Jueces 1:1 - Biblia Enxet

¹ Natámen apketsapma axta Josué, keñe israelitas apkelmaxneyáncha'a Wesse' egegkok yaqwayam elya'asagkoho', yaqsa sa' kexa énxet'ák elnapakpok apmonye'e m'a cananeos.

Jueces 1:1 Iomraidhean Croise

1 Reyes 22:5

Elmaxneyha sa' sekxók Wesse' egegkok yaqwánxa etnehek hegána'.

Éxodo 18:15

Aptáhak axta apchátegmowágkokxo Moisés se'e: —Hákho eyke chá'a ko'o hey'ótak ma'a énxet'ák, yaqwayam elya'asagkohok chá'a aptáhakxa m'a Dios.

Éxodo 28:30

Enegken sa' nahan kañe' kélchexanma nak chá'a kélnények ma'a Urim tén han ma'a Tumin, cham'a kélmeykha nak chá'a yaqwayam kólya'asagkohok ma'a apmopmenyého nak Dios, yaqwayam sa' elsók chá'a Aarón elchexnek apnények apmeyákxo enxoho chá'a sekhakxa ko'o, sektáha nak Wesse' kélagkok. Apnények sa' chá'a elchexnek Aarón xa kélmeykha nak chá'a yaqwayam kólya'asagkohok sekmámenyého nak chá'a ko'o.

Números 27:21

Ey'ókxak sa' nahan Josué m'a apkelmaxnéssesso Dios énxet'ák apagkok Eleazar, keñe sa' Eleazar hélmaxneyha ko'o emha apwesey, emha m'a Urim. Josué sa' eyke eltennaksek chá'a apkeltamhókxa etnahagkok israelitas ekyókxoho aqsok apkelánegkaxa enxoho chá'a.

Jueces 1:27

Mopwanchek axta apmáheyo elántekkesek Manasés énxet'ák apagkok, ektáha axta apheykha m'a tegma apwányam Bet-seán, Taanac, Dor, Ibleam tén han Meguido, tén han ma'a apheykencha'a axta m'a tegma apketkók keto' axta m'a tegma apkelyawe nak, apheykha axta aqsa makham cananeos ma'a.

Jueces 2:21

Malántekkesek sa' ko'o kaxwók apmonye'e m'a énxet'ák nak, melántekkesso axta m'a Josué, cham'a apyennaqtamakxa axta.”

Jueces 2:8

Ciento diez apyeyam apagkok axta eyke weykmok apketsapma m'a Josué,

Jueces 2:9

keñe axta kélátawanyama m'a xapop apagkok apagko' nak, cham'a Timnat-sérah, ekyetnama nak ma'a teyp egkexe Gaas, ekpayho nak nexcheyha, neyseksa axta m'a xóp élekhahéyak nak Efraín.

Jueces 20:18

Apkelmahágkek axta israelitas ma'a Betel, apkelpaqhetcháseykpók axta Dios ma'a yaqwayam enxoho elya'asagkoho', yaqsa énxet'ák ektamagkok apmonye' m'a Benjamín énxet'ák apagkok. Apchátegmowágkek axta Wesse' egegkok apxéna Judá énxet'ák apagkok ektamagkok apmonye'.

Jueces 20:27

Yetnegkek axta yántéseksek ekhémo mók nélpaqhetchásamáxkoho Dios ma'a Betel ektéma axta xa, cham'a aptémakxa axta apkelmaxnéssesso Dios énxet'ák apagkok ma'a Finees, Eleazar axta apketche, ektáha axta aptaqmelchesso, Aarón axta aptáwen. Apkelpaqhetchásekpók axta Wesse' egegkok ma'a israelitas: “¿Egwancheya agketamagkokxak makham negko'o nempeywomo xamo' Benjamín nak énxet'ák apagkok, ólwátésagkok enxeykel'a aqsa?” Aptáhak axta apkeláneya Wesse' egegkok se'e: “Kólchetamagkokxa sa' makham, saka sa' agkések yaqwayam kólmallánek.”

1 Samuel 10:22

tén axta kélmaxneyancha'a makham Wesse' egegkok, yaqwayam kólya'asagkohok apheyk kexaha han Saúl ma'a. Apxénchek axta Wesse' egegkok apha Saúl ma'a, apyexanma m'a neyseksa kélxátamakxa axta chá'a aqsok.