Jode 1:1 - Ese Ejja New Testament

¹ Eya Judas bajjani Santiagoja chahua Jesosa Quitojo chacochacopoquiani. Jiquio esohui eyaya tehueaña joya Eyacuiñajji Echii-aiya queajeanee acapoquianicuanaja ebajji oja iyaacuanaja. Jesosa Quitohua quiana jaahuanacapoquianitii.

Eyacuiñajjija Esohui

¹ Eya Jode, Satiacoja chahua. Eya Jesosa Quitoja huoojeaꞌyo. Ecuea epeejji cuana, eyaya miquiana que tehueaña jama baꞌa: Esejaya Chii ai Eyacuiñajjiya miquianaya iyaa caꞌyonaje onijje ejjapeequi meesahuaꞌyojji. Miquianaya ojaya quea jea nee nee poani; Jesosa Quitohua miquianaya jaahuana cani peaꞌai.

Jode 1:1 Iomraidhean Croise

Mateo 10:3

Pea Felipe, Bartolomé, Tomás, Mateo pea-ai. Oya Mateo Roma emeshimeseja yajji bejjo chichapoquiajji poa. Pea Jesosaja babaca dejjacuana ma bajjani poa ba'a: Santiago Alfeoja bacuaejja, Tadeo pea-ai.

Mateo 13:55

Jiquio nequi dejja acuicacajjija bacuaejja, María oja nae. Oja chahuacuana Santiago, José, Simón, Judas pea-ai.

Macoso 3:18

Jesosaa Andrés, Felipe, Bartolomé, Mateo, Tomás, Santiago Alfeoja bacuaejja, Tadeo, pea Simón pea-ai babacacapoa. Simón romano dejjacuana botiamaneinei poa.

Macoso 6:3

Jiquio nequi dejja acuicacajjija bacuaejja, María oja nae. Oja chahuacuana Santiago, José, Simón, Judas pea-ai. Oja jjo'icuana esenijje pea-aiya ba'e.— Jamajojoya aje Jesosa onijjejaajji pea-ai posojojoya cajaa oya acapoa cuaa.

Noca 6:16

Pea ba'a: Judas Santiagoja bacuaejja. Pea Judas Iscariote bajjani babacacapoa pea-ai. Oya quijje Jesosa iñameesahuajji poaje. Mahuisoya cuana poa Jesosaja babaca dejjacuana ona sohuihuohuiquinequijji epojji.

Huani 12:26

Ojjaña cua ejo chacochacosapoajecuana enijjetii nequipoquica'yojji. Cua e anijo oya anije pea-ai ejo echacochacojji. Joya ejo chacochacoanicuana ecue Chii esohui queapame mimije ojo.—

Huani 14:22

Majoya aje pea Judas bajjani dejjaa, Iscariote pojjeama dejjaa, Jesosa huohuiajjacapoa jama ba'a: —Emeshimesenei, ¿yajjajo acuae mima' jayojja poanicuanajo pea-ai mijjabameequije so'o miya queaca'anee poani? ¿A'a ecuananeijo miya queaja'anee jjabameequiani?—

Huani 15:16

Eya ca iña miquianajaya babaca pojjeama nequi. Miquianaya caca oe ecue babaca poani. Jamajjeya eyaya quiana huohuiaña miquiana queaja'a ba'epoquijjijo queajjajjahuiso jayojja epojjijo. Jamatii eba'ejeapoquijjijo pojjeama eyaya quiana huohuiaña. Majoya miquianaya queaja'a ba'epoquiani bamajje cua miquiaaya huohuiajjaje huisotii ecue Chiiya acaje ecue bajjanijo mimiajo.

Huani 17:15

Ecuea miya jama ehuohuiajjajji pojjeama poaje e shajja-ajjajji poanicuana jjeya miquea edojopea-ai'yojji Eyahuasijje. Eya ca mimiani minijje e shajja-ajjajji poanicuana jiquio meshijotii nequi so'o edosiquianajo mique o nahuepoquiajjijo.

Huani 17:17

Queapamenee nequipoquimeecue cuana mijo echacochacojji. Miquea esohui oja sapajo huanameecue. Miquea esohui e'ejojoneitii poani.

Huani 17:19

Eya minijje queapameneetii nequipoquiani e shajja-ajjajji poanicuana asahuapoquiajji epojji miquea esohui e'ejojoneijo. Jamaya eya poani ojaya miquea echacojji queapame eapoquiajjijo.—

Huani 6:39

Ecue Chii e huoojeajji epo ejo jjashahuabaquianitii ojjaña oja quia huisotiicuana ecuea enahue'yojji. Oya jjashahuabapea-aiquiani ojjañatii oja quiacuana emano'yo jaa ecuea eshequimee'yojji pea-ai Eyajo eba'etiitii'yojji epojja oe-ejjenei apoa poajo.

Hecho 1:13

Majoya Jerusalén meshi bañaqui'yomajje equi equecuayijjijamacoohuasijje jaasohuaquiñaquiapoa cuana ma oya cahuinaje equijamacohuasijje. Mahuiso cuana aje poa ba'a: Pedro, Juan, Santiago, Andrés, Felipe, Tomás, Bartolomé, Mateo, Santiago Alfeoja bacuaejja, Simón Celote, Judas Santiagoja bacuaejja pea-ai. Mahuisoya poa cuana.

Hecho 20:32

—Jesosaja epeejji ecue dohuecuana jjo'icuana, eya Eyacuiñajjinijje mimiani miquiana oja jaahuanajjijo ojaya miquiana queajeaneenee. Eyacuiñajjiya queaca'a nequimeesahuacapoquije quiana oja esohui queapamejo. Ohuaya quiajeyocaje ojjaña cua ohua huohuicanaje huisotii oja epeejjicuanaja yajji.

Hecho 27:23

Mecajje oe Eyacuiñajjija ángel ejo jjaja'aquinaje oja huoojea. Eya caca iña oja nahue'yo, ojo chacochacopoquiani.

Shomano 1:1

Eya Pablo Jesosa Quitojo chacochacopoquiani oja babaca ona sohuihuohuiquinequijji poani. Eyacuiñajjiya eya babacacapoa oja esohui queapame huohuipoquiajji epojji.

Shomano 1:6

Miquianaya pea-ai Roma meshijo ba'eca Eyacuiñajjiya iyaacanaje Jesosa Quitoja epeejji epojji. Jamajjeya eyaya jiquio esohui tehueaña miquianajaya queaja'a ebajji Eyacuiñajjija quiana queajeanee poani. Ohuaya quiana bacapoquianitii ojaya'yo. Eseja Chii-ai Eyacuiñajjiya, Emeshimesenei Jesosa Quitohua pea-ai quiana queapamenee ca-acapoquiahua ojayanei ejjashahuabaquijjijo, queaquijijjijajinee capomeecahua quiana pea-ai.

Shomano 16:18

Ma dejjacuana ca eseja Emeshimesenei Jesosa Quitojo echacochacojji pojjeama poani. Ojayanei ejjashahuabaquijji queatai eajjijo ca chacochacoani macuanaya. Esohui queapame jayojja acani cuaa jamatii peacuana dasiajji. Jamajjeya queahuisocuana siajje acani joya esohui baneineipojjima'cuana.

Shomano 6:22

Jjeya ca mimishi emiquianamese pojjeama aca'yonaje Eyacuiñajjiya. Jjeya miquiana Eyacuiñajjijo echacochacopoquijjitii po'yonaje. Jama pomajjeya quiana jjeya mimishiama ba'epoquije Eyacuiñajjijo. Majoya quijje ba'etiitiije'yo onijje Eyajo.

Shomano 8:30

Jamajjeya Eyacuiñajji yahuajoneitii jjashahuabaquianiapoa ache oja bacua epojjijo. Mahuisotiiya ohuaya iyaacapoquiani. Mahuisotiicuanaya ohuaya mimishima'yo bacani. Majoya Eyacuiñajjiya ojjaña oja bacuacuana queabihuinee eba'etiitiipoqui'yojji acaje oja Bacuaejjanijje ojjañacuaa o bihuiacajo.

Shomano 9:24

Eyacuiñajjiya eseya iyaacapoa ojaya'yo epojji. Ohuaya judionei oopana pojjeama iyacapoa ojaya epeejji epojji. Judío pojjeamacuana pea-ai Eyacuiñajjiya iyaapea-aicapoa.

1 Conitio 6:11

Iyehuiso quiana yahuajo jamaya ba'epoquiapoa queamimishihuiso. Jjeya quiana ca jama pojjeama'yo, Eyacuiñajjija po'yonaje. Ohuaya miquiana mimishima'yo bacani oja cuijeajeyo'yo. Jamaya quiana Eyacuiñajjiya queapamenee acanaje Edojjoshahuapamejo Emeshimesenei Jesosa Quito mano'yapoajojoya miquiana nahue'yojji.

Epesio 5:26

Jamaya Quito esejo mano'yapoa eseya majoya Eyacuiñajjija bacua epojjijo, ese mimishima'yo poani oja ebajjijo pea-ai. Eseya oja esohuijo jjashahuabaqui'yajo eseja mimishicuana chama'yo acani jiquio ecua enaa ma queajehue shacuajeaca'yani jamaya.

1 Tesanonisese 2:12

Ecuaa quiana huohuineinaje esohui jama ba'a: —Queapamenee oe ba'epoquicue jiquio ecua se Eyacuiñajjiya queapame ba'emeesa-acani jamaya. Ohuaya quiana nahueca'yonaje ojayatii epo'yojji. Eyacuiñajjiya quiana ba'emeecapoquije'yotii ma ohua queaca'aneetiiya queasajajanee nequiya huoojeacapoquianitii meshi Eyahuasijje.—

1 Tesanonisese 5:23

Eyacuiñajjiyanei jiquio ese queaquijijjijajinee pomeejji poaniya quiana mimishiama caba'emeecapoquiahua. Miquianaja esapadojjo, edojjoshahua, eyami pea-ai canahuecapoquiahua ohuaya miquiana queaja'a ba'epoquijji eseja Emeshimesenei Jesosa Quito poeo'oyajo.

2 Timoteo 1:9

Eyacuiñajjiya eseya nahueca'yonaje. Majoya ohuaya eseya jama pomeesa-acani oque ejjaquiaquipoquijji ojjaña pojjajo queapame mimishiama eba'epoquijji ojo. Eseyaneitii queapame ba'epoquianijo pojjeama ohuaya eseya nahueca'yonaje. Chojja majo pojjeama, ojayanei ejjashahuabaquijjijo ca eseya nahueca'yonaje. Yahuajoneitii Eyacuiñajji esejo jjashahuabaquianiapoa ohuaya eseya quijje ojayanei ejjashahuabaquijjijo queapame acaje Jesosa Quitojo jiquio meshi oja panajjimahuajo.

2 Timoteo 4:18

Jamaya Emeshimeseneiya eya nahuecapoquije dejjamasecuanajo. Majoya quijje ohuaya eya nequimeecaje'yo ma ohua ojjañacuana huoojeacapoquianitii meshi Eyahuasijje. Eyacuiñajji bihuiapajeaca-ajja. Oya cabihuiatiitiicapoquiahua cuaa.

HEBREOS 3:1

Ecue dohuecuana, jjo'icuana, Eyacuiñajjiya quiana bacani ojaya'yo quijje queapamenee eba'etiitii'yojji onijje Eyahuasijje. Miquianaya jama epojjiya iyaacanaje ohuaya, jamajjeya quiana oe Jesosa Quitojo queaja'anee jjashahuabaneiquipoquicuetii. Oya Eyacuiñajjija huoojea poa ese oja esohui e'ejojonei sohuihuohuipoquiajji. Eyacuiñajjiya oya onijje emimipoquijji ebionei etii nequimeepea-aicani ese queaja'a ba'emeesahuapoquiajji ma ese jjashahuabaquipoquiani esohui jayojja eba'epoquijji.

Santiaco 1:1

Eya Santiago bajjani Eyacuiñajjijo, Emeshimesenei Jesosa Quitojo pea-ai chacochacopoquianitii. Miquianaya 12 huisome Israelja bacuaejjacuanaja osecuacuana poani queameshihuisohuasijje jjaba'echejjequi'yo ba'e. Eyaya jiquio esohui ebionei aña miquiana queabihui pojji.

1 Peno 1:2

Eyacuiñajji Echii-aiya yahuajoneitii quiana babacacapoa ojayanei ejjashahuabaquijjijo. Oja Edojjoshahuapameya quiana jjashahuabameequicani queaja'a eba'epoquijji ojaya'yo, Jesosa Quitoja esohuijo ejjashajja-ajjaquipoquijji ohuaya quiana jjashahuabameequicani. Jesosa Quitoja enaa miquianaja mimishicuana cuijeaca'yonaje. Eyacuiñajjiya quiana queapamenee ca-acapoquiahuatii queahuiso ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

1 Peno 1:5

Miquianaya Eyacuiñajji queaca'aneetii poanijo jjashahuabaquipoquiani, jamajjeya ohuaya queaca'aneetii nequiya quiana jaahuanacapoquiani quijje Eyahuasijje ojaya edojo'yojji. Ma epojja apoa poajo quijje miquiaaya queaja'anee baje ohuaya quiana nahuecaje'yo onijjetii eba'epoqui'yojji.

1 Peno 2:9

Miquianaya caca Eyacuiñajjija babaca poani. Onijje emimipoquijji ohuaya quiana bacani Emeshimeseneija'yo ojo queapame echacochacopoquijji. Ojaya'yo poani quiana ohuaya bacapoquiani pea-ai. Jama epojjiya Eyacuiñajjiya quiana nequiashiñacanaje. Majoya ohuaya quiana iyaacanaje peacuana sohuihuohuiya epoquijji achepamenee, acheca'anee Eyacuiñajji nequi ona huohuiquiya. Miquianaya yahuajo meca jayojjatii queaquehua ba'epoquiapoa. Jjeya quiana ca queaja'a eba'epoquijji epojjatii jama ohuaya pomeecanaje.

1 Peno 5:10

E'ejojonei quiana jiquio meshijo nequi dejjamimishicuaa queanee acapoquije so'o Eyacuiñajjija esohuijo. Majoya quijje Eyacuiñajjiya miquiana queajeanee ajji poaniya queapamenee mimishiamanei pomeecaje'yo Eyahuasijje epoqui'yojji. Onijjetii ani'yohua ojjañacuana huoojeapoquiajetii quiaa Quitoja'yo poaniyajjejojo. Dejjamimishicuaa queanee pomeecajo Eyacuiñajjiya quiana queaca'a tiimeecaje majoya. Ohua jama pomeecajje quiana meteama ba'eje onajo.

2 Peno 1:1

Eya Simón Pedro Jesosa Quitojo chacochacopoquiani oja huoojea ona sohuihuohuiquinequijji poani. Jiquio esohui eyaya tehueaña ojjaña joya Eyacuiñajjija esohui queapamenee Jesosa Quitojo ejjanahuemeequi'yojji shajja-ajjajji poanicuanaja ebajji. Eyacuiñajjiya quiana queaja'a jjashahuabameequica'yonaje ojo ejjanahuemeequi'yojji ma ecua ecuana yahuajopishana queaja'a jjashahuabameequica'yapoa jama pea-aiya oya jayojjaya. Jesosa Quito Eyacuiñajji poani queapamenee nequiyajjejojoya jamaya eseya jjashahuabameequica'yonaje ojo ejjanahuemeequi'yojji.

Jode 1:21

Eyacuiñajjijo queaja'a ba'epoquianiya miquiananijje ba'ecacuana queajeanee apoquiacuetii e'ejojonei, siajje pojjeamaa. Eseja Emeshimesenei Jesosa Quito poeo'oyajjijo oe jjaishoaquipoquicuetii. Jamajjeya ohuaya eseya ba'etiitiimeecaje'yo onijje Eyahuasijje ojaya eseya queajeanee poanijojoya.

Jode 1:3

Ecue dohuecuana jjo'icuana, ecuea quiana queajeanee poani. Eya queahuiso jjashahuabaquinaje miquianajo esohui queaja'a etehuejji Eyacuiñajjija esohuijo ese jjanahuemeequi'yojji. Ohuaya quiana nahueca'yonaje eya jayojja pea-aiya. Jjeya ca eyaya pea esohui tehueaña miquianaja ebapea-aijji. Jamajjeya quiaa oe esohui queapame nahuepoquiacue. A'a Eyacuiñajjija esohui pea amee'yojji cuana. Bacue, ohuaya oenei esohui quiacapoa oja babacacuana ese ma esohuijo ejjanahuemeequi'yojji. Jamajjeya oja esohui pea aca'yoajja.