Joẹl 3:5 - Edo Bible (E Baibol Ẹdo) Version 1996

⁵ Wa viọ mwẹ esiliva kevbe igoru gha rrie, wa keghi viọ ẹfe mwẹ ọrhẹnrhẹn gha rrie aro ẹbọ uwa.

Joẹl 3:5 Iomraidhean Croise

II Ọba 12:18

E Joas ne ọba e Juda keghi wa koko emwi izẹọhẹ hia ne avbe ọba nikaro ighẹ avbe Jehosiafat, Jehoram kevbe Ahazaia ya fi ohan ne Nọyaẹnmwa, ọ kevbe viọ ọghe ọe ba ẹre, deba igoru hia ni rre aza Ọgua Osa kevbe ẹguae, ọ na viọ ehia ya ha oko gie Hazaẹl ne ọba, ọ ni na ghi viọ ivbi iyokuo ẹre hin e Jerusalẹm rre.

II Ọba 16:8

Ehaz keghi viọ esiliva kevbe igoru vbe Ọgua Osa kevbe aza ẹguae, ọ na ya ehia haoko gie ọba nọkhua nii.

II Ọba 24:13

Ọ na viọ emwi ẹfe hia ni rre Ọgua Osa kevbe ni rre ẹguae, avbe ọkpan igoru ne Solomọn ne ọba ru ne a ya gha ru emwi vbe Ọgua Osa.

Aizaia 11:11

Ọ gha sẹ ẹdẹ nẹdẹrriọ, e Nọyaẹnmwa gha dọlegbe lo ẹtin ẹnrẹn, ọ ghi viọ iran gha die owa ighẹ avbe emwa rẹn ni ghi dekẹe vbe Asiria kevbe Igipt, vbe otọe Patros, e Sudan, Ẹlam, e Babilọn kevbe Hamat, deba ni rre avbe eghute kevbe avbe otọe ne amẹ lẹga vbe okun.

Jerimaia 23:7

“Ẹghẹ dee,” erriọ Nọyaẹnmwa khare, “Ne emwa i ghi ra na gha ye eni mwẹ vẹn ihẹn zẹ vbe Osanobua ne ọ rrọọ ne ọ viọ ivbi Izrẹl ke Igipt ladian rre.

Jerimaia 50:28

(Iran ni lẹ vbe owa, lẹ hin e Babilọn rre gha die Jerusalẹm. Iran na iyẹn vbene Nọyaẹnmwa rria ikhi ye ẹmwẹ vbene ivbi e Babilọn ru Ọgua Osa ẹre hẹ.)

Jerimaia 51:11

E Nọyaẹnmwa bọọ avbe ọba e Midia yọ rhunmwuda, ọ ho ne ọ fuẹn e Babilọn ruan. Erriọ ọ re ọ ra ya rria ikhi ye ẹmwẹ Ọgua Osa ọghọe ne iran guọghọ ua. Arowa avbe ivbiyokuo ni ra do gbinna tama iran wẹẹ, “Wa zẹ ifẹnmwẹ uwa ukpẹ! Wa viọ asa uwa mwẹ.

Ezikiẹl 37:12

Rhunmwuda ọnii, ta ẹmwẹ akhasẹ ma ivbi Izrẹl ne emwa mwẹ, ne u khama iran wẹ, mẹ ne Nọyaẹnmwa ne Osanobua, ra we idin iran unu an, I ra viọ iran ladian, ne I vbe viọ iran gha die otọe Izrẹl.

Daniẹl 11:38

Ye ihe ọnọna, ọ gha ya ọghọ ne ẹbọ ne ọ sẹtin mu odin ẹvbo mwẹ ne ẹbe ghẹ rre. Ọ ghi ya igoru, esiliva kevbe avbe ikpẹrọnmwọ, kevbe emwi ihaoko ni ghan hia gha zẹ ọhẹ gie avbe ẹbọ ne avbe erha ẹe odede ma gho.

Obedaia 1:17

“Sokpan, eso gha lẹ fe vbe Oke Zaiọn ọ ghi gha re ehe nọhuanrẹn. Ivbi uniẹn e Jekọb gha dọlegbe yan otọe ne ọ re ọghe obọ iran.