Jeremías 3:2 - Biblia Enxet

² “Kanmexekxoho hana egkexe éláxñeyo nak, kataqmelchesho sa' élányo: ¿háxko megkalánegweykenxa exche' ektémakxa megkamasexta? Kaxek chá'a exche' nekha ámay kaleyxek élásekhayókxa, aptamheykegkól'a árabe m'a yókxexma meykexa nak énxet. Kenyetséssegkek apchókxa ektémakxa megkamasexta, tén han ektémakxa ekmaso.

Jeremías 3:2 Iomraidhean Croise

Génesis 38:14

lekkek axta m'a ektaxno ektaxneykekxa nak kelán'a tampe', chaqlássek axta nát apáwa apkexyawe, yaqwayam enxoho megkeykpelchexche', heyk axta m'a nentaxnamakxa nak tegma apwányam Enaim, ámay ekmahéyak nak Timnat. Temék axta xa ektáha nak, hakte wet'ak axta apwánémo m'a Selá, axta eyke kaxka'ak yaqwayam katnehek atáwa'.

1 Reyes 11:3

Setecientos axta ekyókxoho apnaqteyegka'a élánamáxkoho kelwesse'e étkók, keñe trescientos ma'a apkelmeykha naqsa, cháxa ekyenyókassama axta m'a Dios.

2 Reyes 23:13

Aptawáseyha axta han wesse' apwányam ma'a tegma kélpeykessamókxa axta chá'a aqsok kéleykmássesso, apheykegko axta m'a ekpayho nak ekteyapmakxa ekhem Jerusalén, ekpayho nak nepyeyam ma'a egkexe Olivos, apkelánéssama axta Salomón, wesse' apwányam Israel ma'a Astarté, aqsok apcháyókxa ekmaso agko' axta m'a sidonios; tén han ma'a Quemós, kéleykmássesso ekmaso agko' apagkok axta m'a moabitas, tén han ma'a Milcom, aqsok kéleykmássesso ekmaso agko' apagkok axta m'a amonitas.

Salmos 106:38

Apkelnapmeyk axta m'a meyke nak éltémakxa, cham'a apketchek apkelennay'a nak, tén han kelwán'ák, apkelméssegkek axta chá'a m'a aqsok kéláyókxa nak Canaán. Kenyetséssegkek axta xapop ma'a éma agkok nak,

Proverbios 23:28

máxa apmenyexmal'a katnehek kaleyxmakha énxet, apxámok nahan katnehek énxet eknaqtawassáseykha apnaqteyegka'a.

Proverbios 7:11

máxa axta táhak ma'a kelán'a megkamegqaktól'a kalának ekmakókxa enxoho kalána', megkaxmal'a aqsa chá'a axagkok,

Jeremías 12:12

Apkelxegakmek énxet'ák apkello m'a ekyókxoho egkexe nak yókxexma meykexa énxet, hakte yetneyk ko'o xama sókwenaqte, ko'o sektáha nak Wesse', yaqwayam sa' kamasséssók ekyókxoho s'e apchókxa nak, méko sa' xama enxoho katnehek meyke ektáhakxa apha.

Jeremías 2:20

“Nanók agko' ko'o kéxegke sélenmexeykekxa', megkalyaqwámeykegkok hélyahakxoho.’ Axta kéltemék chá'a kélpaqméteykencha'a s'e: ‘Mogmenyeyk negko'o exchep agyetlawha.’ Kélláneykegkek axta kéxegke kéltémakxa megkólmasexta'a m'a néten egkexe nak tén han ma'a kóneg nak yenta'a élyentaxno pessesse agkok.

Jeremías 2:23

Megkólwanchek kéxegke kóltéhek kélpeywa s'e: ‘Mólpeysegkesamaxchek negko'o, mólpeykessamók han ma'a aqsok kéláyókxa élmowancha'a amya'a nak.’ Kóllano kéltémakxa axta m'a yókxexma ekyapwátegweykenxa nak xapop, kóllano ekyókxoho aqsok kélláneyak axta, kéxegke kélhémo nak yányátnáxeg apkelwána apyennaqtél'a apxega, apweynchámeykhal'a ekyókxoho yókxexma;

Jeremías 2:7

Eknaqleykenteyk axta ko'o s'e ektaqmelakxa nak xapop, yaqwayam enxoho kóltawagkok aqsok ekyexna eñama nak xa xapop nak, tén han ma'a aqsok éltaqmalma éleñama nak xa. Kélxegeykmek axta kéxegke, keñe kéletsagkassa'a xapop ahagkok, éltaqnawassáseykekxeyk axta s'e apchókxa nak, ektáha nak ko'o ahagkok ahagko'.

Jeremías 3:1

Aptáhak Wesse' egegkok se'e: “Yenyókek agkok aptáwa' xama énxet, keñe ektepa enxoho aphakxa xa kelán'a nak, kamekxak pók énxet, yawanchek kay'ókxak makham ma'a apmonye' atáwa' axta. ¡Ekmanyása agko' sa' katnéssesek apchókxa ektáha enxoho xa ektáha nak! Keñe exche' Israel, kelánéseykegkek nentémakxa ekmaso mansexta apxámokma apagko' ma'a élásekhayókxa nak. ¡Keñe kaxwo' ekmako makham ko'o hey'óta'! Ko'o sekxeyenma xa, sektáha nak Wesse'.

Jeremías 3:13

Eyke kay'ásegwakxoho aqsa m'a ektémakxa ekmaso, tén han énmexeykekxo m'a Dios Wesse' agkok; ekweynchámeykencha'a chá'a ektegyeykencha'a énxet apkeleñama mók nekha yaqwayam kagkések ekyókxa, m'a kóneg nak yenta'a élyentaxno pessesse agkok, tén han megkalyeheykekxo m'a séltémókxa nak katnehek. Ko'o sekxeyenma xa, sektáha nak Wesse'.”

Jeremías 3:21

“Legáxcheyk élpayheykha kélatña'ák ma'a néten egkexe ekyamáyekxa nak exma: ¡israelitas ma'a apkellekxagweyncha'a nak, apkeltamho nak kalepyóshok kóllano'! Apkelyetnakhágweykmek apkelyetlo ámay ekpéwomo, megkalxeyenmak apkelwáxok ko'o, sektáha nak Dios Wesse' apagkok.

Jeremías 3:9

Yahamók agko' axta nahan élane, kenyetséssegkek axta m'a apchókxa. Eyenseykmek axta ko'o sétleykha élpeykessamo m'a meteymog kéleykmassáseykha, tén han ma'a yenta'a nak.

Jeremías 7:29

¡Énxet'ák Jerusalén, kólyaqtén kélwa', keñe sa' kólchexa'! ¡Kólmeneykmés sa' negmeneykmasso senlapwayam ma'a néten nak xóp eyáxñeyo meykexa nak xama aqsok! Hakte apkeltaqnaweygkek Wesse' egegkok ma'a énxet'ák kélagkok nak, apkexakke', apkelyetnakhássek nahan.

Ezequiel 16:16

Teméssessegkek axta kélpeykessamókxa aqsok kéláyókxa élnaqta m'a néten egkexe nak, cham'a ekyamasmakxa axta chá'a ekyókxa m'a.

Ezequiel 20:28

Xama axta séltémo ko'o kólántexek ma'a xapop séltennassamakxa axta ekmámnaqsoho agko' agkések, yohók axta kéltáha kélseykekxexa chá'a aqsok kélnapma kélwet'a m'a egkexe netno nak tén han ma'a yámet ekxámokma nak áwa', kéllánegweykekxeyk axta nahan chá'a aqsok kélmésso naqsa kélagkok sektaqnagkamo ahagko' nak ko'o m'a; kélnegkenweykekxeyk axta chá'a m'a aqsok ekmátsa nak ekpaqneyam, kélyegkenweykekxeyk axta nahan chá'a m'a anmen yámet égmenek kélmésso naqsa kélagkok nak.

Oseas 2:5

Keláneyak axta ekmaso ektémakxa megkamasexta m'a egken nak, massegkek axta ekteme meyke ektémakxa', ektéma axta ekpeywa s'e: ‘Ategyaha sa' ko'o sélpathetéyak, segkésso nak chá'a sekto, tén han ma'a yegmen, tén han nepkések apwa', tén han apáwa apkeláxñeyo nak, tén han pexmok égmenek, tén han ma'a sekya.’

Deuteronomio 12:2

“Kólmasséssem sa' ekyókxoho apheykegkaxa nak chá'a elpeykeshok aqsok apcháyókxa énxet ma'a xapop yaqwánxa sa' chá'a kólmok: cham'a ekhéyak nak néten egkexe tén han ma'a egkexe náxap'awo nak tén han ma'a ekhéyak nak kóneg yenta'a élyentaxno pessesse agkok.