Hozia 4:19 - Edo Bible (E Baibol Ẹdo) Version 1996

¹⁹ Iran gha kpolo iran gha rrie zẹ vbene ẹhoho ru, ẹmwẹ ese emwa ni ga ẹbọ ne iran zọ ghi do gha mu iran ekhue.

Hozia 4:19 Iomraidhean Croise

Aizaia 1:29

U gha gbe I ma rẹn ye ẹmwẹ avbe erhan kevbe ogba iruẹbọ ne u gha ghoo.

Aizaia 42:17

Iran hia ni mu ẹtin yan avbe amazẹ ni tie avbe amazẹ emwi ne iran gho ekhue gha mu iran, a gha fa iran an.”

Jerimaia 17:13

E Nọyaẹnmwa, wẹ ọrọre idaehọ Izrẹl, ekhue gha mu iran hia ni he uwẹ yotọ a gha ho iran bẹkun zẹvbe eni ne a gbẹnnẹ ye ekhae rhunmwuda, iran hee uwẹ ne Nọyaẹnmwa yotọ nẹ, wẹ ne uhunmwu ẹzẹ amẹ ne ọ furre.

Jerimaia 51:1

E Nọyaẹnmwa khare wẹẹ, “I ra gie ẹhoho omurhia gie Babilọn kevbe emwa ẹnrẹn.

Hozia 10:10

I gha dekun emwa orukhọ na, I gha rri iran oya. Avbe uhunmwu ẹvbo gha ku obọ gbe mu aro da iran, a gha vbe rri iran oya ye orukhọ iran nibun ẹsẹse.

Hozia 10:6

Iran gha mu amazẹ nii gha rrie Asiria zẹ vbe emwi ne a ya yo imuohan gie ọgbaisi nọkhua nii, a gha fa Izrẹl rua, a ghi vbe ya ekhue mu ẹẹn, rhunmwuda ude ne ọ ya gha ru emwi.

Hozia 12:1

“Emwi ne ivbi Izrẹl ru hia fẹẹrẹ, ke owiẹ ya sẹ ota ọfuan kevbe ọrhiae ọ re ehia khin. Uma dan kevbe uyinmwẹ ibalegbe wa dọlegbe gbọ yọ vbe ehe ne iran ye. Iran gu Asiria rhie obọ ye ebe, iran vbe gu Igipt do ẹki.

Hozia 13:15

Ọ gha khọn Izrẹl ne ọ vẹ gba ehe hia zẹ vbe irunmwu. I gha gie ẹhoho ne ọ tọn ne ọ ke odẹ ahọ ke uwu ato rre, ọ ghi do si uhae kevbe ivbi ẹzẹ iran hia ka. Ọ gha viọ emwi ne ọ ghi gia lo hia gha rrie.