Jerimaia 42:2 - Edo Bible (E Baibol Ẹdo) Version 1996

² iran tama mwẹ wẹẹ, “Lahọ u ghi ru vbene ima tama ruẹn. Na erhunmwu ghe Nọyaẹnmwa Osanobua mwa ne ima. Na erhunmwu ne ima ni miẹn uhunmwu. Ma te ka wa bun yi, u gha miẹn nian wẹ ima ibozẹghẹ ọ re ọ ghi kẹe.

Jerimaia 42:2 Iomraidhean Croise

I Ọba 13:6

E Jeroboam ne ọba keghi tama akhasẹ nii wẹẹ, “Lahọ na erhunmwu ghe e Nọyaẹnmwa Osanobua ruẹ mẹ ne u tama rẹn ne ọ dọlọ obọ mwẹ yi.” Akhasẹ keghi na erhunmwu ghe e Nọyaẹnmwa, a keghi dolọ obọ ọba yi.

Psalm 119:170

Họn erhunmwu mwẹ, ne u miẹn mwẹ fan zẹ vbene u yan rẹn!

Ẹksọdọs 8:28

Ọba keghi kha wẹẹ, “I gha gie uwa ya zọ ese ghe Nọyaẹnmwa Osanobua rua vbe ato a deghẹ wa ma khian rrei gbe. Wa na erhunmwu mẹ.”

Ẹksọdọs 9:28

Na erhunmwu ghe Nọyaẹnmwa! Egbe avan ne ukhumwu kevbe ayan na wọ mwa. I yan ighẹ 1 gha gie uwa gha khian, wa i ghi khian mudia kpẹe sẹ ona.”

Aizaia 1:15

“Wa gha viọ obọ da odukhunmwu gha na erhunmwu. I i tọn aro mu ghe uwa vbene uwa a rhirhi yan na erhunmwu sẹ hẹ, I i danmwehọ, rhunmwuda, esagiẹn gba uwa obọ.

Aizaia 1:9

Akpawẹ ẹ ire ne Nọyaẹnmwa ne Oghodua na gie eso miẹn uhunmwu vbọ, iran gha wa fuẹn e Jerusalẹm uan fẹẹrẹ zẹvbe Sọdom kevbe Gomorra.

Aizaia 37:4

Ọgbaisi Asiria gie avbe ọkaokuo ẹre ne iran do kpa unu ghe Osanobua ne ọ rrọọ. Te Nọyaẹnmwa ne Osanobua ruẹ gha họn avbe ihẹn na ne ọ rri avbe emwa ne ọ kee ẹre unu rre oya. Rhunmwuda ọnii, na erhunmwu ghe Osanobua ne avbe emwa ima ni ghi miẹn uhunmwu.”

Aizaia 42:20

Izrẹl, aro ruẹ miẹn buan sokpan de emwi ne u ghi miẹn ruẹ vbọ? U mwẹ ehọ ne a ya họn ẹmwẹ, sokpan de emwi ne u he gele họn?”

Jerimaia 15:11

E Nọyaẹnmwa, adeghẹ ma ma ga uwẹ ẹse, gie ihẹn ne iran tie sẹ mwẹ egbe. I ma he do rinmwian an ne avbe eghian mwẹ ẹdẹ vbe iran rre uwu ibaro kevbe akhiẹ.

Jerimaia 2:27

Erriọ ọ re a ra ya oya ne uwa ni kha wẹ erhan ọrọre erha uwa, okuta ọrọre iye uwa. Erriọ ọre ọna ra sunu rhunmwuda, wa fi iyeke gbe mwẹ vbe ọ te kei ne uwa bu mwẹ gha dee. Sokpan, wa gha rre uwu ibaro, wa ghi wẹ ne I do miẹn uwa fan.

Jerimaia 21:2

“Lahọ, wa gu e Nọyaẹnmwa guan ne ima, rhunmwuda, e Nebukiadneza ne ọba e Babilọn kevbe ivbiyokuo ẹre ghae ga ẹvbo nẹ. U gha ghe, e Nọyaẹnmwa gha winna ọkpa vbe uwu avbe iwinna ọyunnuan rẹn ne ima, ọ ghi ru ẹe ne Nebukiadneza werriegbe.”

Jerimaia 36:7

Ughaghe, iran gha na erhunmwu ghe Nọyaẹnmwa, ne iran vbe fiwerriẹ hin odẹ dan iran rre, rhunmwuda, e Nọyaẹnmwa niẹn obọ ye emwa rẹn aro nẹ vbe uwu ohu kevbe okuosu ẹre ne ọ mu ohan.”

Jerimaia 37:20

Banbanna nian, lahọ danmwehọ mwẹ Umogun, ne u vbe ru vbene I ra tama ruẹn. Lahọ ghẹ ghi rhie mwẹ werriegbe gha rrie eghan ne ọ rre owa e Jonatan. U gha rhie mwẹ gha khian, I gha wu ye evba.”

Jerimaia 37:3

E Zedekaia keghi giee Jehukal ne ovbi e Sielemia kevbe Zẹfanaia ne ovbi Maaseia wẹ ne ọ do tama mwẹ ne I na erhunmwu ghe Nọyaẹnmwa Osanobua ne ẹvbo mwa.

Jerimaia 38:14

Ọ ghi vbe sẹ ẹghẹ ọvbehe, e Zedekaia ne ọba keghi giee ne a tie mwẹ gha die onurho Ọgua Osa ne ogieha ọ keghi tama mwẹ wẹẹ, “I ho ne I nọ ruẹn ota okpa, u ghi wa ta ẹmwata ne ọ rrọ ma mwẹ.”

Jerimaia 40:15

Ẹre Johanan na hẹko tama rẹn wẹẹ, “Gun mwẹ ya gbe Ismaẹl rua, ọmwarhọkpa i vbe rẹn ọmwa ne ọ ru ẹe. Vbọzẹ ne a gha na rhie otọ ne ẹẹn ne ọ ya gbe uẹ ua. Ọnii gha zagha avbe Ju ni te do lẹga ruẹ na hia kua, ọ ghi vbe si ọfuan gie emwa hia ni rre Juda.”

Jerimaia 42:20

Ighẹ uwu abakuru nọkhua ọ re uwa wa ye na. Wa ọ re ọ tama mwẹ ne I na erhunmwu ghe e Nọyaẹnmwa ne Osanobua ima ne uwa, wa na vbe yan wẹ, emwi ne ọ rhirhi a khama uwa ne uwa ru, wa gha ru ẹe.

Eve Orriara 1:1

U miẹn vbe Jerusalẹm ghi divbiẹ hẹ ẹvbo ne emwa na te hu yo hu rre! Ne otagbọn hia te go wan te ọ ghi ye vbe okhuo ne ọ dẹgbẹ; ẹvbo ne ọ te re ne ọ hin usi sẹẹ ehia do khian ne ọ ghi re ọviẹn.

Ezikiẹl 12:16

I gha gie ihozẹghẹ vbe uwu iran miẹn uhunmwu vbe nene okuo, ukhunmwu kevbe emianmwẹ, vbene a gha na miẹn wẹ iran ghẹ ghi gha rre uwu ẹbu ẹvbo ọvbehe nẹ, iran gha rẹn vbene uyinmwẹ iran zughu ọmwa ẹko hẹ, iran ghi miẹn kue ighe mẹ ọrọre Nọyaẹnmwa.”

Hozia 8:10

“Sokpan banbanna nian, mẹ ra si iran koko ne I rri iran oya. Vbe ọ ma he kpee wan, iran gha wunnu yo wunnu rre vbe uwu obalọ, vbe ọba Asiria a ra gha wọ iran uhunmwu.

Levitikọs 26:22

I ghi gie aranmwẹ oha dan la uwu uwa, iran ghi gha gbele avbe ivbi uwa, iran gha fuẹn avbe ẹmila uwa a, wa ne ọ gha sẹ rae ghi gha re ibozẹghẹ sẹrriọ wẹ a i ghi ra gha miẹn emwa vbe urodẹ rua.

Emọs 7:2

Vbe uwu umian nii, I keghi bẹghe vbe avbe irhiso wa rri irunmwu ni ghi bi nunuunu hia vbe otọe nii, ọre imẹ na kha wẹẹ, “E Nọyaẹnmwa ne Udazi, yabọ emwa ruẹn, vbe iran ra ya miẹn uhunmwu hẹ vbe ọna? Iran wa kanmwa, iran ma vbe wegbe!”

Matiu 24:22

Sokpan Osanobua fian inu ẹdẹ ne ọ ra ya vbe otọ kanmwa nẹ. Akpawẹ ọ ma fian ẹdẹ ni kanmwa, orhiọnkpa ne ọ gha miẹn uhunmwu, ẹ i rrọọ. Sokpan Osanobua gha rhunmwuda iran ne ọ hannnọ zẹ fian ẹdẹ ni kanmwa.

Iwinna 8:24

Saimọn tama Pita kevbe Jọn wẹẹ, “Lahọ wa rinmwian Nọyaẹnmwa mẹ ne emwi ne uwa tae na rhọkpa ghẹ sunu vbe egbe mwẹ.”

Diuteronomi 28:62

Wa gha rhe do gha bun zẹ vbe orhọnmwẹ ni rre iso, ibozẹghẹ ọ ra miẹn uhunmwu vbọ, rhunmwuda, wa ma họn ẹmwẹ e Nọyaẹnmwa Osanobua rua.

Diuteronomi 28:63

Zẹ vbene Nọyaẹnmwa wa yan gha zẹ ọma ne agbọn ku uwa, kevbe ne ọ na vbe gie uwa gha bun yọ, erriọ ọ re ọ ra vbe yan fuẹn uwa a, kevbe ne ọ vbe mu ọ rhiae lele uwa. A ghi ho uwa bẹkun vbe otọ ni ne uwa ra yin na.

Diuteronomi 4:27

E Nọyaẹnmwa gha zagha uwa a lele uwu agbọn ẹvbo ọvbehe, Ibozẹghẹ ọ ra miẹn uhunmwu vbe uwu uwa vbe odọ niii.

Jems 5:16

Rhunmwuda ọnii, wa gha miẹn orukhọ uwa kue ma egbe, wa ghi vbe gha na erhunmwu ne egbe. Ne egbe miẹn ehe na rran uwa. Erhunmwu ọmwa ẹmwata wa mwẹ ẹtin ne a ya winna iwinna ẹtin ẹsẹse.

I Samuẹl 12:19

Iran keghi tama e Samuẹl wẹẹ, “Dọmọ ọ, lahọ na erhunmwu ghe e Nọyaẹnmwa ne i ma, ne ima ghẹ wulo. Ma ru orukhọ ba orukhọ nekpa hia ne ima na nọọn ne a rhie ọba ne ima.”

I Samuẹl 12:23

Zẹ vbe ọghomwẹ, awua ne Osanobua wẹẹ, te imẹ ghi da obọ erhunmwu ne a na ne uwa yi, ne imẹ ya la ekpa ọnii rukhọ ghe ẹre. Ne ọ gha na te gha ye vberriọ, I gha ma uwa emwi ne ọ kere ke ne ọ gbae ne uwa gha ru.

I Samuẹl 7:8

“Gha na erhunmwu ghe e Nọyaẹnmwa Osanobua mwa ne ọ miẹn ima fan vbe obọ ivbi e Filistia.”