Jerimaia 19:5 - Edo Bible (E Baibol Ẹdo) Version 1996

⁵ Iran bọlọ Ogiukpo ne Baal ne iran na gha giẹn ivbi ran an ya gha zọ ese. Mẹ ma tama iran ne iran ru emwi na, ọ ma vbe gha rrọ mwẹ ekhọe vbe ẹghẹ ikẹ ghẹ.

Jerimaia 19:5 Iomraidhean Croise

II Ọba 17:17

Iran keghi ya ivbi iran ne ikpia kevbe ne ikhuo gha zọ ese ne a giẹn uan ne ẹbọ iran ne ni ga ẹbọ, iran keghi ya gha bọ vbe ọghe ọbiro kevbe ọfiakpẹlẹ, iran keghi mu egbe iran yọ wẹ emwi pe ọ ma gba iran khian gha ru vbe odaro e Nọyaẹnmwa, rhunmwuda ọnii, iran keghi ya ẹe mu ohu.

II Ọba 21:6

Ọ keghi ye ovbi ẹre ne okpia zọ ese ne a giẹn uan. Rẹn kegha fi iha ọ kevbe gha ru ẹbo edunna, ọ kevbe gha bọ vbe ọghe ọbo kevbe iran ni gu ẹrinmwi guan. Ọ keghi kakabọ sẹ ẹmwẹ e Nọyaẹnmwa, ọ na gie ẹe mu ohu.

II Krọnikol 28:3

ọ kegha giẹn eturari vbe Iya Hinọm, uhin ighẹ te ọ ya ovbi ẹre ne okpia zọ ese ghe amazẹ, ọ kegha ya egbe ta uyinmwẹ ẹwia ọghe emwa ne Nọyaẹnmwa khulo kua vbe otọe nii vbe ivbi Izrẹl dee.

Jerimaia 32:35

Iran bọọ Ogiukpo ne Baal vbe Iya Hinọm, ne iran ya gha ya ivbi iran nikpia kevbe nikhuo zọ ese vbe evba ne ẹbọ ne a tie ẹre Molẹk. Mẹ ma tama iran ne iran ru emwi na, ọ ma vbe gha zẹdẹ rrọ mwẹ ekhọe wẹ ne iran ru emwi vberriọ, ne iran ya si emwa e Juda obọ fi orukhọ.”

Ezikiẹl 16:36

Vbenian ọ re Nọyaẹnmwa ne Udazi khare: “U bannọ ukpọn ruẹn hia kua u keghi wẹ iran larre ighẹ egbakhian ruẹn kevbe avbe ẹbọ osọnnọ ruẹn hia, zẹ vbe igberagia zẹẹ, u keghi gbele avbe ivbuẹ ya zọ ese ne avbe ẹbọ.

Ezikiẹl 20:26

I keghi gie iran gha ya emwi imuohan iran mu awua ye egbe iran egbe, I keghi vbe gie iran gha ya ivbi iran ne ọdiọn ne ikpia zọ ese. Ọna keghi re ne a ya rri iran oya, kevbe ne a ya rhiema iran ighe mẹ ọrọre Nọyaẹnmwa.

Ezikiẹl 38:10

Ẹmwẹ ne Nọyaẹnmwa ne Udazi tama e Gọg ọ re ọ ọna khin, “Ọ gha ghi sẹ ẹghẹ nii, u gha suẹn gha mwamwa emwamwa dan vbe ẹko ruẹ.

Daniẹl 2:29

“Ugbẹn vbe u ghi vbiẹ, Umogun, u keghi mina vbekpa ẹdẹnakhuẹ, Osanobua ne ọ rhie emwi oro ma emwa, keghi rhie ma ruẹn emwi ne ọ ra do sunu.

Levitikọs 18:21

Ghẹ rhie ovbi uẹ rhọkpa ne iran ya gho ẹbọ Milkọm rhunmwuda ọnii gha yagha eni Osanobua ne ọ re Nọyaẹnmwa.

Nọmbas 22:41

Owiẹ ne ọ lelẹe, e Balak keghi rhie Balam gha rrie uhunmwu oke Bamot Bal. E Balam keghi sẹtin ke evba bẹghe eso vbe ivbi Izrẹl.

Diuteronomi 12:31

Wa ghẹ ga e Nọyaẹnmwa Osanobua rua vbene iran ya gho ẹbọ iran, rhunmwuda, iran gha gho ẹbọ iran, iran ghi ru emwi osọnnọ hia ne ọ sọnnọ e Nọyaẹnmwa. Uhin ighẹ te iran ya ivbi iran zọ ese vbe uhunmwu aka iran.