لوقا 4:42 - کتاب مقدس به زبان مازندرانی - گویش شرقی

⁴² زودِ صِواحی، عیسی بیرون بییَمو و یتا خَلوِتِ جا بُورده. مَردِم وه دِمبال گِردِسِنه و وَختی وه پَلی بوردِنه، تَقِلّا هاکاردِنه نییِلِن وِشونِ ورِ جِم بُوره.

مازندرانی

⁴² سِوایی عیسی بورده اَتّا جای خلوِت. اما مردِم وِنه دِنبال گَردِسِّنه و وقتی به اونجه که وِه دَییه بَرِسینه، سعی هاکاردِنه نی‌یِلِن ویشون پَلی جه بوره.

گیله ماز

⁴² صُبِ سَر عیسی دِرگا بوما و ایتا خَلوَتِ جا بَشَه. ولی مَردُم اونه دُمّال گَردِنِه بان وختی به جائی که اون دَبا بَرِسییَن، تَقَلّا هَکُردَن نُذارَن اوشانه وَرِ جی بوشو.

کتاب مقدس به زبان مازندرانی - گویش غربی

⁴² صِبِ دَم، عیسی دیرگا بیمو و یَتِه خَلوَتِ جا بوردِه. مَردِن وی دِمال گِرِسِنِه وختی وی وَر بوردِنِه تَقَلّا هاکِردِنِه نِلِن وِشونی وَری جا بورِه.

لوقا 4:42 Iomraidhean Croise

مَرقُس 1:45

ولی اون مَردی بیرون بُورده، همه جا این جَریانِ گَبِ بَزو و اونِ خَوِرِ پَخش هاکارده. اینِ وِسه عیسی دییه نَتونِسه عَلِنی شَهرِ دِله بِیّه، بلکه شَهرِ بیرون، خلوتِ جائه دِله موندِسه. و مَردِم از همه جا عیسیِ پَلی اییَمونه.

لوقا 24:29

وِشون خَله اصرار هاکاردِنه و بااوتِنه: «اَمه هِمراه بَمون، چوون روز دَره تِموم بونه و نزیکِ شو بَووه.» پَس عیسی دِله بُورده تا وِشونِ پَلی بَمونه.

لوقا 6:12

یتا از اون روزا، عیسی دِعائه وِسه کوهِ سَر بُورده و شُو تا صِواحی خِدائه حِضور دِعا کارده.

اِنجیلِ یوحنا 4:34

عیسی وِشونِ بااوته: «مِ غِذا اینِ که شه بَفرِسیهِ اِراده ره به‌جا بیارِم و وه کارِ اِنجام هادِم.

اِنجیلِ یوحنا 4:40

وَختی اون سامریون عیسیِ پَلی بییَمونه، وه جِم بَخواسِنه وِشونِ پَلی بَمونه. پَس عیسی دِ روز اونجه بَمونِسه.

اِنجیلِ یوحنا 6:24

پَس وَختی جَمیِّت بِفَهمِسِنه که نا عیسی اونجه دره و نا وه شاگِردون، وِشون لَتکاها ره سِوار بَینه و عیسیِ پی دا هاکاردِنِ وِسه کَفَرناحوم بُوردِنه.