اِنجیلِ مَتّی 5:22 - کتاب مقدس به زبان مازندرانی - گویش شرقی

²² ولی مِن شِما ره گامبه: هَر کی شه بِرارِ وِسه خَشم بَیرِه، مجازات بونه و هر کی شه بِرارِ توهین هاکانه، وه ره مَحکَمه کَشِنِنه و اَگه وه ره باره بی عَقل، جَهَنِمِ تَشِ مِستَحَق بونه.

گیله ماز

²² وَلی مَن شِمِره گونَم هَر کی خودشه اَداشِ سَر خَشم هَگیرِه، مُجازات بونه و هر کی خودشه اَداشِ توهین هَکونه اونه مَحکَمِه کِشاندِنَن و اَگِه اونه باگو بی عَقل جَهَنَمِ تَشِ مُستَحَق بونه.

کتاب مقدس به زبان مازندرانی - گویش غربی

²² ولی مِن شِمارِ گِمِه هر کی شی بِراری سِه خَشم بَیرِه مِجازات وونِه، و هر کی شی بِرارِ توهین هاکِنِه وِرِه مَحکَمِه کَشانِنِه و اگه وِرِه بُئِه بی عَقل، جَهِنِمی تَشی مِستَحَق وونِه.

اِنجیلِ مَتّی 5:22 Iomraidhean Croise

اِنجیلِ مَتّی 10:17

شِمه حِواس، مَردِمِ بوئه، چوون وِشون شِما ره مَحکَمِه تَحویل دِنِنه و شِما ره شه عِبادَتگاهِ دِله فَلِک وَندِنه و شِلاق زَندِنه

اِنجیلِ مَتّی 10:28

اونایی جِم که تَنِ کُشِنِنه ولی نَتوندِنه روحِ بَکوشِن نَتِرسین. اونی جِم بَتِرسین كه بَتونه تَن و روح، هر دِتا ره جَهَنِمِ دِله هِلاک هاکانه.

اِنجیلِ مَتّی 12:24

ولی وَختی عُلِمائه فَریسی اینِ بِشنُسِنه بااوتِنه: «این مَردی دِوها ره بِعِلزِبولِ کُمِکِ هِمراه که دِوهائه رَئیسِ بیرون کانده.»

اِنجیلِ مَتّی 17:5

هَمتی پِطرسِ گَب تِموم نَییه بییه، یِتا پِر نورِ اَبر وِشونِ سَرِ ور سایه دِم هِدا و یِتا صِدا اَبرِ جِم بِشنُسه بَییه که گاته: «این مِ عَزیزِ ریکائه که وه جِم راضیمه، وهِ گَبِ گوش هاکانین.»

اِنجیلِ مَتّی 18:21

بعد پِطرس عیسی پَلی بییَمو و وه جِم بَپِرسیه: «آقا، بِراری که مِ ره بَدی کانده ره چَن کَش وِنه بِبَخشِم؟ هَفت کَش؟»

اِنجیلِ مَتّی 18:35

هَمین طی هم مِ پییِر که آسِمونِ دِله دَره این بِلا ره شِمه سَر یارنه، اَگه شِما هم شه بِرارِ دِلِ جِم نِبَخشین.

اِنجیلِ مَتّی 23:15

«وای به حال شِما اِی توراتِ مَلِّمون و عُلِمائه فَریسی دِرو! شِما دریا و خِشکیِ جِم گُذر کاندینی تا کِسی ره پی دا هاکانین که شِمه دینِ قَبول هاکانه. وَختی هم موَفَق بَینی، وه ره دِ بِرابَر شه جِم بَدتِر، جَهَنِّمی ریکا سازِنِنی.

اِنجیلِ مَتّی 23:33

اِی مَرها، اِی اَفعی زادوا! چی طی جَهَنِّمِ مِجازاتِ جِم دَر شونِنی؟

اِنجیلِ مَتّی 25:41

«اون وَخت اونایی که وه چَپِ وَر دَرِنه ره گانه: ”اِی مَلعونون، مِ جِم دور بَووین و اَبدیِ تَشِ دِله که اِبلیس و وه فِرِشته هائه وِسه آماده بَییه بُورین

اِنجیلِ مَتّی 26:59

گَت گَتِ کاهِنون و تِمومِ شورا تَقِلّا کاردِنه عَلیه عیسی دِراغی گِواهی پی دا هاکانِن تا وه ره بَکوشِن.

اِنجیلِ مَتّی 3:17

بعد یِتا صدا آسِمونِ جِم بِشنُسه بَییه كه گاته: «این مِ جانِ ریکائه كه وه جِم خِشالمِه.»

اِنجیلِ مَتّی 5:34

ولی مِن شِما ره گامبه اَصلِاً قَسِم نَخُرین، نا آسِمونِ چوون خِدائه تَختِ،

اِنجیلِ مَتّی 5:44

ولی مِن شِما ره گامبه شه دِشمِنونِ دوس دارین و اونایی که شِما ره ظِلم رِسِندِنه، وِشونِ وِسه دِعائه خِیر هاکانین.

مَرقُس 14:55

گَت گَتِ کاهِنون و تِمومِ اَهلِ شورا اینِ دِمبال دَینه که یِتا شِهادت عیسیِ علیه پی دا هاکانِن تا وه ره کُشتن هادن، ولی هیچی پی دا نَکاردِنه.

مَرقُس 15:1

زودِ صِواحی، دَرجا، مَعبِدِ گَت گَتِ کاهِنون، مَشایخ و توراتِ مَلِّمون و تِمومِ یَهودِ شورا یه جا جَمع بَینه و هَمدییهِ هِمراه مَشورت هاکاردِنه. وِشون عیسی ره دَس دَوِسه بَوِردِنه و پیلاتُسِ رومی فرموندارِ تَحویل هِدانه.

لوقا 12:5

ولی شِما ره هِشدار دِمبه وِنه کِنه جِم بَتِرسین: وه جِم بَتِرسین که بَعدِ از اون که بَکوشته، اِقتدار دارنه جَهَنِمِ دِله دم هاده. اَره، شِما ره گامبه وه جِم بَتِرسین.

لوقا 22:66

وَختی هِوا رووشِن بَییه، قومِ مشایخِ شورا، یعنی گَت گَتِ کاهِنون و توراتِ مَلِّمون، هَمدییه هِمراه جَلِسه بَییتِنه و عیسی ره شورائه پَلی بیاردِنه.

اِنجیلِ یوحنا 11:47

پَس مَعبِدِ گَت گَتِ کاهِنون و عُلِمائه فِرقه فریسی جَلِسه بَییتِنه، بااوتِنه: «چی هاکانیم؟ این مَردی دَره خَله نشونه و معجزه کانده.

اِنجیلِ یوحنا 15:25

ولی کِلامی که وِشونِ توراتِ دِله بییَمو وِنه حییقِت بَرِسه که گانه: ” وِشون بی‌ دلیل مِ جِم بیزار بینه.“

اِنجیلِ یوحنا 7:20

جَمیِّت جِواب هِدانه: «تِ دِوو دارنی! کی تِ بَکوشتِنِ دِمبال دَره؟»

اِنجیلِ یوحنا 8:48

یَهودیون وه جِواب بااوتِنه: «مگه دِرِس نااوتیمی که سامری هسی و دِو دارنی؟»

اعمال رَسولان 17:18

رَواقی و اپیکوریِ فیلسوفونِ جِم بعضیا هم وه هِمراه بحث کاردِنه. وِشونِ جِم بعضیا گاتِنه: «این مِفتِ گَب زَن چی خوانه باره؟» بَقیه گاتِنه: «انگاری غَریبِ خِدایونِ تبلیغ کانده.» چوون پولُس، عیسی و مِرده هائه زِنده بَیِّنِ خَوِری وِشونِ وِسه گَب زوئه.

اعمال رَسولان 22:30

فِردائه اون روز، وَختی فَرمونده خواسه دقّتِ هِمراه بِفَهمه که چه یَهودیون پولُسِ مِتّهم هاکاردِنه، وه ره زِندونِ جِم آزاد هاکارده و دَستور هِدا گَت گَتِ کاهِنون و تِمومِ یَهودِ شورائه اعضا جَمع بَووِن. بعد، پولُسِ جِر بیارده تا وِشونِ روب رو حاضر بَووه.

اعمال رَسولان 23:1

پولُس شورائه اعضا ره هارِشیه و بااوته: «بِرارون، مِن تا اَمروز پاکِ وِجدانِ هِمراه خِدائه حِضور زندگی هاکاردِمه.»

اعمال رَسولان 24:20

و یا اینکه اونایی که اینجه دَرِنه، بارِن وَختی شورائه پلی اِیست هاکارده بیمه، مِ دِله چه جرمی پی دا هاکاردِنه،

اعمال رَسولان 4:15

پَس دَستور هِدانه که مَجلسِ جِم بیرون بورِن و شه هَمدییهِ هِمراه مَشورت هاکاردِنه.

اعمال رَسولان 5:21

پَس صِواحی طِبق اونچی که وِشونِ بااوته بَییه بییه مَعبِد بُوردِنه و مَردِمِ تَعلیم هِدانه. وَختی کاهِنِ اَعظِم و اونایی که وه هِمراه دَینه، بییَمونه، تِمومِ شورا و تِمومِ یَهودِ قومِ مشایخِ شه پَلی صدا هاکاردِنه و کِسایی ره بَفرِسینه تا رَسولونِ زِندونِ جِم بیارِن.

اعمال رَسولان 5:27

وَختی رَسولونِ بیاردِنه، وِشونِ شورائه پَلی هِرِسانینه. بعد کاهِنِ اَعظِم وِشونِ جِم بَپِرسیه:

اعمال رَسولان 6:12

وِشون مَردِم و مشایخ و توراتِ مَلّمونِ، استیفانِ علیه پِر هاکاردِنه و اونا استیفانِ سَر دَکِتِنه، وه ره بییتِنه و شورائه پَلی بَوِردِنه.

اعمال رَسولان 6:15

هَمون مووقه، تِمومِ اونایی که شورائه دِله نیشته بینه اِستیفانِ زِل بَزو بینه و بَدینه که استیفانِ دیم یِتا فِرشتهِ دیمِ واری بَییه.

اعمال رَسولان 7:37

«همین موسی، یَعقوبِ نَسلِ بااوته: ”خِدا شِمه بِرارونِ دِله، یِتا پیغَمبِر مِ واری شِمه وسه فِرِسِندِنه.“

رومی ایشون 12:10

بِرارِ واری، هَمدییه ره دوس دارین. اِحترام بییِشتِنِ دِله، هَمدییهِ جِم پیش دَکِفین.

اوّلین نامِه قُرنتیانی سِه 6:10

نا دِزا، نا حَریصون، نا عَرِق خوارون، نا کِسایی که فحش دِنِنه و نا حیله گرون، خِدائه پادشاهیِ وارث نَوونِنه.

اوّلین نامِه قُرنتیانی سِه 6:6

ولی بِرار، بِرارِ علیه مَحکمه شونه، اونِم بی‌ایمونونِ پَلی؟

اوّل تِسالونیکیان 4:6

تا هیچ‌کس این جَریانِ دِله شه بِرارِ حَق، خِطا یا سوء استفاده نَکِنه. چوون خِداوند تِمومِ این چیائه وِسه تقاص گِرنه، هَمون طی که اِما قبلتر شِما ره بااوتیمی و جِدی هِشدار هِدامی.

تیتوس 3:2

هیچ کسِ بَد نارِن، دَعوا نَکِنِن و آرووم بوئن و تِمومِ مَردِمِ هِمراه اَدِبِ هِمراه رِفتار هاکانِن.

نامِه مَسیحینی عبرانی نِژادی سِه 12:25

شِمه حِواس دَووه، اون کسِ صِدائه جِم که گَب زَنده، شه دیمِ بَرنِگاردِنین. اونایی که، اون کسِ گَب هائه بِشنُسَنِ جِم که زِمینِ سَر گَب زوئه شه دیمِ بَردِگاردِنینه، نَتونِسِنه مجازات بَیّنِ جِم دَر بورِن. پَس اَگه اِما اون کسِ جِم که آسمونِ جِم گَب زَنده شه دیمِ بَردِگاردِنیم، چی طی مجازاتِ جِم دَر بوریم؟!

نامِه مَسیحینی عبرانی نِژادی سِه 5:9

و اون مووقه که کامل بَییه، تِمومِ اونایی که وه جِم اِطاعت کاندِنهِ وِسه، اَبدی نِجاتِ سرچِشمه بَییه.

یعقوبِ نامه 2:20

ای نادون، خوانی بَدونی چه ایمون، بی اعمال بی‌ثَمِرِ؟

یعقوبِ نامه 3:6

زِوون هم تَشِ؛ یه دِنیا نادِرِسی، که اَمه تَنِ په دِله دَره و آدِمِ تِمومِ تَنِ کثیف کانده و تِمومِ وه زندگی ره تَش کَشِنه - تَشی که جَهنِّم اونِ رووشِن هاکارده!

اول پِطرُس 2:23

وَختی وه ره فحش هِدانه، فحشِ هِمراه جِواب نِدا؛ و اون مووقه که رَنج بَکِشیه، تَهدید نَکارده، بلکه شه ره خِدائه دس، که عادِلِ داوِرِ بِسپارِسه .

اول پِطرُس 3:9

بَدی ره بَدیِ هِمراه و فحشِ، فحشِ هِمراه جِواب نَدین، بلکه وه عَوِض، بَرکَت بَخواین، چوون اینِ وِسه دَعوِت بَینی تا برکت به دَس بیارین.

اوّل یوحنا 2:9

هر کی که گانه نورِ دِله دَره ولی شه بِرارِ جِم بیزارِ، هَمتی تاریکیِ دِله به سَر وَرنه.

اوّل یوحنا 3:10

خِدائه وَچون و اِبلیسِ وَچون این‌طی مَعلوم بونِنه: هر کی اونچی که دِرِسِ ره اِنجام نَدِنه، خِدائه جِم نییه و همین طی کِسی که شه بِرارِ دوس نِدارنه، خِدائه جِم نییه.

اوّل یوحنا 5:16

اگه یه نَفِر بَوینه وه بِرار گِناهی کانده که مَرگِ خَتم نَوونه، دعا هاکانه و خِدا وه ره زندگی دِنه. اینِ، اونی خَوِری گامبه که وه گِناه مَرگِ خَتم نَوونه. گِناهی دَره که مَرگِ خَتم بونه. مِن این طی گِناهِ خَوِری نارمه که وِنه دِعا هاکارد.

یهودائه نامه 1:9

ولی وَختی میکائیل، اون گَتِ فرشته، اون مووقه که اِبلیسِ هِمراه بحث کارده و موسیِ جِنازهِ خَوِری دَعوا کارده، شه ره اِجازه نِدا که وه محکومیتِ اِعلام هاکاردِنه مووقه وه ره توهین هاکانه، بلکه فِقَط بااوته: «خِداوند، تِ ره توبیخ هاکانه!»

یوحنایِ مکاشفه 20:14

و بعد مَرگ و مِرده هائه دِنیا تَشِ دریاچهِ دِله دِم هِدا بَینه. این تشِ دریاچه، دِوّمین مَرگِ.