Jerimaia 10:12 - Edo Bible (E Baibol Ẹdo) Version 1996

¹² Ẹtin ẹnrẹn ọ re Nọyaẹnmwa ya yii otọe ẹwaẹn ẹnrẹn ọ re ọ ya yii agbọn, ọ kevbe niẹn iso ne ọ vbẹ.

Jerimaia 10:12 Iomraidhean Croise

Gẹnẹsis 1:1

Vbe omuhẹn, vbe Osanobua yi agbọn kevbe emwi hia ni rre iso.

Gẹnẹsis 2:5

erhan rhọkpa ma gha rre otọe, emwi rhọkpa ma he vbe zọọ, rhunmwuda, rẹn ma he gie amẹ he rhọ, ọmwa rhọkpa i vbe rrọọ ne ọ gha kọ emwi ye otọe.

I Krọnikol 16:26

Ẹbọ avbe agbọn ẹvbo nekpa hia, amazẹ kẹkan nọ sokpan e Nọyaẹnmwa ọ re ọ yi avbe ẹrinmwi.

Job 26:7

Osanobua ọ re ọ tan iso ne ọrre odẹ okuọ. Ọ na mu agbọn na rrọ ye ideghedeghe.

Job 37:18

U gha sẹtin gu Osanobua tan iso ra? Ne u vbe ya ẹe wegbe zẹ vbe ematọn ne a fiọnghae yi.

Job 9:8

Ọmwa ne ọ gu Osanobua tan iso i rrọ, ra ne ọ ye owẹ rrilo ugbogiorinmwi ẹzẹ iyeke.

Psalm 104:2

Wẹ ye uwanmwẹ gue egbe ruẹ hia, u tan ẹrinmwi zẹ vbe ibọkpọ.

Psalm 104:24

Nọyaẹnmwa emwi ne u yi wa bun, a miẹn vbene u ya ẹwaẹn ru ehia hẹ! agbọn vuọn ne emwi ne uyi hia!

Psalm 119:90

Ẹmwata ruẹ rrọọ ke orre ya sẹ orre; wẹ ọ re ọ mu agbọn gbọ ye ihe okpa ọ kevbe de ziẹn.

Psalm 24:2

Ọ bọ ẹe yan odin amẹ ne ọ rre uwu otọ. Ọ kevbe gbe ẹyotọ ẹre yan orinmwi amẹ okun.

Psalm 33:6

Ẹmwẹ unu ọ re Nọyaẹnmwa ya yi avbe ẹrinmwi, ẹmwẹ ne ọ tae ọ re ọ yi owẹn, uki kevbe avbe orhọnmwẹ.

Psalm 65:7

U dọ uhumwẹ avbe okun yọ, deba owogho avbe ubimwẹ amẹ u vbe dọ owogho avbe emwa nii yọ.

Psalm 78:69

Evba nii i ọ re ọ bọ Ọgua Osa ẹre yi zẹ vbe owa ẹre ne ọ rre ẹrinmwi. Ọ ru ẹe ne ọ deziẹn zẹ vbe agbọn na tobọ ẹre, ne ọ de ziẹn ẹdẹdẹmwẹdẹ.

Psalm 93:1

E Nọyaẹnmwa ọrọre ọba, a ya uyi ne ọ rre egbe ọba kevbe ẹtin yọ re ẹwu. A mu agbọn uhe sẹ otọ nẹ gbangbaangban ai ghi vbe sẹtin fi ẹe werriẹ.

Itan 3:19

Ẹwaẹn obọ ẹre, ọ re Nọyaẹnmwa ya yi agbọn, irẹnmwi obọ ẹre ọ re ọ ya rhie iso ye ihe ẹre.

Itan 30:4

De ọmwa ne ọ he ruẹ irẹnmwi ẹrinmwi guẹ? De ọmwa ne ọ he gue ẹhoho ye obọ ẹre ẹdẹ? Ra ne ọ ya ukpọn gbalọ amẹ? Ra ne ọ vin uwu ye ehe ne agbọn sẹe? Gha nọ adeghẹ wẹ rẹn ọnrẹn, gha ọ re ovbi ẹre?

Aizaia 37:16

“E Nọyaẹnmwa ne Oghodua, Osanobua Izrẹl, wẹ ne ọ tota ye odukhunmwu ehe ne avbe emwi ne a yi ni zẹ ifuẹn nii ye, wẹ okpa kẹkan ọrọre Osanobua, wẹ ọ re ọ vbe khaemwisẹ yan avbe otọe arriọba ni rre agbọn na hia, wẹ ọ re ọ yi otọe kevbe iso.

Aizaia 40:22

Ọmwa ne ọ tota ye ẹkete ẹre ọ re ọ ru ẹe vbe odukhunmwu agbọn, a ghi gberra iso, emwa ni rre ototọ ye giẹnrẹn vbe iranmwẹ ọ tan agbọn zẹ vbe ukpọn ne a taẹn zẹ vbe owa ukpọn ne ọ mwa ra dia.

Aizaia 42:5

Osanobua ọ re ọ yi iso, ọ keghi niẹn ẹnrẹn uan. Rẹn ọ re ọ yi agbọn kevbe emwi hia ni rre uwu ẹre; rẹn ọ re ọ rhie arrọọ kevbe uhiọnrọnmwẹ ne emwa ẹnrẹn hia. Banbanna nian, e Nọyaẹnmwa Osanobua tama ọguọmwadia ẹre wẹẹ,

Aizaia 44:24

“Mẹ ọrọre Nọyaẹnmwa ne ọ ọmiọnmwafan ruẹn, mẹ ọ re ọ yii uwẹ. Mẹ ọrọre Nọyaẹnmwa ne ọ yii emwi hia. Mẹ ọkpa ọ re ọ tan iso zẹ vbe ukpọn ẹghẹ ne I na yii agbọn, ọmwa ne ọ ru iyobọ mẹ i rrọọ.

Aizaia 45:12

Mẹ ọrọre ọmwa ne ọ yii otọe agbọn I keghi vbe yi emwa nagbọn ne iran gha rre evba. Ẹtin mwẹ ọ re I ya rhaan iso ladian; mẹ ọ re ọ dia owẹn, kevbe uki kevbe avbe orhọnmwẹ.

Aizaia 45:18

E Nọyaẹnmwa ọ re ọ yii iso, rẹn ọrọre ọmwa ne ọ re Osanobua! Rẹn ọ re ọ dọnmwẹ agbọn, ọ na yii ẹe ọ ru ẹe gbain kevbe ne ọ vbe tọ, ọ ma yi ẹre ne ọ dihoi rua ne ọ rhiaẹe. Sokpan ehe ne emwa gha yin. Rẹn ọrọre ọmwa ne ọ khare wẹẹ, “Mẹ ọrọre Nọyaẹnmwa, osa ọvbehe i ghi vbe rrọọ.

Aizaia 48:13

Obọ mwẹ ọ re ọ gbe ẹyotọ agbọn ọ na vbe tan iso gbadaa. I gha gie ne a tie otọe kevbe iso, iran ghi rre vbe ọwarọkpa do rhie egbe ma.

Aizaia 49:8

E Nọyaẹnmwa keghi tama emwa rẹn wẹẹ, “Ẹghẹ gha sẹ ne a gha ya miẹn uwa fan, I gha ru uwa ẹse, I ghi vbe rhie ewanniẹn ye utumwẹ ne uwa tu ya nọ iyobọ. I gha gbearoghe uwa, I ghi vbe degue uwa, obọ uwa ọ re I gha la gu emwa hia ta ile, I gha gie uwa ya dọlegbe tota ye otọ uwa ne ọ he dihoi rua na.

Jerimaia 10:13

Amẹ ne ọ rre odukhunmwu iso ghi davan vbe irẹn a wẹ ne ọ ru vberriọ, ọ ghi ke ehe ne agbọn sẹe viọ okuku rre. Ọ ru ẹe ne ayan gha yan vbe amẹ rhọ ọ ghi giee ẹhoho ladian ke ehe ne ọ viọ ẹre lẹre yi gha dee.

Jerimaia 10:16

Osanobua Jekọb i ye vbe iran, rẹn ọrọre ọmwa ne ọ yii emwi hia, ọ keghi hannọọ Izrẹl zẹẹ ne iran gha re emwa obọ ẹre. E Nọyaẹnmwa ne Oghodua ọ re a tie ẹre.

Jerimaia 14:22

Ọkpa ne ọ sẹtin si amẹ i rre avbe amazẹ avbe uhunmwu ẹvbo, iso i sẹtin ye ẹtin obọ ẹre wẹ ne amẹ rhọ. Wẹ ọre ima mu ẹtin idaehọ mwa yan, e Nọyaẹnmwa Osanobua mwa rhunmwuda, wẹ ọrọre ọmwa ne ọ ru avbe emwi na hia.

Jerimaia 27:5

“Ẹtin kevbe iwegbe mwẹ nọkhua ọ re I ya yii agbọn na, emwa nagbọn kevbe avbe aranmwẹ oha ni rre agbọn, I keghi vbe mu ẹẹn ne ọmwaikọmwa ne ọ yẹ mwẹ.

Jerimaia 32:17

“E Nọyaẹnmwa ne Udazi, wẹ ọ re ọ yii otọ kevbe iso vbekpa ẹtin kevbe iwegbe ruẹ nọkhua, emwiọkpa ne ọ wegbe gbe ne uwẹ, ẹ i rrọọ.

Zẹkaraia 12:1

Uhunmwu ne Nọyaẹnmwa gie rre vbe ekpa Izrẹl ọ re ọna khin, e Nọyaẹnmwa ne ọ tan iso vbe ukpọn, ne ọ yi agbọn, ọ na rhie arrọọ ne ọmwa. Rẹn wẹẹ,

Iyẹn ne ọ Maan Ọghe Jọn 1:3

Obọ ẹre Osanobua la yi emwi hia. Vbe uwu emwi ne a yi hia, ọkpa ne a la iyeke ẹre yi, ẹ i rrọọ.

Kọlose 1:16

Obọ ẹre ọre Osanobua la yi emwi ni rre ẹrinmwi kevbe agbọn na, avbe emwi ne a bẹghe kevbe ne a i bẹghe, ke ẹe kevbe ẹtin avbe orhiọn nẹ ẹrinmwi, eniyan ẹvbo, iran ni khaemwisẹ kevbe iran ni rre ọdakha. Obọ ẹre ọre Osanobua la yi ideghede-gheagbọn vbe ẹrinmwi hia, rẹn ọre ọ vbe yi ẹe na.