Hozia 13:1 - Edo Bible (E Baibol Ẹdo) Version 1996

¹ Vbe ẹghẹ nẹdẹ, ẹwae Ifreim gha guaan, ohan ghi mu ẹwae Izrẹl nekpa hia. Ifreim ọ re iran ghe ẹre aro. Sokpan, emwa ni ru orukhọ vbekpa ne iran na ya gha gho e Bal, te iran ra wulo ye aighẹru ne iran ru na.

Hozia 13:1 Iomraidhean Croise

Gẹnẹsis 2:17

Sokpan ọnii ne ọ rhie ẹwaẹn ne a ya rẹn emwi ne ọ maa kevbe ne ẹ i maa ne ọmwa, ghe rri ọmọ rẹn. U gha rriọe, u gha wu ẹdẹ nẹdẹrriọ zẹẹ.”

I Ọba 12:25

E Jeroboam ne ọba Izrẹl keghi gbe ekẹn ga e Siẹkẹm kevbe ẹvbo Ifreim ne uhunmwu oke, ọ na ya gbe ẹghẹ eso vbe evba. Ọ keghi vbe kpao, ọ na ya gbe ekẹn gaa e Pẹnuẹl.

Job 29:21

I gha bu emwa ude, iran ghi hunwan. Iran ghi kakabọ danmwehọ ẹmwẹ ne I ta;

Job 29:22

iran i vbe miẹn ẹmwẹ rhie ba ẹre vbe I a guan fo nẹ. Ẹmwẹ ghi la ekhọe zẹ vbe ikpamẹ,

Itan 18:12

A i yọghọ ne ọmwa adeghẹ ẹ i mu egbe rriotọ; emwa ni tengbemu, odẹ ọfuan ọre iran gbẹn khian.

Aizaia 66:2

Mẹ ọ re ọ tobọmwẹ yi agbọn na hia. Ẹko avbe emwa ni mu egbe rriotọ ke ni roiro fiwerriẹ wa ma mwẹ iran ni mu ohan mwẹ, ni vbe họn ẹmwẹ mẹ.

Aizaia 7:8

Vbọzẹ? Rhunmwuda, e Siria ma wegbe sẹ e Damaskọs ne igiogbe ọ re, e Damaskọs ma vbe wegbe sẹ e Rezin ne Ọba. Sokpan, zẹ vbe ọghe Izrẹl, vbe ọ te do sẹ ukpo isẹn yan iyeha, iran gha zanzan ẹẹn ruan sẹrriọ wẹ, ẹ i ghi sẹtin guakpao do gha re uhunmwu ẹvbo ẹdẹ.

Hozia 11:2

Sokpan vbene I ya gha tie ẹre, erriọ ọ re ọ ya gha lẹ mẹ. Emwa mwẹ zọ ese ne Baal, iran giẹn eturari ne amazẹ.

Hozia 2:10

I gha sirra avbe ọse ne ọ zẹlẹe bannọ ọẹn ruan, ọmwa ọkpa ne ọ gha sẹtin wọlọ ẹe hin mwẹ obọ rre, ẹ i rrọọ.

Hozia 2:8

Rẹn I ra miẹnkue ighe mẹ ọ re ọ rhie ọka kevbe ayọn kevbe ofigbọn oliv ne ẹẹn, deba esiliva kevbe igoru hia ne ọ ya gho e Baal.

Hozia 8:4

“Avbe emwa mwẹ zẹ ọba, sokpan, ọghe negbe iran ọ re iran ru, iran vbe zẹlẹ avbe ọkaolotu sokpan, ẹ i re ne imẹ kue yi. Iran viọ esiliva kevbe igoru iran, iran keghi mannọ ẹbọ ne iran ra ya fuan ne egbe iran.

Nọmbas 10:22

Iyeke ọnii, iran ni rre ototọ asa ọghe oka ne ẹwae Ifreim re ọkaolotu ẹre, ọ ghi si okhian vbe otuotu, Ẹlisiama ne ovbi Amihud ghi gha khaemwisẹ yan iran.

Nọmbas 13:16

Iran na ọrọre avbe ọrhẹ ne Mosis gie ne ọ ya ghe otọe nii ghe, ọ keghi fi eni Hosia ne ovbi e Nọn werriẹ khian Jọsua.

Iyẹn ne ọ Maan Ọghe Luk 14:11

Rhunmwuda, ọmwa ne ọ tọn egbe mu, a gha mu ẹn rriotọ, ọmwa ne ovbe mu egbe ẹre rriotọ, a gha tọẹn mu.”

Ebe ne Pọl gbẹẹn gie emwa Rom 5:12

Obọ orhiọnkpa kẹkan ọre orukhọ la la agbọn, orukhọ keghi rhie uwu mwẹ obọ gha dee. Emwi ne ọ ghi ke ẹre ikian ọrọre wẹ uwu keghi sẹ egbe emwa ni rre agbọn na hia, rhunmwuda ighẹ ima hia ọre ọ ru orukhọ.

II Kọrinti 5:14

Rhunmwuda, aho ẹmwẹ ọmwa ne Kristi mwẹ ghe mwa, ọre ọ da kha yan mwa, ugbẹn vbe ima ghi do rẹn nẹ nian wẹ, orhiọnkpa wu ne emwa hia, ne ọ rhie maa wẹ, emwa hia mwẹ oghae vbe uwu ẹre.

Jọsua 3:7

Ẹre Nọyaẹnmwa na tama Jọsua wẹẹ, “Emwi ne I ra ru ẹrẹna gha ya ivbi Izrẹl hia ya ọghọ nuẹn zẹ vbe okpọmwa, iran ghi vbe rẹn wẹ I rrọ yaba ruẹ zẹ vbene I vbe gha rrọọ yaba e Mosis.

Giọgis 12:1

A keghi tie ivbi Ifreim ladian, I iran na fian Ẹzẹ Jọdan rra la Zafọn, iran na tama Jẹfta wẹẹ, “Vbe u a na rhie gberra ya khọn ivbi Amọn hẹ yi vbe ne u ma na tie ima? Te ima ra giẹn owa na yan ruẹn uhunmwu!”

Giọgis 8:1

Ivbi Ifreim keghi tama e Gidiọn wẹẹ, “Vbọzẹ ne u ma na tie ima yi vbe u ra khọn ivbi Midian? Vbe u a na ru ima vberriọ hẹẹ?” Iran keghi kakabọ gui yọ ẹsẹse.

I Samuẹl 15:17

E Samuẹl keghi wanniẹn wẹẹ, “A gha rhe miẹn wẹ, wẹ ma ka egbe ruẹ ye emwi rhọkpa, wẹ ọrọre ọkaolotu ẹwae emwa Izrẹl. Nọyaẹnmwa ọ re ọ ya a ma ọba Izrẹl.