مَرقُس 9:32 - کتاب مقدس به زبان مازندرانی - گویش شرقی

³² شاگِردون وه منظورِ نِفَهمِسِنه و تَرسینه وه جِم سِئال هاکانِن.

گیله ماز

³² شاگِردان اونه مَنظورِ نِفَهمِسَّن و تَرسِنه بان اونه جی سوال هَکُنَن.

کتاب مقدس به زبان مازندرانی - گویش غربی

³² شاگِردِن وی مَنظورِ نِفَهمِسِنِه و تَرسینِه ویجا سوال هاکِنِن.

مَرقُس 9:32 Iomraidhean Croise

مَرقُس 16:14

وَختی که اون یازده شاگرد سِفرهِ سَر نیشته بینه، عیسی وِشونِ ظاهر بَییه، عیسی وِشونِ، بی‌ایمونی و سَنگ دِلیِ وِسه سَراکو هاکارده، چوون وِشونِ گَبِ، که وه ره بَعد از زنده بَیِّن بَدی بینه ره باوِر نَکاردِنه.

مَرقُس 7:18

عیسی وِشونِ بااوته: «شِما هم نِفَهمِنِنی؟ مگه نَدوندِنی اونچی که بیرونِ جِم آدِمیِ وجودِ دِله اِنه، نَتونده وه ره نَجس هاکانه؟

مَرقُس 8:33

ولی عیسی بَردَگِردِسه، شه شاگِردونِ هارِشیه و پِطرُسِ تَشِر بَزوئه و بااوته: «ای شیطان! مِ جِم دور بَواش، چوون تِ فکر و خیال، آدِمیِ جِم هَسه، نا خِدائه جِم.»

مَرقُس 9:10

وِشون این جَریانِ شه پَلی داشتِنه، ولی هَمدییهِ جِم پِرسینه: «مِرده هائه جِم زنده بَیِّن» یعنی چی.

لوقا 18:34

شاگِردون وه گَبِ نِفَهمِسِنه. وه گَبِ مَعنی وِشونِ جِم پِنهون بییه و نِفَهمِسِنه چیِ خَوِری گَب زَنده.

لوقا 2:50

ولی وِشون اونچی که عیسی وِشونِ بااوته بییه ره نِفَهمِسِنه.

لوقا 24:45

بعد، وِشونِ فِکرِ واز هاکارده تا بَتونِن مِقدَّسِ نوشته ها ره بِفَهمِن.

لوقا 9:45

ولی وِشون وه منظورِ نِفَهمِسِنه؛ چوون وِشونِ جِم مَخفی بَمونِسه بییه تا اونِ نِفَهمِن؛ و تَرسینه اینِ خَوِری هم وه جِم سِئال هاکانِن.

اِنجیلِ یوحنا 12:16

وه شاگِردون اَوِّل این چیا ره نِفَهمِسِنه، ولی وَختی عیسی بَعد از بَمِردِن اَی دِواره زِنده بَییه، شه یاد بیاردِنه که اینا همه مِقَدَّسِ بَنوِشته هائه دِله وه خَوِری بَنوِشته بَییه بییه و هَمون‌طی هم بَییه.

اِنجیلِ یوحنا 16:19

عیسی دونِسه که خوانِنه وه جِم سِئال هاکانِن؛ پَس وِشونِ بااوته: « اینِ وِسه هَمدییهِ هِمراه بَحث کاندینی که بااوتِمه، ”اَت کم دییه، دییه مِ ره نَویندِنی، ولی اَت کم دییه، اَی دِواره مِ ره ویندِنی“؟

اِنجیلِ یوحنا 4:27

هَمون مووقه، عیسیِ شاگِردون، بَردَگِردِسِنه. وِشون تَعجِّب هاکاردِنه که عیسی یِتا زِنائه هِمراه دَره گَب زَنده. ولی هیچ کِدوم نَپِرسیه «چی خوانی؟» یا «چه وه هِمراه گَب زَندی؟»