اعمال رَسولان 2:10 - کتاب مقدس به زبان مازندرانی - گویش شرقی

¹⁰ فْریجیه و پامفیلیه و مِصر و لیبیِ اون قسمت ها که قیرَوانِ وِسه بییه و رومی زائِرون

گیله ماز

¹⁰ فْریجیه و پامفیلیه و مصر و لیبی یه اون قسمتان که قیرَوانی جی با، وَ رُوم زائِران

کتاب مقدس به زبان مازندرانی - گویش غربی

¹⁰ فْریجیه و پامفیلیه و مصر و لیبی ای هون قِسمتا گه قیرَوانی سِه وِه، و رُومی زائِرِن

اعمال رَسولان 2:10 Iomraidhean Croise

اِنجیلِ مَتّی 2:15

و تا هیرودیسِ بَمِردِنِ مووقه، اونجه بَمونِسه. هَمون گَبی كه خِداوَند هوشَعِ پیغَمبِرِ زِوونِ جِم بااوته بییه، اِنجام بَرِسیه: «شه ریکا ره مِصرِ جِم شه پَلی صدا هاکاردِمه.»

اِنجیلِ مَتّی 23:15

«وای به حال شِما اِی توراتِ مَلِّمون و عُلِمائه فَریسی دِرو! شِما دریا و خِشکیِ جِم گُذر کاندینی تا کِسی ره پی دا هاکانین که شِمه دینِ قَبول هاکانه. وَختی هم موَفَق بَینی، وه ره دِ بِرابَر شه جِم بَدتِر، جَهَنِّمی ریکا سازِنِنی.

اِنجیلِ مَتّی 27:32

اون مووقه که بیرون شینه، یِتا مَردی که وه اسم شَمعون و قیرَوانِ جِم بییه ره بر بَخُردِنه و وه ره وادار هاکاردِنه عیسیِ صَلیبِ بَوِره.

مَرقُس 15:21

سربازون یه نَفِرِ که وه اسم شَمعون بییه و اونجه جِم دَییه رَد بونِسه ره مجبور هاکاردِنه عیسیِ صلیبِ دوش بَکِشه. وه اَهل قیرَوان بییه و اِسکندر و روفُسِ پییِر بییه. وه هَمون مووقه دَییه زِمینِ سَرِ جِم اییَمو.

اعمال رَسولان 11:20

ولی وِشونِ میون چَن نَفِر قبرس و قیرَوانِ آدِمونِ جِم دَینه، وِشون وَختی اَنطاکیه بَرِسینه، یونانیونِ هِمراه هم گَب بَزونه و عیسیِ خِداوندِ، خَوَرِ خِشِ وِشونِ هِدانه.

اعمال رَسولان 13:1

اَنطاکیهِ کلیسائه دِله پِیغَمبِرون و مَلِّمون دَینه: بَرنابا، شَمعونِ مَعروف به نیجِر، لوکیوسِ قیرَوانی، مَنائِن که هیرودیسِ حاکمِ ناتَنی بِرار بییه و شائول.

اعمال رَسولان 13:13

پولُس و وه هَمراهون دریائه راهِ جِم، از پافوس، پِرجه بوردِنه که پامفیلیهِ مَنطقهِ دِله بییه. ولی اونجه یوحنائه معروف به مرقس وِشونِ جِم سیوا بَییه و اورشَلیم بَردَگِردِسه.

اعمال رَسولان 13:43

بَعدِ از اینکه جَمیِّت، عِبادَتگاهِ جِم بوردِنه، یَته خَله یَهودیون و اون خداپَرِسِ مَردِم که یَهودی بَییه بینه، پولُس و بَرنابائه دِمبال راه دَکِتِنه. پولُس و بَرنابا این دَسهِ هِمراه گَب بَزونه و وِشونِ تَشویق کاردنه که خِدائه فِیضِ دِله اِدامه هادِن.

اعمال رَسولان 14:24

بعد پیسیدیهِ مَنطقهِ جِم بُگذِشتِنه و پامفیلیهِ مَنطقهِ دِله بُوردِنه،

اعمال رَسولان 15:38

ولی پولُس صِلاح نَدیئه کِسی که پامفیلیهِ دِله وِشونِ تینا بییِشته و شه هَمکاری ره اِدامه نِدائه ره شه هِمراه بَوِره.

اعمال رَسولان 16:6

بعد، وِشون فْریجیه و غَلاطیهِ مَنطقهِ سراسرِ چرخ بَزونه، چوون روح القُدُس وِشونِ از اینکه کِلامِ، آسیائه مَنطقهِ دِله بَرِسونِن مَنع هاکارده بییه.

اعمال رَسولان 17:21

تِمومِ آتِنیون و غریبه هایی که اونجه زندگی کاردِنه، کاری نِداشتنه به جِز این که شه وَختِ تازه عقایدِ گَب بَزوئِنِ سَر بییِلّن.

اعمال رَسولان 18:2

اونجه یِتا یَهودی مَردیِ هِمراه، که وه اسم آکیلا بییه آشنا بَییه. آکیلا، پونتوسِ مَنطقهِ جِم بییه. وه شه زنا پْریسکیلائه هِمراه تازه ایتالیائه جِم بییَمو بییه، چوون رومِ امپراطور کْلودیوس دَستور هِدا بییه که تِمومِ یَهودیون رومِ جِم بورِن. پولُس وِشونِ بدیئِنِ وِسه بُورده،

اعمال رَسولان 18:23

چَن وَخت اونجه بَمونِسه و اَی سَفِرِ راهی بَییه، وه تِمومِ غَلاطیه و فْریجیهِ مَنطقهِ جا به جا ره گِردِسه و تِمومِ شاگردونِ تَقویت کارده.

اعمال رَسولان 2:11

هم یَهودی و هم اونایی که یَهودِ دینِ قبول هاکاردِنه؛ و همین طی کْرت و عربِستانِ مَردِم - همه اِشنُمبی که اینا اَمه زِوون، خِدائه قِوَّت و عجیبِ کارائه جِم گَب زَندِنه.»

اعمال رَسولان 23:11

هَمون شو، خِداوند پولُسِ پَلی اِیست هاکارده و بااوته: «تِ دِل قِرص بوئه! همون‌طی که اورشَلیمِ دِله مِ ره شِهادِت هِدایی، رومِ دِله هم وِنه شِهادِت هادی.»

اعمال رَسولان 27:5

بعد از اینکه کیلیکیه و پامفیلیهِ دریالوِ جِم بُگذِشتیمی، میرائه بندرِ دِله، که لیکیهِ مَنطقهِ دِله بییه پیاده بَیمی.

اعمال رَسولان 28:15

اونجهِ بِرارون بِشنُسه بینه که راه دِله دَرِمبی، پَس تا آپیوس و «سه مِیخِانهِ» بازارِ دِله بییَمونه تا اَمه پیشواز بِیّن. پولُس وَختی وِشونِ بَدیئه، خِدا ره شکر هاکارده و وه دِل قِوَّت بَییته.

اعمال رَسولان 6:5

اونچی که رسولون بااوتِنه همه نَظِر خوار بییَمو و این آدِمونِ انتخاب هاکاردِنه: اِستیفان، مَردی که روح‌القُدُس و ایمونِ جِم پِر بییه، فیلیپُس، پْروخُروس، نیکانُر، تیمُن، پارمِناس و نیکُلائوس که اَنطاکیهِ دِله یَهودی بَییه بییه.

اعمال رَسولان 6:9

اون مووقه چَن نَفِر، یِتا عبادتگاه جِم، که اونِ اسم «آزاد بَییه هائه عبادتگاه» بییه، که قیرَوانِ یَهودیونِ جِم و اسکندریه و کیلیکیه و آسیائه مَنطقهِ جِم هم بینه، استیفانِ هِمراه بَحث هاکاردِنه.

رومی ایشون 1:15

اینِ وِسه خَله ذوق دارمه، انجیلِ شِمه وِسه که رومِ دِله زندگی کاندینی، اِعلام هاکانِم.

رومی ایشون 1:7

همهِ اونایی وِسه که رومِ شَهرِ دِله دَرِنه، که خِدا وِشونِ دوس دارنه و دَعوِت بَینه تا خِدائه مِقدَّسِ قوم بوئِن: فِیض و صِلح و سِلامتی اَمه پییِر، خِدا و خِداوندْ عیسیِ مَسیحِ طَرِفِ جِم، شِمه وِسه بِیّه.

دوم تیموتائوس 1:17

بلکه وَختی رومِ شَهر بییَمو، مِ دِمبال بَگِردِسه تا سَر آخِر مِ ره پی دا هاکارده.

یوحنایِ مکاشفه 11:8

و وِشونِ جِنازه ها ره اون گَتِ شَهرِ جادّهِ دِله که ‌کنایهِ وار سُدوم و مصرِ گانِنه، زِمینِ سَر موندِنه؛ اونجه که وِشونِ خِداوند مصلوب بَییه.