इब्रानियों 11:7 - नुवो नेम (मेवड़ी नया नियम)

⁷ विस्वास करबा की वजेऊँ नूह भी वणा बाताँ ने ज्यो वींने दिकई कोयने दिदी ही। ईं बारा में चेतावणी पान परमेसर की दरपणी का हाते आपणाँ परवार ने बंचाबा का वाते जाँज बणायो हो, अस्यान करन वणी दनियाँ ने दोसी ठेराई अन वो धारमिकता को वारिस बणग्यो, ज्यो विस्वास करबाऊँ आवे हे।

इब्रानियों 11:7 Iomraidhean Croise

मत्ती 2:12

परमेसर वाँने हपना में हेंचेत किदा के, हेरोदेस के नके पाच्छा मत जाज्यो, तो वे दूजाँ गेलाऊँ आपणे देस पराग्या।

मत्ती 24:15

“ईं वाते जद्याँ थाँ वीं ‘उजाड़ करबावाळी अबकी चीज ने,’ जिंको बखाण दानियेल परमेसर का आड़ीऊँ बोलबावाळा का मुण्डाऊँ करियो ग्यो हे, मन्दर की पुवितर जगाँ पे ऊबी देको, भणबावाळा खुद हमज ले के, ईंको कई मतलब हे।

मत्ती 24:25

देको, में थाँने पेल्याई ईं हारी बता दिदी हे।

मत्ती 24:38

काँके जस्यान जळ-परलयऊँ पेल्या का दनाँ में, जणी दन तईं नूह नाव में ने चड़यो हो, वीं दन तईं लोग-बाग खाता-पिता हा अन वाँमें ब्याव वेता हा।

मत्ती 3:7

जद्याँ यहुन्ने यो देक्यो के, नरई फरीसी अन सदुकी वाँका नके बतिस्मो लेबा ने आरिया हे तो वणी वाँकाऊँ क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो?

लूका 17:26

जणी तरिया नूह की टेम में भी व्यो, वणीस तरिया मूँ मनक का पूत की टेम में भी वेई।

रोमियों 1:17

काँके हव हमच्यार बतावे हे के, परमेसर मनकाँ ने कस्यान आपणाँ वाते सई करे हे। ओ सरुवातऊँ लेन आकरी तईं विस्वास पे टक्यो तको रेवे हे। जस्यान के पुवितर सास्तर में लिक्यो तको हे के, “विस्वासऊँ धरमी मनक जीवतो रेई।”

रोमियों 10:6

पण विस्वासऊँ मलबावाळी धारमिकता का बारा में सास्तर अस्यान केवे हे के, “थूँ खुद आपणाँ मन में यो मती केज्ये के, ‘हरग में मसी ने धरती पे लाबा का वाते कूण जाई?’”

रोमियों 3:22

हाराई विस्वास्याँ का वाते ईसू मसी में विस्वास का हाते बना भेद-भाव करिया परमेसर का आड़ीऊँ मलबावाळी धारमिकता परगट किदी गी हे।

रोमियों 4:11

ईंका केड़े वणी एक हेन्याण का तरिया खतनो करायो। ज्या विस्वास की वजेऊँ धारमिकता की छाप हे यो विस्वास वणी जदी दिकाया हो जद्याँ वींको खतनो ने व्यो हो। तो वो वाँ हाराई को बापू हे जीं बना खतना का वेन भी विस्वासी हे। ईं वाते ज्यो यहूदी ने हे वीं भी धरमी गण्या जावे।

रोमियों 4:13

अबराम अन वींकी ओलाद ने यो वादो मल्यो के, वीं दनियाँ का वारिस वेई, यो वादो नेमाऊँ ने मल्यो हो, पण वीं धारमिकता का मस मल्यो, ज्या विस्वासऊँ अई ही।

रोमियों 9:30

तो पछे आपाँ कई केवाँ? माँ ईं नतीजा पे आया हा के, ज्यो यहूदी ने हा, वीं मनक धारमिकता की खोज में ने हा, वणा धारमिकता पा लिदी हे। वीं ज्यो विस्वास की वजेऊँ खरा ठेराया ग्या।

गलातियों 5:5

पण आपाँ तो मसी पे विस्वास करबा का मस परमेसर की आत्मा की मदतऊँ धरमी वेबा की आस राकन वाट नाळा हा।

फिलिपियों 3:9

अन मूँ वाँका हाते गट-जोड़ऊँ जी सकूँ। मूँ मूसा का नेमा को पालण करबाऊँ परमेसर का हामे सई ने हूँ, पण ईसू मसी पे विस्वास करबाऊँ परमेसर का हामे सई हूँ। अबे परमेसर केवे हे मूँ वाँका हामे सई हूँ, काँके मूँ विस्वास करूँ हूँ।

इब्रानियों 11:1

विस्वास करबा को अरत हे के, जणा चिजाँ की आपाँ आस लगा राकी हे, वीं आपाँने मलगी हे ईंको भरोसो कराँ हा। अन जीं चिजाँ ने आपाँ देक ने सका, पण आपाँने वाँको मलबा को पूरो भरोसो हे।

इब्रानियों 12:25

ध्यान राकज्यो, के थाँ वणी बोलबावाळा ने मती नकार ज्यो। काँके जणी धरती पे चेतावणी दिदी ही, वींने नकारन वीं बंच ने सक्या, तो यद्याँ आपाँ वींने नकार देवा, ज्यो आपाँने हरगऊँ चेतावणी देरियो हे, तो आपाँ कदी दण्डऊँ बंच ने सका।

इब्रानियों 5:7

ईसू अणी धरती का जीवन में ज्यो वींने बंचा सकतो हो, वणीऊँ जोरऊँ हाको करतो तको अन रोते तके अरज अन परातना किदी ही अन नमरता अन भगती का मस वींकी हुण लिदी गी ही।

इब्रानियों 8:5

जीं जगाँ पे वीं याजकपणा को काम कररिया हे, वो तो ज्यो हरग में हे वींकी नकल अन छाया हे। ईं वाते जद्याँ मूसो पुवितर तम्बू बणाबावाळो हो, तद्याँई वींने चेतावणी दिदी गी के, “ध्यान राकज्ये के, थूँ हरेक चीज वींके जस्यानीस बणाज्ये, जस्यान थने मंगरा पे बतई ही।”

1 पतरस 3:20

ईं वणा मनकाँ की आत्मा हे, जणा जद्याँ नूह नाव बणारियो हो वीं टेम परमेसर को केणो ने मान्यो, पण परमेसर धिज्या का हाते वाँकी वाट नाळरिया हा, वीं टेम भी नाव में आट मनकईस पाणीऊँ बंचाया ग्या हा।

2 पतरस 1:1

मूँ समोन जिंको नाम पतरस भी हे, ज्यो परबू ईसू मसी को दास अन थरप्यो तको चेलो हे, मूँ ओ कागद वाँ मनकाँ का नाम लिकरियो हूँ, जीं आपणाँ परमेसर अन छुटकारो देबावाळो ईसू की धारमिकता के वजेऊँ आपणे जस्यानीस विस्वास करे हे।

2 पतरस 2:5

परमेसर वीं पुराणी दनियाँ ने भी कोयने छोड़ी, पण वो नूह ज्यो धारमिकता को परच्यार करिया करतो हो, वींने अन हात ओर मनकाँ ने जद्याँ तईं बंचातो रियो, तद्याँ तईं पापी मनकाँ की दनियाँ को बाड़ऊँ नास ने वेग्यो।

2 पतरस 3:6

ईं वजेऊँ वीं टेम की दनियाँ बाड़ऊँ नास वेगी ही।