1 Ebitru 1:5 - Ohwihwim Olehe

⁵ Owlama o wo ma okyku gimi arehwĩ ba ekʼpo ba Ahogbrẽ e la e kpaŋ, okyku bimi e bmi ba adlidzi omba ba agimi e la e dzu e kʼpu oshla he lo. Moa a shri oshla he lo a zga ma, ba moa á tsa lo omba ba amom-abgo.

1 Ebitru 1:5 Iomraidhean Croise

Eyohana 12:48

Areyaŋ a mbo la a tla me nga a bmi ba adlidzi ta la oshpa me mbo le, arekyeŋ a wo ma la á ba a sõ ŋa ombgu. Odlo ba ame e sheŋ e lu hi angyiŋ ó ba o sõ ŋa ombgu onda mi lo!

Eyohana 17:15

O ka, ame e klo boŋ o ngʼba mo o sku obiŋ hi angyiŋ mbo, ambo ame e klo boŋ o kpaŋ mo nga o ngʼba mo o sku abgo Areabi.

Eyohana 4:14

Ambo areyaŋ ambo la a wa ami ba ame angyiŋ é shri é daŋ, oŋo ó kpo ŋa ku-ku nga mbo. Okyku eshi ami ba ame é shri é daŋ he lo á dzu eyi-ami angyiŋ eso baŋ, nga á dzu ami la a wo la eso ma, nga á shri eso ba gbagbu á shri á daŋ.

Eyohana 5:24

Ame e lu adlidzi angyiŋ e da gimi, areyaŋ a mbo la a yga odlo me nga a bmi ba adlidzi ta la are la a hom me otum le, a wo la eso ma gbagbu-amo. Moa á sõ ŋa omgbu nga mbo. O dzu eka baŋ a gro eku nga a hwiŋ eso.

MoaOroma 11:20

O wo adlidzi. Moa a ngʼba mo a ygi a bi, okyku moa a bmi ba adlidzi mbo. Ambo moa a ra gimi a zga ma okyku bimi e bmi ba adlidzi. Ambo agimi e ygi egʼba okyku ekplo la e kpo mbo, ambo agimi e dzu la eyli.

MoaOroma 8:18

Ame e tne aga e ka tki, ekʼpo bi é ba e gre ewu bi e la e kpo ohuhuhi nzenze.

1 MoaOkorinti 1:21

Okyku eshi Ahogbrẽ la okaobmye baŋ, a da lo o kpo o gbu ba moarehwi a ka ŋa a bmye la okaobmye ba eshri mo mbo, ambo Ahogbrẽ a zga eso baŋ okyku o shla moarehwi la a bmi ba adlidzi angyiŋ, ozhẽ oshpa ba adro ba agi e la e nyum he.

2 MoaOkorinti 1:24

Ambo agi e zga gble okyku o lu eka ekplo ba agimi é ba e bmi ba adlidzi ta la lo angyiŋ e da gimi mbo, okyku eshi agimi e sheŋ e tspi osheshye ta la obmi ba adlidzi bgu. Ambo agi e la e kpo otum ka la gimi okyku o da gimi e dzu la ovye.

MoaEgalasiya 2:20

Okyku eka he, ame e wo la eso ma ohuhuhi mbo, ambo Ekristi angyiŋ a wo eso me. Eso ba ame e wo la alo ma ohuhuhi, ame e wo la alo ma okyku obmi ba adlidzi ta la Anwye ba Ahogbrẽ la a klo me nga a shri eso baŋ a di okyku me.

MoAfisu 2:8

Okyku eshi agimi é gro okyku okpoghwo ba Ahogbrẽ angyiŋ okro ba obmi ba adlidzi. O wo okpo-kpo bimi angyiŋ mbo, ambo ototno ba Ahogbrẽ angyiŋ.

MoAfisu 3:17

nga o wo bimi e bmi ba adlidzi ka la ŋa, Ekristi nga á kpo okro odzuma baŋ esõ bimi. Ame e la e fa olu okyku o da gimi e ta emgbʼbo e ghwo egʼba ba oklo, nga okyku o da oklo angyiŋ o dzu okũ bimi.

MoaEfilibi 1:6

Okyku eka he ame e nyuŋ e ka zhezheŋ okyku ohe lo, nga ba Ahogbrẽ la a zga esĩ otum odzadzi he lo esõ bimi, á kpo lo ayi-oyioyi ma-me o tsa onda ba alo o khwo, Olum onda ba Ekristi Eyesu.

MoaEfilibi 4:7

Nga opyapyaŋ ba Ahogbrẽ la o gre okaobmye ba arehwĩ ó kpaŋ esõ bimi ta la aga bimi okro ba Ekristi Eyesu.

2 Etimoti 3:15

Nga o sheŋ o yi boŋ o yi Akpa ba Ahogbrẽ ba esesla, a zga omba boŋ o yi o wo anwye afifi. Okro obmi ba adlidzi ta la Ekristi Eyesu, Akpa ba Ahogbrẽ ba esesla he lo, a wo la ekʼpo ba ó shri okaobmye la ó shri oshla ó doŋ.

Etitu 2:13

Agi é kpo eka he lo ma-me o tsa Onda ba owlama ba agi e ka ayi ozhẽ okyku lo. Omba he lo angyiŋ areyaŋ a mbo á ba a ka ekekʼpo ba Ahogbrẽ bi la a wo ekʼpo ta la Areoshla bi Eyesu Ekristi.

MoaIbrani 6:12

Agi e klo ba agimi e kpo oreŋ mbo, ambo agi e klo ba agimi e dzu eka moare la a bmi ba adlidzi nga moa a kpo heheŋ, okyku o da mo a yga ekplo ba Ahogbrẽ a hwim okyku mo.

MoaIbrani 9:28

Ozhẽ he lo angyiŋ moa a shri Ekristi a shri a ndba odgo okyeŋ okyku o daŋ a sko odlobi moarehwĩ nzenze. Aŋa á bla á ba odgo oha okyku o sko odlobi angyiŋ nga mbo, ambo okyku o shla moa la a la a dzu a bli ŋa angyiŋ a mo.

1 Ebitru 1:13

Agimi e nyuŋ eshri bimi e zga okyku o kpo otum a mo. E dzu e ka, nga e shri okayiozhẽ bimi pyeŋ e zga ibu owlama ba moa á shri á da gimi omba ba moa á tsa gimi Eyesu Ekristi.

1 Ebitru 4:13

Ambo o raŋ o gre ba agimi e kpo ovye angyiŋ okyku ba agimi e pu ta la Ekristi ewu baŋ a la a kpo, okyku o da gimi e bli la ovye angyiŋ omba ba moa a tsa gi esesla baŋ.

1 Ebitru 5:1

Ame e shĩ moandakʼpo ba Eklisiya la a wo eshki bimi. Ame ababgo me a mbo, e wo andakʼpo ba Eklisiya angyiŋ. Ame e wo egŋe eshri ewu ba Ekristi a kpo. Nga ame e wo la ogʼba eshki ba esesla ba moa á ba a tsa. Ame e la e vẽ gimi,

2 Ebitru 1:3

Ekʼpo baŋ ba Ahogbrẽ e shri ekployaŋ a mbo ba agi e klo okyku o da gi e dzu la odzudzu la o raŋ Ahogbrẽ esõ, ozhẽ oyioyi ba agi e yi ŋa la a bzi gi okyku o da gi e pu esesla baŋ ta la odzi baŋ.

1 Eyohana 3:2

Agimi akyemeazba, agi e wo moanwye ba Ahogbrẽ angyiŋ ohuhuhi, ambo agi e yi eka ba agi é ba e dzu zhezheŋ a wo mbo. Ambo agi e yi ba agi é ba e dzu eka ba Ekristi omba baŋ á ba. Agi é zhiŋ e dzu eka baŋ, okyku eshi agi é ka ŋa eka baŋ a wo zhezheŋ.

Eyahuda 1:1

Akpa he lo a zgi abgo ba Eyahuda awaghrẽ ba Eyesu Ekristi. Eyahuda angyiŋ a wo anáŋ Eyakubu. Akpa he lo a wo okyku moarehwĩ ba Ahogbrẽ a bzi mo, moa la a dzu odzudzu mo ibu oklo ba Ahogbrẽ la a wo Ada, nga ba Eyesu Ekristi a la a kpaŋ mo.

Eyahuda 1:24

Okyku ŋa la a kpo a gbu baŋ a kpaŋ gimi a sku ibu ba otsugbu, aŋa a kpo a gbu baŋ a da gimi e dzu shasha la ovyevye egi ayi ba esesla baŋ,