Nọmbas 34:2 - Edo Bible (E Baibol Ẹdo) Version 1996

² Ne ọ ma avbe ivbi Izrẹl re: “Wa gha la otọ Kenan, otọe ne I mu ne uwa, eke ne ọ gha re uwu otọe uwa ọre ena khin.

Nọmbas 34:2 Iomraidhean Croise

Gẹnẹsis 10:19

Odẹ Gera ya sẹ Gaza gha rrie odẹ Sọdom, Gomorra, Adma kevbe Zẹboim yasẹ Lasa.

Gẹnẹsis 17:8

I gha mu otọe ne uwẹ ye na zẹ vbe orhunmwuyẹn ne uwẹ vbe uniẹn ruẹn. Otọe Kenan hia ghi gha re ọwuẹ ẹdẹdẹmwẹdẹ, mẹ ghi vbe gha re Osanobua iran.”

Psalm 105:11

“I gha mu otọe Kenan nuẹn ọ ghi gha re ọwuẹ.” Erriọ ọre ọ khare.

Ẹksọdọs 23:31

I gha mwa otọ uwa ne ọ ke okun Akaba ya sẹ Okun Meditẹrrenian kevbe ke ato ya sẹ Ẹzẹ Yufretes. I gha rhie uwa obọ yan emwa ẹvbo nii uhunmwu, wa ghi vbe khulo iran hin odaro uwa rre vbe uwa a gha nana sikẹ odaro.

Jerimaia 3:19

E Nọyaẹnmwa khare wẹẹ, “Izrẹl, te I te wẹ ne I rhan obọ miẹn ruẹn ya ye ọmọ, ne I mu otọ ne ọ mose ne uẹn, otọe ne ọ mose sẹẹ vbe otọ agbọn hia. Te I te ho ne u tie mwẹ erha, ne u ghẹghi dọlegbe fi iyeke gbe mwẹ ẹdẹdẹmwẹdẹ.

Ezikiẹl 47:13

E Nọyaẹnmwa ne Udazi keghi kha wẹẹ, “Ehe ne ọ lae ọna khin ighe otọe nii ne a ra ghae ne avbe ẹwae iweva nii, vbene ukhukhu eva gha na sẹ ẹwae Josẹf obọ.

Ezikiẹl 47:14

Te I wa yan ma avbe erha uwa odede wẹ I gha mu otọe na ne iran, banbanna nian, wa gha ẹre umwọmwẹ ne egbe uwa.

Nọmbas 34:1

E Nọyaẹnmwa keghi ru avbe igiodẹ na ne Mosis.

Iwinna 17:26

Ke uwu ọmwa ọkpa rre, ọre ọ na yi emwi otọ ughughan ne iran gha rre otọ agbọn hia. ke odaro emwi hia, rẹn ọre ọ tobọ ẹre mwa ẹghẹ ne iran gha ya gha rrọ, ọ keghi ye uwu yi ehe ne iran gha ye vbọ.

Iwinna 26:18

U ghi rhan iran aro ne u gban iran uhunmwu hin ebiebi rre la uwu uwanmwẹ, kevbe hin ẹtin Setan rre ghe Osanobua. Vbene a gha na miẹn wẹ vbekpa ne iran na mu ẹtin yan mwẹ, a ghi ye orukhọ iran bọ iran, iran ghi rhie ihe iran vbe uwu ẹbu emwa ne Osanobua hannọ zẹ.’

Ẹfisọs 1:14

Nene Orhiọn Ne Ọ Huanrẹn ọre a ya zẹ osẹe yọ wẹ, emwi ne Osanobua ve emwa rẹn re, gha sẹ ima obọ, ọ keghi vbe gie aro mwa da ẹe wẹ Osanobua gha rhie ọdakha egbe ọmwa ne ọ gbae ne avbe emwa rẹn. Wa gie ima rho uyi ẹre!

Ẹfisọs 1:18

I vbe rinmwian wẹ, ne a kie uwa ekhọe, ne uwa miẹn ehe na dẹghe nene uwanmwẹ, ne uwa miẹn ehe na rẹn idaehọ ne irẹn tie uwa yi, kevbe vbene ọ hin ukhuaẹn sẹ hẹ ighẹ afiangbe ọyunnuan ne irẹn ve emwa rẹn re.

Jọsua 11:23

E Jọsua keghi khọn otọe ni hia fẹẹrẹ zẹ vbene Nọyaẹnmwa tama e Mosis. Ọ keghi muẹn ne ivbi Izrẹl ne ọ gha re ọghe iran, a na do gha ẹre ako ako, ọkpọkpa ne ẹwae ọkpọkpa. Ẹre emwa nii na ghi hẹwẹ vbe okuo.

Jọsua 13:1

E Jọsua keghi wa khian ọmaẹn ẹsẹse, e Nọyaẹnmwa keghi tama rẹn wẹẹ, “U khian ọmaẹn nẹ ẹsẹse, sokpan avbe ẹvbo ne a ra ye khọn wa ye bun.

Jọsua 21:43

Erriọ ọre Nọyaẹnmwa na mu ne ivbi Izrẹl otọe ni ne irẹn wa yan ma avbe erha iran odede wẹ rẹn gha mu ne iran. Iran mu otọe nii, iran na yin evba.