Jerimaia 1:17 - Edo Bible (E Baibol Ẹdo) Version 1996

¹⁷ Mu egbe, Jerimaia, ya talọ avbe ẹmwẹ hia ne I we ne u tama iran, ma iran. Ghẹ gie ohan iran mu ẹẹn nian, ne a ghẹ miẹn wẹ te I ghi gie ohan iran mu ẹẹn sayọ vbe u gha sẹ ehe ne iran ye ne.

Jerimaia 1:17 Iomraidhean Croise

I Ọba 18:46

Orhiọn e Nọyaẹnmwa keghi hin ya Elaija, ọ na gba ukpọn rẹn khinkhian ẹkun gbain, ọ na rhulẹ ke aro ne Ehab rhinrin ya sẹ Jezrẹl.

II Ọba 1:15

Odibo e Nọyaẹnmwa keghi tama Elaija wẹẹ, “Lele ẹe gha khian, ghẹ gie ohan mu ẹẹn.” Ẹre Elaija na lele ọkaokuo nii bu ọba gha khian.

II Ọba 4:29

Elaisia keghi mu aro da Gehazi ọ wẹẹ, “Ẹgiẹgiẹ! Rhie ọkpọ mwẹ ne u gha khian. Ghẹ mudia tuẹ ọmwa ne u vba vbe odẹ, a deghẹ emwa vbe tuọ, ghẹ mudia miẹn ẹre otuẹ. Wa la uwu owa nii gha khian ne u ya da ọkpọ mwẹ yi yan ọmọ okpia nii.”

II Ọba 9:1

Vbe uwu eghẹ na, ọ re Elaisia na tie akhasẹ igbama ọkpa, ọ tama rẹn wẹẹ, “Mu egbe ne u do gha rrie Ramọt ne Giliad, u ghi rhie ẹluba ori oliv na mwẹ gha khian,

Job 38:3

Kpaegbe mudia nian, zẹ vbe okpia, ne u gha rhie ewanniẹn ye ọta ne I nọ ruẹn re.

Ẹksọdọs 3:12

Osanobua keghi wanniẹn wẹẹ, “I gha yaba ruẹ, ọ na u gha ya rẹn wẹ mẹ ọre ọ giọ. U gha ghi viọ emwa nii ke Igipt ladian nẹ, u gha do ga mwẹ vbe uhunmwu oke na.”

Ẹksọdọs 7:2

Emwi ne 1 mẹ rhirhi yi ẹre iyi nuẹn, u ghi tama Errọn, rẹn ghi tama ọba ọghe Igipt ne ọ gie ivbi Izrẹl kpao hin ẹvbo ẹre rre.

Jerimaia 1:18

Danmwehọ, Jerimaia, emwa hia ni rre otọe na gha mu aro dan da ruẹ, avbe ọba, e Juda, avbe ekhaẹmwẹ avbe ohẹn, kevbe avbe emwa nii. Sokpan, vbe ẹdẹnẹrẹ na, mẹ rhie ẹtin nuẹn nian ne u ya khẹ iran, te u ra ye vbe ẹvbo ne a gbe odin gaa, orre ematọn, ekẹn oze. Obọ iran i sẹtin ke ukhunmwu ne uẹn, rhunmwuda, I gha rrọọ yaba ruẹ, ne I degue ruẹ, mẹ ne Nọyaẹnmwa ọ re ọ taa ẹe.”

Jerimaia 17:18

Fa iran ni kpokpo mwẹ uan, sokpan gie ẹe la mwẹ ban Nọyaẹnmwa. Ye ohan vuọn iran, sokpan, ghẹ runran mwẹ. Gie ọkhọ rruan iran, ne u dunmwu iran rẹnkhẹnrẹnkhẹn.

Jerimaia 23:28

Akhasẹ ne ọ minaẹn, giee kha ighe imina kẹkan nọ, sokpan akhasẹ ne ọ họn urhu mwẹ, we ne ọ ya ta uhunmwu ne I gie kpẹghẹ. De emwi ne a ye ihunhun ru vbe ehe ne ọka ye yi?

Jerimaia 26:12

Ẹre imẹ na kha wẹẹ, “E Nọyaẹnmwa ọ re ọ gie mwẹ wẹ ne I talọ avbe ẹmwẹ ne uwa họẹn vbe unu mwẹ vbekpa Ọgua Osa na kevbe ẹvbo na.

Jerimaia 26:2

E Nọyaẹnmwa keghi tama mwẹ wẹẹ, “Ya mudia ye ọgua nọkhua ọghe Ọgua Osa, ne u talọ ẹmwẹ hia ne I wẹ ne u ta ma emwa nii kevbe avbe ẹvbo ni ke Juda rre do ga vbe evba. Ghẹ sẹ ọkpa rae vbọ.

Jerimaia 36:8

Ẹre Barọk na gele ya tie ẹmwẹ e Nọyaẹnmwa nii vbe uwu Ọgua Osa, vbene I wa tama rẹn zẹẹ wẹ ne ọ ru.

Eve Orriara 3:57

U zẹmwẹ wanniẹn mwẹ, u keghi tama mwẹ wẹ, ne I ghẹ gie ohan mu mwẹ.

Jona 3:2

Ọ wẹẹ, “Gha rrie Ninevi, ẹvbo nọkhua nii, ne u tama emwa nii uhunmwu ne I giọ re.”

Iyẹn ne ọ Maan Ọghe Luk 12:35

“Wa rra ukpọn mu ẹkun, wa gie ukpa uwa gha baa, ne uwa mu egbe ye otọ khẹ emwi ne ọrhirhi a gha khin.

Iwinna 20:20

Wa rẹnrẹn wẹ vbe uwu emwi hia ne ọ gha ma uwa egbe, ọkpa ne I ke ya ẹ i rrọọ vbe ne I na gha kpe orhu, I keghi vbe gha ma emwa emwi vbe adesẹ ore kevbe dọmwadẹ owa uwa.

Iwinna 20:27

Rhunmwuda, emwamwa Osanobua hia, ọkpa ne I ke ya ne I ma tama uwa ẹ i rrọọ.

I Kọrinti 9:16

Ẹ i re ukpo mwẹ ne I gha rhuọ, rhunmwuda ighẹ I ghi he kpe orhu iyẹn ne ọ maa, ugbẹn vbe a miẹn wẹ, te a ya gie mwẹ uhunmwu ne I gha ru ẹe. Ọ gha ba so mwẹ gbe a deghẹ I ma kpe orhu iyẹn ne ọ maa.

I Tẹsalonaika 2:2

Wa rẹn vbene a ru ima emwi oya hẹ, ne a na vbe fa ima uan vbe Filipai, ma keghi kpao bu uwa gha die Tẹsalonaika. Ọ rhe ye rriọ, Osanobua keghi ye rhie orhiọn ye ima iwu, ne ima ya kpe orhu iyẹn nii ma uwa, a gha rhe miẹn wẹ, vbe adesẹ igbodan nọkhua nọ.

I Pita 1:13

Rhunmwuda ọnii khekherriọ, wa mu ekhọe uwa egbe ye otọ ne a ya fian emwi gbua. Wa rhie vbẹ ne uwa vbe rhie ekhọe uwa aro ye odẹ fẹẹrẹ gha khẹ afiangbe ne a gha rhie ne uwa vbe ẹdẹ ne Jesu Kristi gha ya egbe ladian.