Jerimaia 23:4 - Edo Bible (E Baibol Ẹdo) Version 1996

⁴ I gha zẹ enikhaemwisẹ ne iran gha gbearoghe iran. Ohan i ghi ra ye gha mu emwa mwẹ ra ne afianma gha fian iran, mẹ i ghi dọlegbe rri iran oya. Mẹ ne Nọyaẹnmwa ta ẹe nẹ.”

Jerimaia 23:4 Iomraidhean Croise

Aizaia 11:11

Ọ gha sẹ ẹdẹ nẹdẹrriọ, e Nọyaẹnmwa gha dọlegbe lo ẹtin ẹnrẹn, ọ ghi viọ iran gha die owa ighẹ avbe emwa rẹn ni ghi dekẹe vbe Asiria kevbe Igipt, vbe otọe Patros, e Sudan, Ẹlam, e Babilọn kevbe Hamat, deba ni rre avbe eghute kevbe avbe otọe ne amẹ lẹga vbe okun.

Jerimaia 30:10

“Wa ghẹ gie ohan mu uwa, wa ne emwa mwẹ wa ne ivbi Izrẹl, wa ghẹ fian afianma I gha dẹ uwa werriegbe ke odẹ ne ọ rrei ni rre, ke otọ ne uwa na re oghunmwu rre wa gha rri owa, wa ghi gha rre ọfumwegbe ẹkun gha sẹ uwa otọ, ọmwa rhọkpa ne ọ gha runran uwa i rrọọ.

Jerimaia 31:10

E Nọyaẹnmwa khare wẹẹ, “Wa ne uhunmwu ẹvbo, wa danmwehọ mwẹ, ne uwa ta uhunmwu ne I gie vbe eghute ne ọ rrei, I zagha avbe emwa mwẹ kua, sokpan, I gha vbe si iran koko. I ghi gha su iran vbene ọsuohuan su avbe ohuan rẹn.

Jerimaia 33:26

Zẹ vbene I wa vbe ru ena gbangbaangban, erriọ I ra ye obọ mu ile ne I gu ivbi uniẹn e Devid taa. I gha zẹ ovbi uniẹn e Devid ọkpa, ne ọ gha khaemwisẹ yan ivbi uniẹn Ebraham, Aizik kevbe Jekọb. I gha tohan emwa mwẹ, I ghi vbe ru ẹe ne agbọn dọlegbe maa iran.”

Ezikiẹl 36:11

I gha ru ẹ ne emwa nagbọn kevbe avbe ẹmila gha muan yọ. Wa gha bun sẹẹ vbene uwa te ka ye yi, wa gha vbe biẹlẹ emọ nibun. I gha gie uwa yin evba nii vbene uwa te ka gha ye yi, I ghi vbe ru ẹe ne agbọn ma uwa sẹẹ vbene uwa ka ye yi. Ẹghẹ nii, wa gha rẹn wẹ mẹ ọrọre Nọyaẹnmwa.

Levitikọs 26:9

I gha fiangbe uwa, I ghi vbe viọ emọ ni bun ne uwa, I ghi mu e nọkanmwasẹ vbe ile ne ima gba ta sẹ.

Maika 4:4

Edọmwadẹ ọghọe gha rrọọ vbe ọfumwegbe vbe ugbo azara kevbe oliv ẹre, ọmwarhọkpa i ghi vbe runran ẹẹn. E Nọyaẹnmwa ne Oghodua ru eyan na nẹ.

Maika 5:2

E Nọyaẹnmwa khare wẹẹ, “Bẹtlẹhẹm Efrata, ọkpa vbe uwu ẹvbo ni kanmwa sẹẹ vbe Juda ọre uwẹ khin, sokpan, uwu uwẹ ọ re I gha ke rhie ne ọ khaemwisẹ ladian ne Izrẹl, rẹn gha vbe ke uniẹn nẹdẹ ne a ka ya gha bu ẹvbo nii ladian.”

Maika 7:14

Nọyaẹnmwa, gha re ne ọ su ohuan avbe emwa ruẹn, emwa ne u hannọ zẹ. A gha rhe miẹn wẹ iran ọkpa ọ ya yin fua vbe otọ ẹgbo, otọe ne ọ maa emwiokọ lẹga iran. Gie iran ya gha koko egbe iran vbe ehe ne oha ne aranmwẹ na rri evbare ne ọ mobọ maa nii, vbe Basian kevbe Giliad, zẹ vbene iran gha ru vbe ẹghẹ ne ọ kpee fua.

Zẹfanaia 3:13

Ivbi Izrẹl ni miẹn uhunmwu vbọ i fu ọmwa, iran i ra tọlọ ọmwa, iran i ra ta ohoghe ra ne iran mu ọmwa rẹrẹ. Agbọn gha ma iran, ẹkun gha vbe sẹ iran otọ vbene iran i na mu ohan ọmwa ikọmwa.”

Nọmbas 31:49

“Enọwanrẹn, ma kevbe avbe ivbiyokuo ni rre ototọ ima nẹ, ọkpa kẹkan ne a ma miẹn, ẹ i rrọ.

Iyẹn ne ọ Maan Ọghe Jọn 17:12

Ẹghẹ ne I na gha gu iran rrọ, ẹtin eni ruẹn ọre I ya tan ifuẹn gue iran, eni ne u mu mẹ nii, I gele tan ifuẹn gue iran, a ma miẹn ne ọ fuan vbọ, gberra ọkpa nii ne a wẹ te ọ ra fuan, ne ẹmwẹ ne ebe ne ọ huanrẹn ta ẹe miẹn ehe na sẹ.

Iyẹn ne ọ Maan Ọghe Jọn 18:9

(Ọ guan ẹmwẹ na ne ẹmwẹ ne ọ tae miẹn ehe na sẹ wẹ, “Evbavba, ọkpa irrọ ne ọ fuan vbe uwu iran ne u hẹ mẹ.”)

I Pita 1:5

Ọ ghe uwa ọre nọ, wa ne a la ekpa ẹsọhẹ ya ẹtin Osanobua rhie lẹre, vbe ne a i na mwẹ ẹbe, vbe uwu ne uwa na mudia khẹ imiẹnfan, ne a gha rhie ne emwa hia miẹn vbe ẹdẹ ufomwẹ ẹghẹ.