Jerimaia 18:10 - Edo Bible (E Baibol Ẹdo) Version 1996

¹⁰ Sokpan, ẹvbo nii keghi gha yan mwẹ zẹ, ọ na ya gha ru emwi dan, I i ghi vbe ru emwi ne I te wẹ I ra ru.

Jerimaia 18:10 Iomraidhean Croise

Psalm 125:5

Sokpan, u gha rria iran ne emwa dan ikhi u ghi vbe rria iran ni yangbe odẹ ruẹ ikhi. Ọfumwegbe gu Izrẹl rrọọ!

Ezikiẹl 18:24

“Sokpan, a deghẹ ọmwa esi dobọ emwi esi ne ọ ru yi, ọ na suẹn ya gha ru emwi osọnnọ dan ne avbe emwa dan ru, ọ gha miẹn uhunmwu ra? Hiehiere! A i ghi ye avbe emwi esi ne ọ te ka ru rhọkpa rre. Ọ gha wu ye a i ta ẹmwata kevbe orukhọ ẹre.

Ezikiẹl 33:12

“Banbanna nian, ovbi ọmwa tama ivbi Izrẹl wẹ ọmwa esi gha ru orukhọ, emwi esi ne ọ ka ru yi i sẹtin miẹn ẹnrẹn fan. Adeghẹ ọmwa dan dobọ emwi dan ne ọ ru yi, a i ghi rri ọre oya. Ọmwa esi gha vbe suẹn do gha ru orukhọ, ẹ i miẹn uhunmwu.

Ezikiẹl 33:18

Ọmwa esi gha dobọ emwi esi ne a ru yi, ọ na do gha ru emwi dan, te ọ ya uhunmwu khiẹ ọre.

Ezikiẹl 45:20

Ọ gha ghi sẹ ikpẹdẹ ne ogihinrọn ọghe uki nii, a ghi vbe rhunmwuda emwa ni ru orukhọ ne ọ han ne ẹẹn ru ra ọghe a ma rẹn, ru ẹe vberriọ. Odẹ vbenian, a gha sẹtin ya Ọgua Osa khian ne ẹ i mwẹ awua.

Zẹfanaia 1:6

I gha fuẹn iran ighe iran ni werriegbe, ne iran na ma ghi lele mwẹ ọvbehe, iran ni ma bu mwẹ rre do nọ mwẹ wẹ ne I ru igiodẹ ne iran.”

Nọmbas 14:22

Ọkpa vbe uwu iran na ne ọ gha rre agbọn, ne ọ vbe lao otọe nii, ẹ i rrọ. Iran miẹn uwanmwẹ ne ẹ i gia ghe ne a ya rẹn ighẹ I rre evba nẹ, kevbe iwinna ọ yan unu uan ne I winnaẹn vbe Igipt, kevbe uwu ẹgbo, sokpan iran keghi ye gha fi obọ yọ mwẹ unu yan egbe yan egbe, iran na he ne iran họn ẹmwẹ mẹ.

Nọmbas 14:23

Iran i lao otọ ne I ve avbe erha iran odede ẹre. Uwu iran hia ni he mwẹ nii, ọkpa ne ọ gha larọ ẹ i rrọọ.

Nọmbas 14:34

Ukpo iyeva ọre uwa ra ya rri oya ye orukhọ uwa, ukpo ọkpa ye ikpẹdẹ ọkpọkpa ne uwa ya ghe otọe ni ghe. Wa gha rẹn emwi ne a ya kha we ne uwa si okuo mwẹ rrie egbe!

I Samuẹl 13:13

E Samuẹl keghi wanniẹn wẹẹ, “Emwi ukọnmwẹ ọ re uwa ru nii. U ma ru vbene Nọyaẹnmwa Osanobua ruẹ tama ruẹn. Akpawẹ te u họn ẹmwẹ ọnrẹn, ọ gha gie uwa vbe uniẹn ruẹn gha khaemwisẹ yan Izrẹl ẹdẹdẹmwẹdẹ.

I Samuẹl 15:11

“Ọ da mwẹ ne I na ma e Sọl ọba, ọ fi iyeke gbe mwẹ nẹ, te ọ ghi rra uhi mwẹ.” Ohu keghi mu e Samuẹl, ọ na ye asọn ni hia rinmwian e Nọyaẹnmwa.

I Samuẹl 15:35

E Samuẹl ma ghi dọlegbe miẹn ọba vbe ẹghẹ ne ọ ghi ya vbe agbọn, sokpan, ọ keghi khiẹ ọre. Ọ keghi da e Nọyaẹnmwa wẹ rẹn ma e Sọl ọba Izrẹl.

I Samuẹl 2:30

Mẹ ne Nọyaẹnmwa ne Osanobua ọghe Izrẹl ọ re ọ yan rẹn vbe ẹghẹ ne ọ gberra wẹ ẹwae ruẹ kevbe ẹgbẹe ruẹ, gha ga mwẹ zẹ vbe ohẹn ẹdẹdẹmwẹdẹ sokpan, banbanna nian, I khare wẹ I i ghi mwẹ obọ vbọ sokpan, I gha daa ne iran ni daa mẹ, sokpan, iran ni zan mwẹ, I gha fa iran an.