Jerimaia 49:2 - Edo Bible (E Baibol Ẹdo) Version 1996

² “Sokpan, ẹghẹ dee ne I gha na gie iran ni rre Raba ne igiogbẹ họn ẹmwẹ okuo, a ghi ya ehia khian itowa, a ghi vbe giẹn avbe igue ẹre hia sotọ. Izrẹl ghi mu otọ ẹre werriegbe vbe obọ iran ni te miẹn ẹre re.

Jerimaia 49:2 Iomraidhean Croise

II Samuẹl 11:1

Amẹ ghi da suẹn gha rhọ vbe ukpo ne ọ lele ẹe, vbe ẹghẹ ne avbe ọba ya yo okuo, e Devid keghi gie Joab kevbe emwa rẹn ni rre asẹ kevbe ivbiyokuo Izrẹl ladian, iran keghi hẹ rhu ivbi Amọn, iran na dunmwu ẹvbo ne a tie ẹre Raba muotọ. Sokpan, e Devid kegha rre Jerusalẹm.

Psalm 48:11

Wa gie ẹko iran ni rre Zaiọn gha rhiẹnrhiẹn! Ohiẹn ẹmwata ọ re uwẹ bu, gie ọyẹnmwẹ gha sẹ emwa vbe otọe Juda hia.

Psalm 97:8

Ẹko sẹ ivbi e Zaiọn ọyẹnmwẹ, avbe ore nekhua ni rre Juda ghọghọe, ye ibuohiẹn ruẹn Nọyaẹnmwa.

Aizaia 11:14

Iran gha koko dekun e Filistia ni rre odẹ ọlarrie owẹn, iran ghi vbe fu iran ni rre odẹ ahọ emwi viọ. Iran gha khọn ivbi Idọm kevbe Moab, ivbi Amọn ghi gha họn ẹmwẹ ne iran.

Aizaia 17:1

E Nọyaẹnmwa khare wẹẹ, “E Damaskọs i ghi ra sẹtin gha re okpẹvbo ọvbehe, utete itowa ọ re ọ ghi ra gha khin.

Jerimaia 4:19

Obalọ ẹre! Egbe mwẹ i rrọ obalọ ẹre, udu mwẹ! Udu mwẹ wa fi kpikpikpi I i sẹtin hunwan, i họn ẹmwẹ avbe okpe nii, deba ugomwẹ okuo.

Jerimaia 49:1

Ẹmwẹ ne Nọyaẹnmwa tae vbe ekpa Amọn ọ re ọna khin: “Avbe ikpia ivbi Izrẹl vbo yi? A ma ghi miẹn ne ọ khọn ne ẹvbo ẹre vbọ ra? Vbọzẹ ne iran na gie avbe emwa ni gho Milkọm khọn mu otọe ẹwae e Gad, ne iran vbe yin ẹnrẹn yi?

Ezikiẹl 21:20

Ọkpa ghi gie odẹ ne ọ rrie Raba ne ẹvbo Amọn ma ọba, nọkpa ghi ma ẹre ne ọ rrie Jerusalẹm ne ẹvbo ne a gbe odin ga vbe Juda.

Ezikiẹl 21:25

“Wa ne emwa dan ni ma huan ni khaemwisẹ yan Izrẹl. Ẹdẹ uwa dee, ẹdẹ ne a gha rri uwa oya ne okiekie.

Emọs 1:14

Rhunmwuda ọnii, I gha mu erhẹn ye ekẹn ne a gbe ga e Raba, I ghi vbe giẹn odin ẹnrẹn sẹ otọ. Ẹghẹ nii, iran gha tu okokoko vbe ẹdẹ okuo, igbinna ghi gha khọn emwi hia khian zẹ vbe okpẹhoho.

Obedaia 1:19

Emwa ni ke odẹ ekẹn e Juda rre gha mu Idọm, iran ni ke ototọ oke odẹ orrie rre gha mu e Filistia, ivbi Izrẹl gha yan iwewe Ifreim kevbe Sameria; ivbi e Bẹnjamin gha mu e Giliad.

Nọmbas 10:9

Wa gha khọn vbe otọ uwa, ọnii nọ we vbe uwa a gha gu emwa ni mu okuo gie uwa khọn, wa ghi ye avbe okpe na kpe okpe orhu okuo Mẹ ne Nọyaẹnmwa Osanobua rua gha yi uwa obọ, I ghi miẹn uwa fan vbe obọ eghian uwa.

Nọmbas 21:25

Ẹre ivbi Izrẹl na khọnmiotọ ẹvbo Amọn hia ya sẹ Hesbọn kevbe ẹvbo ni lẹga ẹre hia, iran keghi yin ẹnrẹn.

Diuteronomi 13:16

Wa ghi viọ emwi ne emwa ẹvbo nii mwẹ hia ladian, a ghi do si ẹe yan egbe vbe ughe ẹvbo nii, wa ghi giẹn ẹvbo ni ke emwi hia ni rrọọ zẹ vbe emwi izọese gie Nọyaẹnmwa Osanobua rua. A ghi wa gie ẹe gha re itowa ẹdẹdẹmwẹdẹ, a ghẹ dọlegbe bọe.

Diuteronomi 3:11

(Ọg ne ọba kegha re ne ọ ghi kiekie vbe avbe Refeim. Okuta ọ re a ya ru ẹkpẹti orinmwi ẹnrẹn, uvbẹmwẹ ọnrẹn kegha re ibata ehan utanmwẹ ọnrẹn kegha re omwa ibata iwenẹ zẹ vbe ọmwa ne agbọn hia ya mwa emwi. Ọ ye rre ẹvbo ne a tie ẹre Raba vbe Amọri ẹre na.)

Jọsua 17:11

E Manasẹ kevbe yanBẹt-Sian kevbe ẹvbo ni lẹga ẹre vbe otọe Isaaka kevbe Asia kevbe deba emwa ni rre Ibleam vbe Dọ (ẹvbo ne ọ rre eghute ọ re ọ na khin) ne ọ rre Ẹndọ, Tanak, Mẹgido kevbe avbe ẹvbo ni lẹga iran.

Jọsua 17:16

Ivbi e Josẹf keghi kha wẹẹ, “Ẹvbo oke ma sẹ ne ima sokpan avbe emwa Kenan ni rre otọe ne ọ rriẹe, mwẹ ikẹkẹ okuo ematọn. Emwa Kenan ni rre Bẹt-Sian kevbe ẹvbo ni lẹga iran vbe mwẹ ọnrẹn, erriọ iran ni rre Iya Jezrẹl vbe ye.”