Jerimaia 20:12 - Edo Bible (E Baibol Ẹdo) Version 1996

¹² Sokpan, e Nọyaẹnmwa ne Oghodua wẹ danmwẹ emwa ghe vbene ọ kei yi; wẹ rẹn emwi ni rre ekhọe kevbe ẹko iran. Rhunmwuda ọnii, gun mwẹ miẹn vbe u rria avbe eghian mwẹ ikhi, rhunmwuda, wẹ ọ re I rhie ẹdagbọn mwẹ ye ọre obọ.

Jerimaia 20:12 Iomraidhean Croise

II Krọnikol 24:22

Ọba keghi mianmian ugamwẹ vbene Jehoiada ne erha Zẹkaraia ya ekhọe hia gae hẹ, ọ na gbe Zẹkaraia a. Ugbẹn vbe Zẹkaraia ghi ra wu, ọ keghi datu wẹẹ, “Te Nọyaẹnmwa gha bẹghe emwi ne u ru na ne ọ rria ruẹ ikhi yọ.”

Psalm 11:5

Rẹn ọ re ọ ghe ọmwa esi, ke ọmwa dan vbe abọ ọkpa ni. Ọ kakabọ khuiwu iran ne ẹi mu uhi sẹ.

Psalm 139:23

Gualotọ mwẹ Nọyaẹnmwa, ne u rẹn vbene ekhọe mwẹ ye hẹ; danmwẹ mwẹ ghe, ne u rẹn iro ekhọe mwẹ.

Psalm 17:3

U gba ekhọe mwẹ. Wẹ ka bu mwẹ rre yi vbe asọn, u gualọ otọ mwẹ fo fẹẹrẹ. U ma vbe miẹn iho emwi dan vbe uwu ekhọe mwẹ, I ma ta ẹmwẹ dan.

Psalm 54:7

U miẹn mwẹ fan hin uwu ibaro mwẹ hia rre aro mwẹ miẹn ọẹn vbe obọ ke ukhunmwu ne avbe eghian mwẹ.

Psalm 58:10

Ẹko gha rhiẹnrhiẹn ẹmwata, vbe iran a miẹn wẹ a rri emwa dan oya, iran gha tubu la esagiẹn emwa dan gberra.

Psalm 59:10

Osanobua mwẹ ho ẹmwẹ mwẹ, ọ gha rrọ mwẹ rre, ọ gha gun mwẹ miẹn iyeke avbe eghian mwẹ.

Psalm 62:8

Wa ne emwa mwẹ, wa mu ẹtin yan Osanobua vbe ẹghẹ hia, wa ta enegbe uwa hia ma rẹn, rhunmwuda rẹn ọrọre ugue ne ima.

Psalm 7:9

Osanobua ẹmwata ọ re uwẹ khin, wẹ keghi vbe bu ohiẹn iro ne ima zẹ, kevbe emwi ne ima ho. Dobọ emwi dan avbe emwa dan yi. Ne u vbe san avbe emwa esi ẹse.

Psalm 86:4

Ya ẹko ọguọmwadia ruẹ rhiẹnrhiẹn Nọyaẹnmwa rhunmwuda, erhunmwu hin bu ruẹ dee.

Aizaia 37:14

Ẹre Hẹzekaia ne ọba na miẹn emwa ne iran gie rre ebe nii, ọ na tie ẹre. Ẹre ọ na gha rrie Ọgua Osa, ọ na rhie ebe nii ye evba vbe odaro e Nọyaẹnmwa.

Aizaia 38:14

Urhu mwẹ ye wẹnrẹn, ọ ma vbe wegbe I ke gha tu ye uwu ẹko zẹvbe idu. Te aro mwẹ ghi ye kuọkuọkuọ, ne I ya ghe odukhunmwu. E Nọyaẹnmwa, wọlọ mwẹ hin uwu avbe ọlọghọmwa na rre.

Jerimaia 11:20

Ọ re I na na erhunmwu wẹẹ, “E Nọyaẹnmwa ne Oghodua, ọbuohiẹn ne ẹ i bu eku ọ re uwẹ khin, wẹ ọ re ọ danmwẹ iro ekhọe emwa kevbe vbene emwi ye iran hẹ, ghe I mu ẹmwẹ enegbe mwẹ ye uwẹ obọ, rhunmwuda ọnii, gie aro mwẹ sẹ ọe vbe u gha rria iran na ikhi.”

Jerimaia 12:8

Emwa mwẹ ne I hannọ zẹ mu aro igbinna da mwẹ nẹ, iran gha vannọ okan yan mwẹ zẹ vbe oduma vbe uwu oha, rhunmwuda ọnii, ohu iran mu mwẹ.

Jerimaia 17:10

Mẹ ne Nọyaẹnmwa ọ re ọ gualọ otọ ẹko ghe, I vbe gualọ otọ ekhọe ọmwa, vbe ne dọmwadẹ ọghọe ru emwi, ọ re I vbe ya ye ohọ mu ẹẹn. Zẹ vbene emwi ne ọ ru vbe ye.”

Jerimaia 17:18

Fa iran ni kpokpo mwẹ uan, sokpan gie ẹe la mwẹ ban Nọyaẹnmwa. Ye ohan vuọn iran, sokpan, ghẹ runran mwẹ. Gie ọkhọ rruan iran, ne u dunmwu iran rẹnkhẹnrẹnkhẹn.

I Pita 2:23

Ugbẹn vbe a tie ihẹn nẹẹn, ọ ma tie ha osa. Ugbẹn vbe ọ rri oya, ọ ma ya obọ sa ekhae ne ọmwa rhọkpa, sokpan, ọ keghi wa mu idaehọ ẹre hia yan Osanobua, ọmwa ne ọ bu ohiẹn Ne ẹ i bu eku.

I Pita 4:19

Rhunmwuda ọnii khekherriọ, iran ni rri oya rhunmwuda wẹ, vbene Osanobua wẹ emwi gha ye iran hẹ nọ, wẹ ne iran la ekpa uyinmwẹ esi iran wa ya egbe iran hia yan Ayi ne ọ yi iran, ọmwa ne ọ re ne ẹ i hiẹ ọmwa.

Arhie Maan 18:20

Wa ne ẹrinmwi, wa gha ghọghọ ye ne okhuo na na fuan! Wa ne emwa Osanobua, wa gha ghọghọ, kevbe avbe ukọ kevbe avbe akhasẹ. Rhunmwuda emwi ne okhuo na ru uwa ẹre, ẹre Osanobua rria ẹre ikhi yi na.

Arhie Maan 2:23

I gha vbe gbele ẹre emọ, ẹghẹ nii, avbe esọsi hia ghi do rẹn wẹ, mẹ ọrọre ọmwa ne ọ rẹn iro ne ọmwa zẹ vbe ekhọe ẹre kevbe emwi ne ọ hoo. I gha do hae ne edọmwadẹ ọghọe vbe uwu uwa zẹ vbe iwinna ne uwa winnaẹn.

Arhie Maan 6:10

Iran keghi ye urhu ne ọ la datu wẹẹ: “Oghodua Nọyaẹnmwa, ne ọ huanrẹn kevbe ọmwa ẹmwata. Vbe ọ gha kpẹe sẹ hẹ yi u ke ya bu ohiẹn emwa ni rre agbọn, ne u vbe rri iran oya ye ne iran na gbele ima uan?”

I Samuẹl 1:15

Rẹn keghi wanniẹn wẹẹ, “Ẹ i re erriọ enọwanrẹn, I ma da ayọn, I ma he vbe da ayọn usin. Oya ọ re ọ ru mwẹ, ọ re I na gha na erhunmwu, I keghi mu ẹmwẹ enegbe mwẹ hia ma e Nọyaẹnmwa.