्‍ले

⁴ माकु विरोदमते कीता तप्‍पुकुन मोमोट बल्हा माप कीतोमो, निमेगुडा मोमोट कीता तप्‍पुकुन माप कीम, माकुन पट्‍टुने अर्राकोंटा कापाळा.”

लूकाल 11:4 Iomraidhean Croise

मत्‍तयाल 18:35

इल्हेने मिमेटगुडा मीवा तम्मुन आयि दादान आयि मनसुनाल मापि कियाकोंटे ई राजाल बल्हा कीतोरो अल्‍हेने नावा स्वर्गमते मनना बाबालगुडा मीकुन मापि किय्योर.

मत्‍तयाल 26:41

मिमेट पट्‍टुने अर्राकोंटा मननाहाटीं तेल्‍विते मंचि, पारतना कीसेके मंटु. नना वेहताप कियालय मीवा आत्मा तयार मंता, गानि मीवा मेंदुल कमजोर मंता,” इत्‍तोर.

लूकाल 11:5

पजा येसु ओर्कु इल्‍हा वेहालय दल्‍गतोर. “मीवाव्टेटाल बोरो वरोर, मीवा दंटातोनगा नडजाम नर्का होंचि, अरे दादा, नहगा इंदकेन वरोर दंटागाल वातोर. गानि ओन्क अट्‍टिस दोसालय नहगा बतले हिल्‍ले. अदुनहाटीं नाकु इच्‍चुं पर्रिक बदल हीम, इंचि इत्‍तोर इनकुंटु!

लूकाल 13:4

सरे इंदके वेहाट! सिलो इनना गोपुरम कूलसि अरताहेंका पद्‍देनमिदि मंदि मनकालोर हातुर. अय्ते ई गोपुरम कूलता वेलाते येरुसलेमते मत्‍ता वेरे मनकालोर्कुंकन्‍ना हासोत्‍ता ई पद्‍देनमिदि मनकालोर एक्‍को तप्पु कीतुर इंचि इन्कुंचंतिरा?

लूकाल 22:46

अस्‍के येसु ओर्कुन, “मिमेट बारि निद्रा होत्‍तिर? तेदट! तेदसि मिमेट पट्‍टुने अर्राकोंटा मननाहाटीं पारतना कीसेके मंटु,” इंचि इत्‍तोर.

लूकाल 8:13

विज्‍जां अरता बंडाना गेर्से जेगातसंटोर बोर इत्‍ते, बोर अय्ते पेनदा पोल्‍लेतुन कुसिते केंजसि दान ओप्‍कुंतुर. गानि ओरा मनसुने पेनदा पोल्‍ले गट्‍टि पळुवाहाटीं, ओर कोन्‍नि रोजके विस्वासमते मनांतुर. पजा पट्‍टु हूळना वेला वातस्के विस्वासमताल ओर लक्‍कु आंतुर.

योहान 17:15

निमे ईरकुन इद दुनियाताल ओम इंचि नना पारतना कीसेक हिल्‍लेन, गानि पेद्‍दा देय्यमताल ईरकुन कापाळा इंचि पारतना कीसंतन.

1 कुरेंति 10:13

अंटोर्क वायानसोंटवे परिक्‍सां मीक वातां, दानकन्‍ना एक्‍को परिक्‍सां मीक वाया हिल्‍लें. गानि पेन विस्वासमगल्‍लद आंद. अद मीतोनि आया परवसोंटा एक्‍को परिक्‍साने अर्रा हिय्यो, परिक्‍सां वाते मिमेट सहन कियागोम इंचि अव्टेटाल पेय्‍सना हर्रिगुडा पेन कींता.

कुलुसि 3:13

सामि मीवा तप्‍पुकुन मापि कीतोर, अय्ते मिमेटगुडा वरोना तप्‍पुकु वरोर मापि कीम्‍टु. मीलोप्‍पो बोनकन्‍ना इंकावरोन पोर्रो बतलन्‍ना तप्‍पु दोस्‍साना मत्‍ते, ओर ओप्‍केते वरोनद वरोर तप्‍पुकुन मापि कीकुंटु.

2 तेसलोनि 3:3

गानि सामि विस्वासमगल्‍लोड आंदुर; ओर मीकुन देय्यमता कयदाल कापाळसि गट्‍टिगा निलाहंतोर.

2 तिमोति 4:18

सामि मनना स्वर्ग राज्येमते नना होनालय, ओर नाकुन हरेक कराब कबाटाल कापाळनुर. ओनके बस्‍केळ्‍ताहाटीं पेद्‍दातनम दोर्कि. आमीन.

याकोब 2:13

बारित्‍ते बोर अय्ते दया किय्योर, न्‍यायम कियाना रोज पेन ओनपोर्रो दया किय्‍यो. दया कियानोर न्‍यायमतुन गेल्संतोर.

पेन हुपिस्‍ता पोल्‍लें 2:10

बव तिप्‍पल्‍क अय्ते नीकु वायानव मंतां अवुना बारेमते निमे वेरियमा. हुळाट! देय्यम मी अव्टेटाल इच्‍चुर लोकुल्‍कुन जेलने वाटंता, मीवा विस्वासमता परिक्‍सा एतालय अल्हा जर्गार. मीकु पदि रोजकु तिप्‍पल्‍क अर्रापींता. हायाना वेला वायिनागानि मिमेट विस्वासमते गट्‍टिगा मंटु. अस्‍के मीकु पिस्वरता किरिटम हींतन” इंचि इत्‍ता.

पेन हुपिस्‍ता पोल्‍लें 3:10

निमे ओप्के पीसि नावा पोल्‍लेते ताकतिन अल्हेन, केंजतिनगुडा. अदुनहाटीं ई दुनियाता लोकुल्‍कुना पट्‍टु हूळालय बतलय्ते परिक्‍सा वायाना मंता, अव्टेटाल नीकुन कापाळंतन.