Jerimaia 15:2 - Edo Bible (E Baibol Ẹdo) Version 1996

² Iran gha nọ ruẹn wẹ de ehe ne iran ra gha rrie, tama iran wẹ I khare re wẹẹ: “Eso rrọ ne emianmwẹ ra gbele ehe ne iran ra gha rrie ọre ọnii khin! Eso rrọ ni gha wulo vbe okuo ehe ne iran ra gha rrie ọre ọnii khin! Eso rrọ ne ohanmwẹ gha gbele ua ehe ne iran ra gha rrie ọ re ọnii khin! Eso rrọ ne a gha viọ ẹre oghunmwu gha rrie. Ehe ne iran ra gha rrie ọre ọnii khin.

Jerimaia 15:2 Iomraidhean Croise

Aizaia 10:4

Iran gha gbele uwa a vbe okuo ra iran ghi silo uwa viọ gha rrie zẹ vbe oghunmwu. Ọ gha rhe ye rrio, ohu e Nọyaẹnmwa i he ye fo, obọ ẹre gha ye niẹn ladian ne ọ ya rria ikhi.

Aizaia 24:18

Ọmwa ne ọ wẹ rẹn ra lẹ ne ugborrirri nii, gha de ye uvun, ọmwa ne ọ vbe lẹ hin obọ uvun rre, ọ ghi de ye ifi. Okpamẹ nọkhua gha gbefua ke iso rre, ẹyotọ agbọn gha vbe mu rueghe.

Jerimaia 14:12

Ọ gha khọn iran wẹ ne iran yo aguẹ, I i zẹ ye eve ne iran ya nọ iyobọ, ọ gha khọn iran, iran zọ ese na giẹn uan mẹ, ra imuohan ọghe ọka, ẹko mwẹ i ra rhiẹnrhiẹn ghe iran sokpan, I gha ye okuo gbele iran an, kevbe ohanmwẹ, deba emianmwẹ.”

Jerimaia 14:16

Erriọ ọ re a ra vbe gbele iran ne iran talọ avbe ẹmwẹ na ma. A gha filo ikun iran ku adesẹ ore Jerusalẹm, a i vbe miẹn ọmwa ne ọ gha re iran. Emwi ne ọ ra rruan iran hia ọ re ọna khin, ya sẹ egbe avbe amwẹ iran, ivbi iran nikpia kevbe ivbi iran nikhuo. I gha ru ẹe ne iran ha osa ekhọe dan iran.”

Jerimaia 16:4

Emianmwẹ ne ọ mu ohan ọ re ọ ra gbele iran, a i vbe miẹn ọmwa ne ọ ra khiẹ ra ne ọ ra re iran. Ikun iran gha lele otọ zẹ vbe emwi ne a ya kọ emwiokọ ne ọ na kakabọ maa, a gha gbele iran vbe okuo ra ohanmwẹ gha gbele iran an, ikun iran gha khian evbare ne avbe ahianmwẹ kevbe aranmwẹ oha.

Jerimaia 19:7

Emwa na I ra na duẹ uma ivbi e Juda kevbe Jerusalẹm hia a, I gha gie obọ avbe eghian iran ke okhunmwu ne iran, iran ghi gbele iran vbe okuo. I ghi viọ ikun iran ne avbe ahianmwẹ kevbe avbe aranmwẹ oha gha re.

Jerimaia 43:11

E Nebukiadneza gha rre do khọn Igipt. Iran ne a kha re ighe emianmwẹ ọ ra gbele iran, emianmwẹ gha gbele iran, iran ne a wẹ te a ra munọ iran oghunmwu gha rrie, a gha munọ iran oghunmwu gha rrie, iran ne a khare ighe te a ra gbele iran vbe okuo, a gha gbele iran vbe okuo.

Ezikiẹl 12:11

Tama iran wẹ emwi ne u ru hia kegha re ama emwi ne ọ gha sunu vbe egbe iran — iran gha khian emwa ni lẹ ku ẹvbo ẹrrẹe kevbe oghunmwu.

Ezikiẹl 14:21

Vbenian ọ re Nọyaẹnmwa ne Udazi khare: “I gha gie emwi ne I ya rri emwa oya enẹ ni khọ sẹ gha rrie Jerusalẹm, ena ọrọre okuo, ukhunmwu, aranmwẹ akọn, kevbe emianmwẹ, ne I ya fuẹn emwa nagbọn kevbe avbe aranmwẹ ba ẹre.

Ezikiẹl 33:27

“Tama iran wẹ mẹ ne Nọyaẹnmwa ne Udazi tama iran wẹ omwa vbe ne aro na dae wẹ mẹ ọrọre Osanobua ne ọ rrọ, te a ra gbele iran ni rre ẹvbo ne a rẹnkhuan nii hia a. Aranmwẹ oha gha rri iran ni rre avbe igue, emianmwẹ gha gbele iran ni lẹre ye uvun okuta kevbe avbe uhunmwu oke.

Ezikiẹl 5:12

A gha wa uwa ye ihe eha, ohanmwẹ kevbe emianmwẹ gha gbele obọkpa vbọ ye adesẹ ore ẹvbo, a gha ya umozo giagia obọkpa vbọ ye vbe a ladian ore ẹvbo ne, I gha zagha obọkpa ne ọ ghi kẹe vbọ ku ẹhoho, I ghi ya umozo gha khulo iran khian.

Ezikiẹl 5:2

U ghi gien obọkpa vbọ vbe adesẹ ore ẹvbo nii vbe okuo a ghi khọn gberra nẹ. U ghi viọ obọ ne ogieha nọkpa, u ghi ya umozo nii gha giagia ẹe kua vbe u a gha khian lẹga vbe u a ghi lahin ore ẹvbo nii rre nẹ. U ghi zagha obọ ne ogieha ne ọ dekẹe ku ẹhoho, mẹ gha ya umozo mwẹ khu ẹe.

Daniẹl 9:12

U ru avbe emwi ne u khare ighe u gha ru ima kevbe iran ni mwẹ asẹ vbe uhunmwu ima re. U rrii e Jerusalẹm oya ne obọ da ẹe sẹe vbene u he ru ẹvbo ọvbehe ne ọ rhirhi a gha khin vbe otọ agbọn re.

Emọs 5:19

Te ọ ra yevbe ne ọmwa lẹ ne oduma, ọ na dekun akpakomiza! Ra ọmwa ne ọ lẹ la owa, ọ na rhie obọ yan ekẹn, ẹyẹn keghi sa a ẹe.

Zẹkaraia 11:9

Vbe iyeke ọnii, I keghi tama oghẹn ohuan nii wẹẹ, “Mẹ i ghi ra gha re ọsuohuan uwa ọvbehe. Gie ni gha wulo vbọ wulo. Ne iran ra fuan vbọ gie iran fuẹn iran uan. Iran ni ghi dekẹe gha gbele egbe iran an.”

Arhie Maan 13:10

Ọmwa ne a kha nẹ ighẹ te a ra mu ẹre izẹghede, te a ra gele mu ẹre izẹghede, ne a wẹ a gha ya umozo gbe ua, te a ra gele ya umozo gbe ẹe ua. I ziengbe kevbe iyayi ọre ọ na nọ rẹn vbe obọ emwa Osanobua.”