Éxodo 12:11 - Biblia Enxet

¹¹ Kólántaxnekxa sa' kélántaxno, kólatchásekxa sa' kélatchesso kélmagkok, ekyetlómo kélméyak kélmék ma'a yámet kéltasqapeykha, kóltawák sa' ekpekhe m'a aqsok kéltósso ápetek, hakte cháxa mólwagqayam ektámaxche Wesse' egegkok ekhem apagkok Pascua xa.

Éxodo 12:11 Iomraidhean Croise

2 Reyes 23:21

Apkeltamhók axta wesse' apwányam elanagkok ekhem melwagqayam Pascua apyókxoho énxet'ák ekxeyenweykekxoho apkelwáxok ma'a Dios Wesse' apagkok, ekhawo ektémakxa nak eknaqtáxésamaxche m'a weykcha'áhak ekhémo mók nélpaqhetchásamáxkoho.

Éxodo 12:13

“Éma sa' eyke kéxegke kólmaha kólqahasagkok ma'a tegma kélhágkaxa enxoho. Tén sa' sélnapa enxoho ko'o m'a egipcios, megkóletsephek sa' kélxama kéxegke, hakte ótak sa' chá'a m'a éma, tén sa' ayeykhak aqsa chá'a.

Éxodo 12:21

Tén axta Moisés apkeltamho kólnaqlósawakxések ma'a apyókxoho apkelámha apmonye'e israelitas. Aptáhak axta apkeláneya s'e: “Kólxeg, kóltegyesha sa' chá'a xama nepkések apketkok essenhan xama yát'ay apketkok kélhawóxama, kólnáhap sa' nahan yaqwayam kóllának ektámaxche megkólwagqayam ekhem yaqwánxa sa' elyeykhagkok aqsa kélxanák ma'a Dios apkelásenneykha tekyawa yapmeyk, éltamhomaxchexa nak Pascua.

Éxodo 12:27

Sa' kóltéhek kólátegmowagkokxak kéxegke s'e: ‘Keso aqsok kéltósso ekmatñà ekhem mólwagqayam Pascua, eñama m'a Wesse' egegkok. Hakte cham'a apkelnapa axta egipcios, apkelyeykhágkek axta aqsa chá'a apxanák ma'a israelitas apheykha axta m'a kañe' Egipto, keñe axta apkelweykmo negko'o teyp ma'a neghawóxama.’” Tén axta apkelháxahánto m'a israelitas apkelpeykásawo.

Éxodo 12:43

Aptáhak axta apkeláneya Wesse' egegkok Moisés tén han Aarón se'e: “Keso yaqwánxa katnehek segánamakxa agkok ekhem ektámáxchexa nak kéltósso ápetek ekhem Pascua s'e: Méko sa' xama énxet megkatnaha nak kélenyémeyo xamo' apwanchek etwok kéltósso ekmatñà ápetek,

Isaías 52:12

Megkólpekhesha sa' eyke kólántépok, megkólenyahagkek sa' nahan, hakte elanha sa' ma'a Wesse' Israel Dios apagkok nak.

Ezequiel 45:21

Kóleynhok sa' kéxegke kéllane kélessawássessamo ekhem Pascua m'a ekhem catorce apkemha apmonye' pelten nak, kóltawagkok sa' kelpasmaga meyke kempáseyak ekweykmoho siete ekhem.

Levítico 23:5

“Kalanaxchek sa' chá'a ekhem Pascua megkólwagqayam Wesse' egegkok, ekhem catorce, apkemha apmonye' pelten.

Números 28:16

“Kóllanaksek sa' chá'a megkólwagqayam Wesse' egegkok ekhem Pascua m'a ekhem catorce, apkemha apmonyel'a pelten ma'a apyeyam,

Números 9:1

Appaqhetchessek axta Wesse' egegkok Moisés yókxexma meykexa nak énxet Sinaí, ektáha axta xama apyeyam apkelánteyapma israelitas ma'a Egipto, eyeynókxa axta apxegeykekxa makham apkemha apmonye' pelten pók apyeyam. Aptáhak axta apcháneya s'e:

Deuteronomio 16:1

“Wákxeyk sa' agkok chá'a m'a pelten Abib, kóllána sa' chá'a m'a élánamáxchexa nak chá'a megkólwagqayam Pascua eñama m'a Wesse' kélagkok, hakte cháxa pelten, apkelántekkessamakxa axta kéxegke Dios Wesse' kélagkok axta'a m'a Egipto.

Josué 5:10

Apkelpakxenwokmek axta énxet'ák Israel ma'a yókxexma Guilgal, taxnakmók axta apkelánegko m'a ekhem melwagqayam kéltéma nak Pascua, cham'a ekhem catorce, pelten nak. Axta payhók ma'a ekpayhegweykenxa nak xapop ma'a Jericó.