१ टीमोठी 3:7 - पुर्वीय मगर

⁷ होटबाटै होसे भर्मी मण्‍डली भीत्री मट्‍टै होइन, बाहीरुङ अरु भर्मीकुङ म्‍याहासाङ र असल ठहरीस्‍च छान्‍की पर्‌ले। होसकी नभा च भर्मीकै निन्‍दा जाट्‍ले र होसे शैतानौ पासोवाङ पर्‌ले।

१ टीमोठी 3:7 Iomraidhean Croise

मर्कूस 4:11

येशूये होखुरीककी डेया, “परमेश्‍वरौ राज्‍यौ रहस्‍य नाखुरीककी याम्‍हने, टर ङा विश्‍वास माजाट्‍च भर्मीकोलाक च पट्‍ट न कुरा उदाहरणाङ न डेले।

प्रेरित 10:22

होखुरीकै डेया, “काट जना कप्‍तान कर्नेलियसै कानकी बीर्‌न्‍हकाच हो। आसको इमान्‍डारी र परमेश्‍वर खाटा बीर्‍हीछ भर्मी ले। आसकोकी पट्‍ट यहूदी जातिकै र आदर जाट्‍ले। नाकोकी आसकुङ इमाङ आर्‌घार नाकोलकीङ सन्‍देश सेकी डेम काट पवित्र स्‍वर्गदूतै आसकोकी आज्ञा याम्‍हने।”

प्रेरित 22:12

“होसे सहराङ हननीया डेच काट जना भर्मी ङुमन्‍या। होसे परमेश्‍वरौ भक्‍ट र मोशौ व्‍यवस्‍था सेम्‍ह मन्‍डीच भर्मी लेया र दमस्‍कसाङ लेच पट्‍ट यहूदीकै होसेकी मान जाट्‍नन्‍या।

प्रेरित 6:3

होटबाटै भाइको, नाखुरीक लकीङ पवित्र आत्‍मा र बुद्धिये न्‍हेप्‍च र पट्‍ट लकीङ आदर डुप्‍च साट जना लेन्‍जा भर्मी भाक्‍नी अनी होखुरीककी न कानै इसे कामौ जीम्‍मा येहीङ।

१ ठेसलोनीकी 4:12

होट छान्‍नाङ नाखुरीककी अरु विश्‍वास माजाट्‍च भर्मीकै र नाखुरीककी आदर जाट्‍ले, र नाखुरीककी खाँचो पर्‌नाङ अरुखाटा भर पर्‌की र मापर्‌ले।

१ ठेसलोनीकी 5:22

पट्‍ट खालुङ मासेछ दुष्‍ट कुराको लकीङ लोस ङुनी।

१ टीमोठी 3:6

होसे चाम-चाम विश्‍वास जाट्‍च नयाँ भर्मी र छान्‍की माछान्‍ले, नभा च होसे घमन्‍डै सोक्‍ले र शैतानै डुप्‍च दण्‍ड होचे र डुप्‍ले।

१ टीमोठी 5:14

होटबाटै ङा आर्‌नाम बीढुवाकोलाक चहीँ फेरी ब्‍याहा अट जाटै डेच सल्‍लाह याल्‍हे। अनी होखुरीकै मीजाको डीन्‍ख्‍यो अनी इमुङ व्‍यवहारको सय्‍हारीख्‍यौ। होटजाटा डेनाङ कानकी शैतानै कानुङ बडनाम जाट्‍च मौका माडुप्‍ले।

१ टीमोठी 6:9

टर धनि छान्‍च मीमन जाट्‍च भर्मीको चहीँ परिक्षाङ फसडीस्‍ले। होखुरीक मुर्‌ख र हानी जाट्‍च इच्‍छाकुङ पासोवाङ पर्‌ले। अनी होसे खराब इच्‍छाकै जाट्‍नाङ होसकी बीर्‍हीमसेच नास छान्‍च ठावाङ टाहाक्‍ले।

२ टीमोठी 2:26

इटजाट्‍न होखुरीक लाहा होसाङ राहार शैतानौ फन्‍डालकीङ भीस्‍की डुप्‍ले हीजैडेनाङ होखुरीककी शैतानै लहो कामौ लागी घोवार डामने।

टीटस 2:5

र होखुरीकै लहे लाहाकी न अढीनाङ डाकी, शुद्ध मीमन खास्‍की, दयालु, सेछ घरजम जाट्‍की र लेन्‍जाकुङ अढीनाङ ङुकी डेम पाहाक्‍ख्‍यौ। इडीक होखुरीकै होट जाटा डेनाङ परमेश्‍वरौ बडनाम माछान्‍ले।

टीटस 2:8

बलीयो शिक्षा पाहाक्‍नी टा की सुयेर होसे शिक्षा चेकी माय्‍होक्‍ख्‍यौ। अनी कानुङ विरुधाङ सट्‍रुकै हीर खराब कुरा माडुपार मेखुरीक न कारामसेकी पर्‌ले।

३ युहन्‍ना 1:12

डेमेत्रियसौ बारेयाङ च पट्‍टकै सेम्‍ह डेले र सत्‍य मेल्‍है र इसे गबाही याल्‍हे। कानै र होच्‍यो बारेयाङ सेछ डेले। नाखुरीककी थाहा न ले, कानुङ गबाही साँचो ले।