Nọmbas 8:8 - Edo Bible (E Baibol Ẹdo) Version 1996

⁸ Avbe Livai ghi mu ovbi ẹkhuia ẹmila kevbe ihaoko ọka ọghe irhuarhua ne a ye ofigbọn oliv gbe, wẹ ghi mu ẹkhuia ne ogieva ọghe izọese orukhọ mwẹ.

Nọmbas 8:8 Iomraidhean Croise

Ẹksọdọs 29:1

“Vbenian ọre u gha ya ye Errọn kevbe ivbi ẹre fi ohan mẹ ne iran ga mwẹ zẹ vbe ohẹn. U ghi mu ovbi ẹkhuia ẹmila ọkpa kevbe ogho eva ne a ma kuan ra ne egbe gba na.

Ẹksọdọs 29:3

U ghi muẹn ye okhuae ne u ya zẹ ọhẹ mẹ vbe ẹghẹ ne u ya ye ẹkhuia ẹmila kevbe ogho nii zọ ese.

Aizaia 53:10

E Nọyaẹnmwa khare wẹẹ, “Iho mwẹ nọ wẹ ne ọ rrioya. Uwu ne ọ wu, ese ne a zọ ya dẹ ayabọ ọ re nọ. Rhunmwuda ọnii, ọ gha miẹn ivbi uniẹn ọnrẹn ọ gha tọ ẹsẹsẹmwẹse obọ, ẹre ọ re emwamwa mwẹ ra na dunna.

Levitikọs 1:3

A deghẹ ẹmila obọ ẹre ọre ọmwa ra ya zọ ese ne a giẹn uan, ọ ghi mu ẹkhuia ẹmila ne ẹ i mwẹ okan rre. Ọ ghi mu ẹẹn gha die onurho Owa Ukpọn e Nọyaẹnmwa, ne Nọyaẹnmwa miẹn ehe na rhan obọ miẹn rẹn.

Levitikọs 16:3

Ọ gha mu ovbi ẹkhuia ẹmila ya zọ ese orukhọ nẹ, kevbe ogho ne ọ ya zọ ese na giẹn uan, iyeke ọnii, ọ sẹtin la uwu Ehe Nọhuansẹ Ehia nii.”

Levitikọs 2:1

“Omwa gha yo imuohan ọka gie Nọyaẹnmwa, ọ ghi ka dunmwu ẹre irhuarhua nẹ, ọ ghi sa ofigbọn ọliv kevbe eturari ba ẹre.

Levitikọs 4:14

A gha wa rẹn orukhọ nii ọwarọkpa, emwa nii ghi mu ovbi ẹkhuia ẹmila rre zẹ vbe emwi izọ ese ye orukhọ. Iran ghi mu ẹẹn gha die Owa Ukpọn Ile Nọyaẹnmwa.

Levitikọs 4:3

Adeghẹ Ogie Ohẹn ọre ọ ru orukhọ ne ọ na mu abe gie emwa nii, ọ ghi mu ẹkhuia ẹmila ne ẹ i mwẹ okan ya zọ ese ghe Nọyaẹnmwa ye orukhọ ẹre.

Levitikọs 8:2

“Rhie Errọn kevbe ivbi ẹre gha rrie onurho Owa Ukpọn Ile, u ghi vbe viọ avbe ẹwu ohẹn rre, ofigbọn ne a sa ye emwa uhunmwu, ovbi ẹkhuia ẹmila ne a ra ya zọ ese orukhọ, ogho eveva ke ẹe kevbe okhuae ebrẹd ne ọ ma hue.

Ebe ne Pọl gbẹẹn gie emwa Rom 8:3

Emwi ne Uhi ma sẹtin ru, rhunmwuda ne ọmwa ma na wo vbe egbe vbe a yiẹe, Osanobua ru ẹe nẹ. Rẹn keghi bu ohiẹn gbe orukhọ ne ọ rre egbe ọmwa zẹ vbe ne a yiẹe, vbe ne ọ na gie Ovbi ẹre ne ọ mu akpa egbe ọmwa ne ọ mwẹ orukhọ yọ gha dee, ne ọ miẹn ehe na do gbe ukhu orukhọ ua.

II Kọrinti 5:21

Kristi ma gha mwẹ orukhọ, sokpan Osanobua keghi ghae nẹ vbe orukhọ ima, ne a miẹn ehe na miẹn wẹ, ma gha ye egbe ba irẹn nẹ, ma ghi vbe ghae vbe ọmwa ẹmwata ne Osanobua khin.