Jems 5:16 - Edo Bible (E Baibol Ẹdo) Version 1996

¹⁶ Rhunmwuda ọnii, wa gha miẹn orukhọ uwa kue ma egbe, wa ghi vbe gha na erhunmwu ne egbe. Ne egbe miẹn ehe na rran uwa. Erhunmwu ọmwa ẹmwata wa mwẹ ẹtin ne a ya winna iwinna ẹtin ẹsẹse.

Jems 5:16 Iomraidhean Croise

Gẹnẹsis 19:29

Sokpan ugbẹn vbe Osanobua fuẹn avbe ẹvbo ni rre iya nii hia, ọ keghi mu ẹmwẹ Ebraham roro, ọ na gie Lọt miẹn uhunmwu vbọ.

Gẹnẹsis 20:17

Nọyaẹnmwa keghi ruẹe ne okhuoikokhuo ghe miẹn ọmọ biẹ vbe owa Abimẹlẹk rhunmwuda emwi ne ọ sunu vbe egbe Sera ne amwẹ Ebraham. Ebraham keghi na erhunmwu ne Abimẹlẹk, Osanobua keghi mu ẹre egbe rran. Ọ kevbe mu amwẹ ọnrẹn ke avbe eviẹn ọnrẹn nikhuo ne iran sẹtin gha biẹlẹ.

Gẹnẹsis 20:7

Sokpan, banbanna na nian, rhie okhuo nii werriegbe gie ọdọ ẹre. Akhasẹ rẹn khin, ọ gha na erhunmwu nuẹn ne u ghẹ wu. Sokpan, a deghẹ u ma rhie ẹre nẹẹn, I tama ruẹn yotọ nian wẹ te u wu, ke uwẹ kevbe ẹgbẹe ruẹ hia.”

Gẹnẹsis 32:28

Okpia nii keghi kha wẹẹ, “A i ghi ra tie eni ruẹn Jekọb ọvbehe. U gu Osanobua kevbe emwa nagbọn suan nẹ, obọ ruẹ keghi ke okhunmwu, rhunmwuda ọnii eni ruẹn ọ re ọ ghi gha re Izrẹl.”

II Samuẹl 19:19

Ọ wẹẹ, “U gha tọ u kpẹre Umogun, lahọ, rhie ekhọe hin a baku ru ne I ru vbe ẹdẹ ne u kpa vbe Jerusalẹm rre. Ghẹ ka ẹe yọ mwẹ owẹ ra ne u ye vbe rhie ẹre ye ekhọe.

I Ọba 13:6

E Jeroboam ne ọba keghi tama akhasẹ nii wẹẹ, “Lahọ na erhunmwu ghe e Nọyaẹnmwa Osanobua ruẹ mẹ ne u tama rẹn ne ọ dọlọ obọ mwẹ yi.” Akhasẹ keghi na erhunmwu ghe e Nọyaẹnmwa, a keghi dolọ obọ ọba yi.

II Krọnikol 30:20

E Nọyaẹnmwa, keghi họn erhunmwu e Hẹzekaia, ọ yabọ emwa nii, ọ ma vbe ru iran emwirhọkpa.

Job 42:8

Banbanna nian, mu ẹmila ihinrọn kevbe ogho ihinrọn giẹ Job, ne uwe ẹre ya ẹe zọ ese ne egbe uwa. E Job gha na erhunmwu ne uwa, I gha vbe họn urhu ẹre, I i ghi ra vbe ru uwa vbene ọ te ma uwa. Wa ma ta ẹmwẹ ẹmwata vbe ekpa mwẹ zẹ vbene irẹn ru.”

Psalm 34:15

E Nọyaẹnmwa, ọ re ọ su e nọ ru emwi ẹse khian ọ vbe danmwehọ utumwẹ iran.

Ẹksọdọs 17:11

E Mosis gha viọ obọ da odukhunmwu, ivbi Izrẹl ghi gha khọnmiotọ, sokpan, ọ gha viọ obọ ghe otọ, ivbi Amalẹk ghi gha khọnmiotọ.

Ẹksọdọs 9:33

E Mosis keghi kpao vbe ehe ne ọba Igipt ye rre, ọ na la ore ẹvbo. Ọ keghi viọ obọ da odukhunmwu ọ na erhunmwu ghe Nọyaẹnmwa, avan ne ukhunmwu kevbe ayan keghi da obọ yi yi, amẹ ne ọ rho kevbe da obọ yi.

Itan 15:29

Emwa esi gha na erhunmwu, e Nọyaẹnmwa ghi gha danmwehọ sokpan, ọ ghi yangbe avbe emwa dan.

Itan 15:8

Emwa esi gha na erhunmwu, ẹko ghi gha rhiẹnrhiẹn e Nọyaẹnmwa, sokpan te emwi izọ ese ne emwa dan viọ gie ẹe sọnnọ ẹn.

Itan 28:9

Adeghẹ wẹ i ya uhi ru emwi te erhunmwu ruẹn ra wa gha sọnnọ Osanobua.

Jerimaia 15:1

Ẹre Nọyaẹnmwa na tama mwẹ wẹẹ, “Ọ gha khọnrẹn ne a miẹn wẹ e Mosis kevbe Samuẹl ọ re ọ mudia vbe emwa na gha rinmwian mwẹ, I i sẹtin tohan emwa na hiehiere. Wẹ ne iran ladian, wẹ ne iran kpao hin odaro mwẹ rre.

Jerimaia 33:3

“Kpe tie mwẹ, I gha khuẹnniẹn. uẹn I gha ta ẹmwẹ ọyunnuan ni mu ohan ne u ma he rẹn emwirhọkpa vbe ekpa ẹre ma ruẹn.

Jerimaia 42:2

iran tama mwẹ wẹẹ, “Lahọ u ghi ru vbene ima tama ruẹn. Na erhunmwu ghe Nọyaẹnmwa Osanobua mwa ne ima. Na erhunmwu ne ima ni miẹn uhunmwu. Ma te ka wa bun yi, u gha miẹn nian wẹ ima ibozẹghẹ ọ re ọ ghi kẹe.

Nọmbas 11:2

Emwa nii keghi viẹ bu e Mosis wẹ ne ọ yi iran obọ, rẹn keghi na erhunmwu ghe Nọyaẹnmwa, ọ re erhẹn nii na dọyọ.

Matiu 21:22

Deghẹ wa yayi, emwi ne uwa rhirhi nọọn, ọ gha sẹ uwa obọ.”

Matiu 3:6

Iran miẹn Orukhọ iran kue. Ọ keghi samẹ ne iran vbe ẹzẹ Jọdan.

Iyẹn ne ọ Maan Ọghe Mak 1:5

Emwa hia keghi ke isoko Judia kevbe ore Jerusalẹm rre dee do danmwehọ Jọn. Iran miẹn orukhọ iran kue, rẹn keghi samẹ ne iran vbe ẹzẹ Jọdan.

Iyẹn ne ọ Maan Ọghe Luk 9:6

Avbe erhuanegbe kegha khian, iran na ya kpe orhu Iyẹn Ne Ọ Maa lele igue hia, iran kevbe gha sinmwi emwa vbe ehe hia.

Iyẹn ne ọ Maan Ọghe Jọn 9:31

Ma rẹnrẹn wẹ Osanobua i zẹ ye ọmwa orukhọ ẹre, sokpan ọ zẹ ye avbe emwa ni daa nẹ re, ni vbe ru emwi ne ọ ho ne iran gha ru.

Iwinna 10:38

Wa vbe rẹn vbekpa ọghe Jesu Kristi ne ovbi e Nazarẹt vbene Osanobua hihiẹ Orhiọn Ne Ọ Huanrẹn kevbe ẹtin yan rẹn hẹẹ. Ọ kegha lele ehe hia khian, ọ na winna iwinna esi, ọ na gha sinmwi emwa hia ne Esu mu gba, rhunmwuda Osanobua yaba ẹre.

Iwinna 19:18

Ni bun vbe uwu emwa ni yayi keghi ladian azagba, iran kegha miẹn emwi ne iran te ru kue, iran keghi vbe gha ta oro ẹre ma emwa.

Iwinna 8:24

Saimọn tama Pita kevbe Jọn wẹẹ, “Lahọ wa rinmwian Nọyaẹnmwa mẹ ne emwi ne uwa tae na rhọkpa ghẹ sunu vbe egbe mwẹ.”

Ebe ne Pọl gbẹẹn gie emwa Rom 3:10

Zẹ vbene Ebe kha re: “Ukpo orhiọnkpa ne ọ la ẹre ekhọe ẹ i rrọọ,

Ebe ne Pọl gbẹẹn gie emwa Rom 5:19

Zẹ vbene iyin ehọ orhiọnkpa ya emwa hia khian emwa orukhọ, erriọ zẹẹ ọre ahọn ẹmwẹ ọghe ọrhiọnkpa gha vbe ya emwa hia khian emwata vbe odaro Osanobua.

Kọlose 1:9

Ọna ọre ọ si ẹe ne a na miẹn wẹ ke ne ima ya họn ẹmwẹ uwa gha dee, ẹghẹ hia ọre ima ya na erhunmwu ne uwa. Ma rinmwian Osanobua ne ọ ya irẹnmwi emwi ne ọ ho vuọn uwa, deba ẹwaẹn kevbe irẹnmwi ne Orhiọn rẹn rhie ne ọmwa.

I Tẹsalonaika 5:17

Wa gha na erhunmwu vbe ẹghẹ hia.

I Tẹsalonaika 5:23

Te Osanobua ne ọ rhie ọfumwegbe ne ima gha wa ye uwa khian ọghọe fo, ne ọ rhie emwi ne uwa khin hia, egbe, ekhọe kevbe orhiọn uwa mwẹ vbe ne a i na mwẹ abe vbe oghẹ urremwẹ Nọyaẹnmwa Jesu Kristi.

I Tẹsalonaika 5:25

Etẹn mwa, wa vbe gha na erhunmwu ne ima.

Hibru 11:4

Iyayi ọre Ebel ya zọ ese ne ọ maa sẹ ọghe Ken ghe Osanobua. Rhunmwuda iyayi ẹre, ọre Osanobua na kae ye ọmwa ẹmwata, rhunmwuda Osanobua tobọ ẹre rhan ohọ miẹn emwi imuohan rẹn.

Hibru 11:7

Iyayi ọre ọ ya Noa họn ẹmwẹ ne Osanobua tama rẹn ye otọ, vbe ekpa emwi ne ọ gha he sunu vbe ẹghẹ ne ọ dee, ne irẹn ma he dẹghe. Rẹn keghi ru vbene Osanobua kha re, ọ keghi kan okọ ne irẹn kevbe ẹgbẹe ọre na miẹn uhunmwu. Odẹ vbe nian, rẹn bu abe gbe agbọn, ọ keghi ya iyayi khian ọmwa. ẹmwata vbe obọ Osanobua.

Hibru 12:13

Wa gha la odẹ ne ọ diae khian, ne owẹ arọe nii ghẹ wa khian ne ẹ i ghi mwẹ vbe ọ gie a ya ru sokpan, ne ọ khian ne a mu ẹre egbe rran.

Hibru 13:18

Wa ye gha na erhunmwu ne ima. Ma rẹnrẹn wẹ ekhọe ima ma bu abe gbe ima, rhunmwuda, ma ho ne ima ru vbene ọ kere ẹghẹ hia.

Jọsua 10:12

Vbe ẹdẹ ne Nọyaẹnmwa rhie ne ivbi Izrẹl ne iran khọnmiotọ, vbe uhunmwu ivbi Amọri, e Jọsua keghi gu e Nọyaẹnmwa guan, ọ keghi sirra ivbi Izrẹl hia tae wẹẹ, “Owẹn, mudia hii yan Gibiọn, uki, mudia vbe odukhunmwu Iya Aijalọn.”

I Pita 2:24

Kristi tobọ ẹre, ọre ọ ye egbe miẹn orukhọ mwa, ọ keghi ye egbe ẹre muẹn gha rrie ugbugbe, ne ima miẹn ehe na wulo hin orukhọ rre, ne a miẹn ehe na gha yin uyinmwẹ ẹmwata. Ẹwẹn ọghọe, ọre a ya mu uwa egbe rran.

I Jọn 3:22

Emwi ne ima a rhirhi nọ vbe obọ ẹre, ghi gha sẹ ima obọ, rhunmwuda, emwi ne ọ tae ọre ima ru, emwi ne ọ rhirhi yẹ ọre ọre ima ru.

I Samuẹl 1:12

E Hanna keghi wa ya ẹghẹ ne ọ taẹn gha na erhunmwu ghe Nọyaẹnmwa. Elai kegha ghe akhuarhamwunu ẹnrẹn.

I Samuẹl 12:17

Uyunmwu ọ re a ye na, ra ẹ i re erriọ? I gha na erhunmwu, e Nọyaẹnmwa ghi gie avan nukhunmwu kevbe amẹ rre. Wa ghẹ ghi miẹn ọẹn, wa ghi do rẹn wẹ, orukhọ nọkhua ọ re uwa ru ghe Nọyaẹnmwa vbe uwa nọ rẹn wẹ ne ọ rhie ọba ne uwa.”

I Samuẹl 12:18

Ẹre Samuẹl na na erhunmwu, vbe ẹdẹ nẹdẹrriọ zẹẹ, e Nọyaẹnmwa keghi gie amẹ kevbe avan nukhunmwu rre.