دوّمین نامه قرنتیانِ وَسین 13:11 - کتاب مقدس به زبان مازندرانی - گویش شرقی

¹¹ سرآخِر، ای بِرارون، خِشال بوئین. شِمه فکر این بوئه که اَی دِواره جان بَیرین و هَمدییه ره تَسِلّی هادین، هَمدییه هِمراه هم نَظِر بوئین؛ صِلح و سِلامتیِ دِله زندگی هاکانین؛ که خِدائه مِحَبَّت و صِلح و سِلامتی شِمه هِمراه موندِنه.

گیله ماز

¹¹ سَر آخَر، اِی اَداشان، خوشحال هَبین؛ شیمی فِکر این هَبو که باز هَم جان هَگیرین؛ و همدیگرِ تسلّی هَدین، همدیگرِ هَمره هم نظر هَبین، صُلح و سلامتی یه دِلِه زندگی هَکُنی؛ که خدایِ مُحبت و صُلح و سلامتی شِیمی هَمرَه ماندِنِه.

کتاب مقدس به زبان مازندرانی - گویش غربی

¹¹ سَرآخر، اِی بِرارِن، خِشال ووئین. شِمِه فِکر هَین ووئه گه اَی هَم جان بَیرین؛ و همدیرِ تسلّی هادین، همدیری هَمرا هَم نظر ووئین، صِلح و سلامتی ای دِلِه زندگی هاکِنین؛ گه خِدایی مِحبت و صِلح و سلامتی شِمِه هَمرا مونِّه.

دوّمین نامه قرنتیانِ وَسین 13:11 Iomraidhean Croise

اِنجیلِ مَتّی 1:23

« یِتا اَذِبِ کیجا حامله بونه، یِتا ریکا دِنیا یارنه که وه ره عمانوئیل گانِنه» که وه معنی، خِدا اَمه هِمراه، هَسه.

اِنجیلِ مَتّی 5:48

پَس شِما وِنه كامل بوئین هَمون طی كه شِمه آسِمونی پییِر كامل هَسه.

مَرقُس 10:49

عیسی اِیست هاکارده و بااوته: «وه ره صِدا هاکانین.» پَس اون کورِ مَردی ره صدا هاکاردِنه، وه ره بااوتِنه: «تِ دِل قِرص بوئه! پِرِس دَره تِ ره صدا کانده.»

مَرقُس 9:50

نِمِک خوارِ، ولی اگه نِمِک شه شوری ره از دَس هاده، چه طی بونه اَی اونِ شور هاکارد؟ شِما هم شه دِله نِمِک دارین و هَمدییه هِمراه صِلح و صِفائه دِله زندگی هاکانین.

لوقا 9:61

یه نَفِرِ دییه بااوته: «ای آقا، مِن تِ هِمراه اِمبه، ولی اِجازه هاده اَوِّل شه خانِوادهِ هِمراه خِداحافظی هاکانِم.»

اِنجیلِ یوحنا 17:23

مِن وِشونِ دِله و تِ مِ دِله دَری. جوری هاکان تا وِشون هم کامِلاً یِتا بَووِن تا دِنیا بَدونه که تِ مِ ره بَفرِسی ای، و وِشونِ هَمون‌طی دوس داشتی که مِ ره دوس داشتی.

اعمال رَسولان 15:29

بت هائه قِروونی خِراک و خون و خفه بَییه حیوونونِ گوشت و زِنائه جِم دوری هاکانین. اگه اینائه جِم دوری هاکانین، خوارِنی. سِلامت بوئین»

اعمال رَسولان 18:21

و وِشونِ هِمراه خِداحافظی هاکارده، بااوته: «اگه خِدا بِخوائه اَی دِواره شِمه پَلی اِمبه.» بعد یِتا کَشتی سِوار بَییه و اَفِسُسِ جِم بورده.

اعمال رَسولان 23:30

بَعد وَختی خَوِردار بَیمه وه علیه نَخشه بَکِشینه، دَرجا وه ره شِمه پَلی بَفرِسیمه. وه شاکیونِ هم دَستور هِدامه تا شکایتیِ که وه جِم دارنِنه ره شِمه پَلی بیارِن.»

رومی ایشون 12:16

هَمدییهِ هِمراه مدارا هاکانین! مَغرور نَبوئین، بلکه کِسایی هِمراه که ساده و ضعیفِنه، رفت و آمد هاکانین. هیچ وَخت شه ره حَکیم نَدونین.

رومی ایشون 12:18

اگه بونه، تا اونجه که شِما ره ربط دارنه، همهِ هِمراه صِلح و صِفائه دِله زندگی هاکانین.

رومی ایشون 14:19

پَس بئیین اونچیِ که صِلح و صفا و هَمدییهِ ایمونِ تَقویتِ باعث بونه ره، دِمبال هاکانیم.

رومی ایشون 15:13

بوئه خِدایی که امید دِنه، شِما ره ایمونِ دِله خِشالی و آرامشِ جِم، پِر هاکانه، اون طی که روح‌القدُسِ قِوَّتِ هِمراه، امیدِ جِم پِر بوئین.

رومی ایشون 15:33

خِدائه صِلح و سِلامتی شِما همه ئه هِمراه دَووه. آمین.

رومی ایشون 16:20

خِدائه صِلح و سِلامتی خَله زود شیطانِ شِمه لینگِ بِن له کانده. اَمه خِداوند عیسیِ فِیض شِمه هِمراه دَووه.

اوّلین نامِه قُرنتیانی سِه 1:10

اِی بِرارون، اَمه خِداوند عیسی مَسیحِ اِسمِ هِمراه شِمه جِم خواهش کامبه که هَمدییه هِمراه یَک دِل بوئین و شِمه میون سیوایی دَنی بوئه، بلکه هم، فِکرِ دِله و هم، نظِرِ دِله یِتا بوئین.

دوّمین نامه قرنتیانِ وَسین 1:4

اون خِدا که اِما ره تِمومِ اَمه مصیبت هائه دِله تسلّی دِنه، تا اِما هم بَتونیم اونایی که مصیبتِ دِله دَرِنه ره اون تسلّی ای که وه جِم بَییتیمیِ هِمراه تسلّی هادیم.

دوّمین نامه قرنتیانِ وَسین 13:14

خداوند عیسی مَسیحِ فِیض، خِدائه مِحَبَّت و روح‌القُدُسِ رفاقت شِمه هِمراه دَووه.

دوّمین نامه قرنتیانِ وَسین 13:9

چوون اون مووقه که اِما ضعیف بوئیم و شِما قَوی، اَمه خِشالیِ باعث بونه، و اَمه دعا اینِ که شِما اَی دِواره جان بَیرین.

اِفِسُسیان 4:12

تا مِقدَّسینِ خدمِتِ کارِ وِسه، آماده هاکانِن، مَسیحِ تَنِ بنائه وِسه،

اِفِسُسیان 4:3

تَقِلّا هاکانین تا اون یِتا بَیِّن که خِدائه روحِ جِم هَسه ره صِلح و سِلامتیِ دِله دارین.

اِفِسُسیان 6:23

خِدائه پییِرِ طَرِف جِم و خِداوند عیسیِ مَسیحِ طَرِفِ جِم، بِرارونِ وِسه صِلح و سِلامتی و با ایمونِ مِحَبَّت بوئه.

فیلیپیان 1:27

فِقَط بییِلین شِمه زندگی رَوش، مَسیحِ انجیلِ لایق بوئه، اون طی که چه بِیِّم و شِما ره بَوینِم و چه نَیِّم، شِمه جِم بِشنُئِم، که یِتا روحِ دِله پابرجانی و یِتا فِکرِ هِمراه، اِنجیلِ ایمونِ وِسه، دوش به دوش هم تَقِلّا کاندینی،

فیلیپیان 3:16

اِما وِنه طبق هر اونچی که به دَس بیاردیمی، رِفتار هاکانیم.

فیلیپیان 4:2

اِفُودیهِ جِم خواهش کامبه و سینتیخیِ جِم خواهش کامبه که خِداوندِ دِله همفکر بوئِن.

فیلیپیان 4:4

هَمش خِداوندِ دِله خِشال بوئین؛ اَی هم گامبه: خِشال بوئین.

فیلیپیان 4:9

اونچی مِ جِم یاد بَییتِنی و به دَس بیاردینی و مِ جِم بِشنُسینی و مِ دِله بَدینی ره، اینا ره به جا بیارین، که خِدائه صِلح و سِلامتی شِمه هِمراه دَره.

اوّل تِسالونیکیان 3:10

هَمون طی که اِما شو و روز جانِ دِلِ هِمراه دِعا کامبی تا شِما ره رو در رو بَوینیم و هر کمِ کسری که شِمه ایمونِ دِله دَره ره بَرطَرِف هاکانیم.

اوّل تِسالونیکیان 4:1

سَر آخِر پَس، ای بِرارون، اِما خِداوند عیسیِ دِله شِمه جِم خوامبی و اِلتماس کامبی هَمون طی که اَمه جِم شِما ره بَرِسیه که چی طی وِنه زندگی هاکانین و خِدا ره راضی هاکانین، همین طی هم که اِنجام دِنِنی، این کارِ ویشتر و ویشتر هاکانین.

اوّل تِسالونیکیان 4:18

پَس این گَب هائه هِمراه، هَمدییه ره تَشویق هاکانین.

اوّل تِسالونیکیان 5:13

و مِحبَّتِ دِله اون کاری خاطِری که کاندِنه، وِشونِ خَله اِحترام بییِلین. و هَمدییه هِمراه صِلح و سِلامتیِ دِله زندگی هاکانین.

اوّل تِسالونیکیان 5:16

هَمِش خِشال بوئین؛

اوّل تِسالونیکیان 5:23

اِسا خِدائه صِلح و سِلامتی، شه شِما ره کاملاً تَقدیس هاکانه و شِمه روح و جان و تَن، تا اَمه خِداوند عیسی مَسیحِ بییَموئِنِ مووقه بی‌عیب بَمونه.

دوّم تِسالونیکیان 2:16

اِسا، شه اَمه خِداوند عیسی مَسیح و اَمه پییِر خِدا که اِما ره دوس داشته و فیضِ طریق، اِما ره اَبدی تَسلّی و خوارِ امید هِدا

دوّم تِسالونیکیان 3:1

سَر آخِر، اِی بِرارون، اَمه وِسه دِعا هاکانین تا خِداوندِ کِلام تِن پیش بوره و اونِ احترامِ دارِن، هَمون‌ طی که شِمه میون این طی بَییه،

دوّم تِسالونیکیان 3:16

اِسا، خداوندِ صِلح و سِلامتی، شه، هر مووقه و هر وضعِ دِله شِما ره صِلح و سِلامتی دِنه. خِداوند شِما همهِ هِمراه دَووه.

دوم تیموتائوس 2:22

پَس جوونیِ هِوا و هوسِ جِم فِرار هاکان، و وِشونِ هِمراه که پاکِ دِلِ هِمراه خِداوندِ صدا کاندِنه، صالحی و ایمون و مِحَبَّت و صِلح و سِلامتیِ دِمبال دَواش.

نامِه مَسیحینی عبرانی نِژادی سِه 12:14

تَقِلّا هاکانین تِمومِ مَردِمِ هِمراه صِلح و سِلامتیِ دِله دَووین و مِقَدَّس بوئین، چوون بدونِ قدّوسیت هیچ‌کی خِداوندِ نَوینده.

نامِه مَسیحینی عبرانی نِژادی سِه 13:20

اِسا که خِدائه صِلح و سِلامتی اون اَبدی عَهدِ خونِ طریق، اَمه خِداوند عیسی ره مِرده هائه جِم زنده هاکارده، یعنی گُسفِنونِ گَتِ چَپون،

یعقوبِ نامه 1:4

ولی بییِلین استقامت شه کارِ تِموم هاکانه تا بی عیب و کامل بَووین و هیچی کم نِدارین.

اول پِطرُس 3:11

وِنه بَدیِ جِم دوری هاکانه و خواری هاکانه؛ صِلح و سِلامتیِ دِمبال دَووه و اونِ دِمبالِ رو بوئه.

اول پِطرُس 3:8

سرآخر، شِما همه، همفکر و یَک دِل و بِرار دوس و دلسوز و فروتن بوئین.

اول پِطرُس 5:10

و بعد که اَت کم سختی و عِذاب بَدینی، خِدایی که فیضِ جِم پِرِ، که شِما ره مَسیحِ دِله دعوِت هاکارده، تا وه اَبدی جِلالِ دِله شَریک بوئین، شِما ره از نو بنا کانده و پایدار و پِر قِدرت و پابرجا کانده.

یوحنایِ مکاشفه 22:21

خِداوندْ عیسیِ فِیض شِما همهِ هِمراه دَووه. آمین.