Exodo 3:8 - Ãcõrẽ Bed̶ea

⁸ Maʌ̃ bẽrã mʌ̃a ãdjirãra egiptorã jʌwaed̶a panʌnebemada ẽdrʌ b̶ʌi carea ze b̶ʌa. Egipto druad̶ebemada ẽdrʌ b̶ʌped̶a mʌ̃a dewara druad̶aa edeya. Maʌ̃ druara bio bia b̶ʌa idjab̶a waib̶ʌa b̶ʌa. Maʌ̃ druad̶e baridua ne uped̶ad̶ara bia zaubaria. Mama cananeorãda, hititarãda, amorreorãda, perezeorãda, heveorãda, idjab̶a jebuseorã sid̶a duanʌa.

Exodo 3:8 Iomraidhean Croise

Genesi 11:5

Ẽberãrãba puru idjab̶a de ʌ̃tʌ drasoga b̶ʌ o panʌra Ãcõrẽba bajãneba acʌd̶e zesia.

Genesi 11:7

Biara b̶ʌa dadjira wãnaped̶a ãdji bed̶eara quĩrãtanoa bed̶eabid̶ida ara ãdub̶a cawa ũrĩnaẽ́ duanenamãrẽã.–

Genesi 15:13

Mãwã b̶ʌd̶e Ãcõrẽba Abraʌ̃a jarasia: –Bʌra drõã b̶ed̶acarea necai waraga jaid̶aped̶a tʌb̶arid̶ia. Baribʌrʌ cawa b̶adua bʌd̶eba yõi purura djãrã druad̶e b̶aida. Maʌ̃ druad̶ebemarãba ãdjirãra nezocarãda b̶ʌd̶aped̶a cuatrociento poa bia mĩga eropanania. Baribʌrʌ ãdjirã biẽ́ o panʌra mʌ̃a biẽ́ b̶ʌya. Maʌ̃be bʌd̶eba yõi purura mamaʌba ne bara ẽdrʌya.

Genesi 18:21

Maʌ̃ bẽrã mʌ̃ra ed̶aa wãya ãdjirãba wãrãda jũmawãyã cadjiruada o panʌ cawaya.–

Genesi 43:11

Maʌ̃ne dji zeza Israelba panusia: –Wãrãda Benjamiʌ̃da eded̶ida panʌbʌrʌ, nãwã od̶adua. Dadjirã ẽjũãnebema ne biara b̶eada bãrã sacod̶e b̶ʌd̶aped̶a maʌ̃ ẽberãa diad̶e wãnadua. Balsamo nẽãrãda, urrajõda, mirra querada, dewara quera tũãpa b̶eada, pistacho bacuru tada, almendra sid̶a maãrĩ diad̶adua.

Genesi 46:4

Mʌ̃ra bʌ ume Egiptod̶aa wãya. Maʌ̃be bʌd̶eba yõbʌdarãra jẽda eneya. Idjab̶a bʌ beubʌrʌd̶e Josera arima b̶aya.–

Genesi 50:24

Ewari ab̶a Joseba idji djabarãa jarasia: –Mʌ̃ra dãrãẽ́ne beuya, baribʌrʌ Ãcõrẽba bãrãra carebaya. Idjia bãrãra, bãrãneba yõbʌdarã sid̶a naʌ̃ druad̶eba Canaaʌ̃ druad̶aa edeya. Maʌ̃ druara idjia Abrahaʌ̃a, Isaa, Jacoboa bid̶a wãrãneba diai jarasia.–

Exodo 12:41

Maʌ̃ cuatrociento treinta poa daucha jũẽsid̶e israelerãra Ãcõrẽ sordaorã quĩrãca Egipto druad̶eba jũma ẽdrʌsid̶aa.

Exodo 12:51

Ara maʌ̃ ewarid̶e Ãcõrẽba israelerãra Egiptod̶eba jũma ẽdrʌ edesia sordaorã djõne wãbada quĩrãca.

Exodo 13:5

Ãcõrẽba bãrãra Canaaʌ̃ druad̶aa edeya. Maʌ̃ druad̶e baridua ne uped̶ad̶ara bia zaubaria. Mama cananeorãda, hititarãda, amorreorãda, heveorãda, idjab̶a jebuseorã sid̶a duanʌa. Baribʌrʌ Ãcõrẽba bãrã drõã naẽnabemarãa wãrãneba jarasia maʌ̃ druara bãrãa diaida. Jãma jũẽped̶ad̶acarea poaza naʌ̃ jed̶ecod̶e bãrãba naʌ̃ quĩrãca od̶ida panʌa bãrã Egiptod̶eba ẽdrʌped̶ad̶a ewarida quĩrãnebad̶i carea.

Exodo 3:17

Idjia bãrãra Egiptod̶e bia mĩga panʌda ẽdrʌ b̶ʌped̶a dewara druad̶aa edeyad̶a asia. Maʌ̃ druad̶e baridua ne uped̶ad̶ara bia zaubaria. Mama cananeorãda, hititarãda, amorreorãda, perezeorãda, heveorãda, idjab̶a jebuseorã sid̶a duanʌa.”

Exodo 34:11

Jũma mʌ̃a id̶i jara b̶ʌra ĩjã od̶adua. Maʌ̃ne bãrã quĩrãpita mʌ̃a amorreorãda, cananeorãda, hititarãda, perezeorãda, heveorãda, jebuseorã sid̶a jũma ãyã jʌrecuaya.

Exodo 5:23

Mʌ̃a Egiptod̶ebema boro ume bʌ trʌ̃neba bed̶ead̶amĩna, maʌ̃ ewarid̶eba idjia Israel purura wetara biẽ́ o b̶ʌa. Maʌ̃ awara bʌa ẽdrʌ b̶ʌyad̶a ad̶ara wad̶ibid̶a oẽ́ b̶ʌa.–

Numero 13:18

Acʌd̶adua maʌ̃ druara sãwã b̶ʌda idjab̶a maʌ̃ druad̶ebemarãra sãwã b̶eada; mẽsrã b̶eada wa mẽsrãẽ́ b̶eada; zocãrã panʌda wa zocãrãẽ́ panʌda.

Numero 13:19

Acʌd̶adua ãdji druara sãwã b̶ʌda; bia b̶ʌda wa biẽ́ b̶ʌda. Idjab̶a acʌd̶adua ãdji purura sãwã b̶eada; mõgaraba aud̶u jũrã ca b̶eada wa ara jãwã b̶eada.

Numero 13:27

Ãdjirãba Moisea nãwã nẽbʌrʌsid̶aa: –Bʌa wãbid̶a druad̶e dairãra jũẽsid̶aa. Wãrãda maʌ̃ druad̶e baridua ne uped̶ad̶ara bia zaubaria. Maʌ̃ druad̶ebema nejõda acʌdua.

Juaʌ̃ 3:13

Ni ab̶aʌda bajãnaa wãnacaa maʌ̃ cawai carea. Ab̶abe mʌ̃, Naʌ̃ Djara Edad̶aba maʌ̃ra cawa b̶ʌa, bajãneba zed̶a bẽrã.

Juaʌ̃ 6:38

Mʌ̃ra bajãneba zeẽ́ b̶ʌa mʌ̃a quĩrĩã b̶ʌda oi carea. Ãtebʌrʌ zesia mʌ̃ Diabued̶aba quĩrĩã b̶ʌda oi carea.

Josue 5:6

Ãcõrẽba ãdjirãa nãwã jarasia: “Mʌ̃a bãrã drõã naẽnabemarãa wãrãneba jarasia Canaaʌ̃ druada diaida. Maʌ̃ druad̶e baridua ne uped̶ad̶ara bia zaubaria.” Baribʌrʌ Ãcõrẽba jarad̶ara ãdjirãba ĩjã od̶aẽ́ basía. Maʌ̃ carea idjia wãrãneba jarasia ãdjirãba maʌ̃ ẽjũãra edad̶aẽ́da. Mãwã jarad̶a bẽrã ãdjirãra cuarenta poa ẽjũã põãsa ewaraga b̶ʌd̶e pʌrrʌa nĩbabadjid̶aa. Mãwã nĩnane jũma dji mẽsrã b̶ea Egiptod̶eba ẽdrʌped̶ad̶ara quinisid̶aa.

Josue 9:1

Maʌ̃ ewarid̶e hititarãda, amorreorãda, cananeorãda, perezeorãda, heveorãda, jebuseorã sid̶a Canaaʌ̃ druad̶e panabadjid̶aa. Jordaʌ̃ dod̶eba ʌ̃mãdau b̶aebariare jewed̶ad̶e, eyad̶e bid̶a ʌ̃cʌrʌ panabadjid̶aa, idjab̶a jũma Mediterraneo pusa orroare ʌ̃cʌrʌ panabadjid̶aa ab̶a Libanonaa. Ãdji bororãba ũrĩsid̶aa israelerãba Jericora, Hai sid̶a poyasid̶ada.

Josue 9:7

Maʌ̃ne israelerãba nãwã jarasid̶aa: –Ãĩbẽrã bãrãra dairã caita panʌda jãwã panʌsicada. Mãwãra ¿sãwã bãrã ume bed̶ea b̶ʌd̶i?–