1 योहान 2:15 - पवित्र पोल्‍ले

¹⁵ दुनियातुन आयि दुनियाते मनना वस्‍तुकुन आयि पावरम कियमट. ओक्‍कला बोरन्‍नागिंटा दुनियातुन पावरम कियानय्ते, ओनगा पेनबाबाना पावरम हिल्‍ले.

1 योहान 2:15 Iomraidhean Croise

मत्‍तयाल 4:8

पजा आ पेद्‍दा देय्यम येसुन उंदि एत्‍तु गुट्‍टापोर्रो ओसि ओन्क दुनियाता अन्‍नि राज्येल्‍क, अवुना पेद्‍दातनाल्‍क बोत्‍तिगा हुपिच्‍चि,

मत्‍तयाल 6:24

अल्हेन वरोर मनकल इव्वुर मालकुल्कुनगा सेवा किया पर्रोर. अल्हा सेवा कीते ओर वरोन बेस पावरम कींतोर, इंकावरोन हयसोर. हिलाकोंटे वरोना पोल्‍ले बेस केंजंतोर इंकावरोना पोल्‍ले बारे केंजोर. इंचि मिमेट पेनदुन आनि दनमतुन उंदे मल्का सेवा किया पर्रिर.

लूकाल 16:13

“वरोर जीतागाल इव्वुर मालकुल्कुनगा सेवा किया पर्रोर. अल्हा सेवा कीते वरोन बेस पावरम कींतोर, इंकावरोन हयसोर, हिलाकोंटे वरोना पोल्‍ले केंजंतोर, इंकावरोना पोल्‍ले बारे केंजोर. अल्‍हेने मिमेट पेनदुन आनि दनमतुन उंदे मल्का सेवा किया पर्रिर,” इंचि वेहतोर.

योहान 15:19

मिमेट दुनियातोर्क नच्‍चताप मनानय्ते, ओर मीकुन पावरम कीसि मन्‍नेर. गानि मिमेट दुनियातोर्क नच्‍चताप मंचेके हिल्‍लिर. नना मीकुन इद दुनियाताल पेरतन. अदुनहाटीं दुनियातोर मीकुन हय्सुर.

रोम सहरतोरहाटीं पौलुसना सिट्‍टि 12:2

मिमेट इद दुनियातोर पिसताप पिस्‍सामन्‍नि गानि मिमेट मीवा मनसु मार्सकुंचि पेनदुक नच्‍चना पिस्वर पिस्‍सट. अस्‍के पेनदा इच्‍चा बतलो एरपाट कींतिर. एरपाट कीसि, “अद इच्‍चा वेल्‍लेन बेसतद, कुसि हियानद, बतले तप्पु हिलवद,” इंचि मीकु तेळियंता.

गलातिया 1:10

अय्ते नना इंदके लोकुल्‍क नाकुन मेच्‍चुकुनगोम इंचि हूळसंतना मरि पेनदा आसिर्वाद दोर्कगोम इंचि हूळसंतना? हिलाकोंटे लोकुल्‍कुन कूस कियानसंटोना? ओक्‍कला नना लोकुल्‍कुन कूस कियानसंटोन आसि मत्‍ते किरिस्‍तुना सेवाकुन आयाकोन्‍नेन.

इपीसि 2:2

मिमेट मुन्‍ने इद दुनियातोर ताकाना रीति-रिवाजकुन पीसि ताकिंदिर. पोर्रो वळिते तिरियना देय्याल्कुना मुक्‍यल बल्हा ताकिस्‍ते अल्हा ताकिंदिर. इंदकेळ्‍कगुडा पेनदा पोल्‍ले परकारम ताकवोर लोप्पो अद आत्मा कबळ कीसेके मंता.

1 तिमोति 6:10

बारित्‍ते कोत्‍तन पोर्रोटा पावरम, अन्‍नि रकाल्कुना सेड्‍डातनाल्कुंक हर्रि पुट्‍टिचंता. बचुटूरो लोकुल्‍क ओरा इच्‍चान दोर्किच्‍कुननाहाटीं विस्वासमताल तप्‍सोत्‍तुर आनि ओरा पिस्वरते वेल्‍लेन दुक्‍कमतुन संपादिंच्‍कुंतुर.

याकोब 1:27

बोर अय्ते दिक्‍कु हिल्वोर्कुना, मुंडामोस्तवुना तकलिप लोप्पो सहायम कींतोर, इद दुनियाता कराब कबाह्कुनाल लक्‍कु मनंतोर, असंटोर मना पेनबाबाना मुन्‍ने दोसेम हिल्वोर पवित्र आंदुर.

याकोब 4:4

विस्वासम हिल्वोरिटा! दुनियातोनि दंटा कियमळ इत्‍ते पेनदुक पगा आयमळ इद मीक तेळियोना? अदुनहाटीं बोर अय्ते दुनियातोनि दंटा कींतोर, ओर पेनदुक पगातोर आंतोर.

1 योहान 3:17

गानि बोनागन्‍ना वेल्‍लेन दनम-संपत्‍ति मंचि, ओना दादांको, तम्मुंको अवसरम मंता इत्‍तद तेळियसिगुडा ओना जीवा नोय्याकोंटे, ओनगा पेनदा पावरम मंता इंचि बल्हा इनकोम?

1 योहान 4:5

आबद्‍दम कबुरतोरा आत्मां दुनियातव आंदुं, अदुनहाटीं अव दुनियाता पोल्‍लेंगे वळ्‍कंतां, दुनियातोर अवुना पोल्‍लें केंजंतुर.

1 योहान 5:10

बोरय्ते पेनदा मर्रिनपोर्रो विस्वास इर्रंतोर, ओर ओनालोप्‍पो पेनदा साक्‍सितुन इर्रंतोर. पेन इत्‍ता पोल्‍लेनपोर्रो बोरय्ते विस्वास इर्रोर, ओर पेनदुन आबद्‍दम कींतोर. बारित्‍ते पेन तना मर्रिना बारेमते हीता साक्‍सितुन ओर विस्वास किया हिल्‍लोर.