Yuda 1:15 - AHYERƐLƐ KRONGRON

¹⁵ kyɛ ɔbaabua ebiala ndɛen, na okobua amumuyɛɛfoɛ amukoraa foɛ wɔ b’amumuyɛɛ yɔleɛ amukoraa nwo, ɔne edwirɛ tɛɛ amukoraa bɔ bɔnefoɛ amumuyɛɛfoɛ bakekã batia ye ɔ nwo.”

Yuda 1:15 Iomraidhean Croise

Edwein 139:20

bɛ bɔ bɛkekã musue dwirɛ betia wɔ, ɔne wɔ pɔfoɛ mɔ bɔ bɛbɔ wɔ dumaa mbaen mbaen ɔ!

Edwein 149:9

ná bafa ndɛenbualɛ bɔ bahyerɛ bato berɛ ne babua bɛ ndɛen. Ɛhe te animnyam ma AWURADE anwoteefoɛ amukoraa. Ɛ́mɔye AWURADE ayɛ!

Edwein 31:18

Ma ngondombofoɛ bɛtɔ mumu, bɛ bɔ bɛfa anwomasoɛ ne dwɛɛ bɛkekã edwirɛ tɛɛ betia teneneefoɛ ne.

Edwein 37:6

Na ɔkɔma wɔ tenenee kɔla ali kyɛ kanea, ná wɔ belilɛ ne wata kyɛ eyiagyina.

Edwein 73:9

Bedwudwo betia nyameɛso, yeɛ bɛ noa tia ebiala wɔ aseɛ ye aso.

Edwein 94:4

Bɛkekã b’anwomasoɛ dwirɛ nemɔ, bɔnefoɛ amukoraa bɛkekã ahandaen dwirɛ.

Edwein 98:9

wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, yeɛ ɔkɔfa ye pɛpɛɛpɛyɛlɛ yeɛ okobua maen maen mɔ ndɛen ɔ.

Ɛksadɔso 16:8

Na Mose sele kyɛ, “Nɔsoa biala, AWURADE kɔma ɛmɔ naen ma ɛmɔkoli, na ngyerɛmɔ koso, ɔkɔma ɛmɔ aleɛ ma ɛmɔ ko koyi; ofikyɛ AWURADE ate kyɛ ɛmɔpenepene bɛ komvi begua ye so. Na yɛ de, yɛ ole nwa? Nna yɛ yeɛ ɛmɔpenepene bɛ komvi begua yɛ so ɔ, na mmom AWURADE.”

Nworɛ Dwirɛhanɛniɛ 11:9

Aberandeɛ, ma wɔ nye gye wɔ wɔ mmerandeɛ nu, nya anigye wɔ wɔ nu wɔ wɔ mmerandeɛ nu. Yɔ bɔ wɔ nye gye ye nwo ɔ ɔne bɔ ɔte wɔ nye so akɔnnɔ ɔ, nakoso nwu ye kyɛ, Nyameɛ kobua wɔ ndɛen wɔ bɔ ɛkɔyɔ amukoraa nwo.

Nworɛ Dwirɛhanɛniɛ 12:14

Ɔnate kyɛ, Nyameɛ kobua yɔleɛ biala nwo ndɛen, bɔ yayɔ ye mvealeɛ nu boka so, kyɛ paa oo, kyɛ tɛɛ oo, okobua ye nwo ndɛen.

Hesekiel 35:13

Ɛmɔfale ɛmɔ noa bɛkekane anwomasoɛ dwirɛ betiale me, ɛmɔkekane edwirɛ pee betiale me, na ndele.

Daniel 11:36

“Ɛhene ne kɔyɔ bɔ okuro ɔ; ɔkɔmoma ye nwo so kɔyɛ ye nwo konguronn kohyire kyɛ ɔtra nyameɛ biala, na ɔkɔhã edwirɛ nwanwa kotia nyameɛ mɔ nu Nyameɛ ne, na okonya ngɔsoɛ koodwu kyɛ ahonehulɛ ne kɔwa nu ɔ, ofikyɛ bɔ bahyehyɛ bato berɛ ne, ɔkɔwa nu.

Daniel 7:20

Yeɛ ye ti so mmɛen buru nemɔ, mmɛen ko ne bɔ ofifili, bɔ bɛ nu nza bo tutuli maa ootuale berɛ, sɔ mmɛen ne bɔ ole anyeɛ ne noa bɔ ɔkekã edwirɛ mbiri mbiri, bɔ ye piri tra mmɛen ngaa nemɔ ne, né mepena kyɛ menwu kyɛbɔ ye bo kyire ɔ.

Yohane 5:27

na wama ye tumi kyɛ obua ndɛen, ɔnate kyɛ ye ole Sona Awa ne.

Asomafoɛ 17:31

ofikyɛ watu kyẽa ko bie wasie berɛ, bɔ ɔkɔfa sona bie bɔ waneanea nu waye ye ɔ so kobua ewiase amukoraa ndɛen tenenee nu ɔ. Na wali ɛhe nwo adanzeɛ wahyire wɔ etingyɛlɛ bɔ otingyele ye fili awufoɛ nu ne, kyɛ mmenia amukoraa bele ye beli.”

Romanfoɛ 14:10

Na wɔ, nzu ati yeɛ ebua eliɛma ndɛen ɔ? Anaakyɛ wɔ koso, nzu ati yeɛ ebu eliɛma animtia ɔ? Ofikyɛ yɛ mukoraa yɛkogyina Nyameɛ ndɛenbualɛ bia ne nyunu.

Romanfoɛ 2:16

Yiti kyɛbɔ me nzɛmba ne okyire ne, sɔ kyẽa ne, Nyameɛ kɔfa Yesu Kristo so kobua sona biala ye mvealeɛ nu dwirɛ nwo ndɛen ɔ.

Romanfoɛ 2:5

Ɛnze kyɛ ɛyɔ asoserɛ na epini w’ahone a, né ɛboaboa Nyameɛ yaa piri paa noa ma wɔ nwo wɔ ɛyaafɛlɛ piri kyẽa bɔ Nyameɛ baabua ye tenenee ndɛen ne ɔ?

1 Korintofoɛ 4:5

Yiti nnɛma ɛmɔbua ndɛen koraka ná mmerɛ ne wadwu, koraka né Awurade awa, na ye yeɛ ɔkɔye mvealeɛ nu dwirɛ bɔ ɔwɔ awosii nu kofite ɔ, ná wasa mmenia ti anu nzusuleɛ wagua dwaaso. Na afei ebiala konya ɛkamvolɛ bɔ ɔfata ye ɔ kofi Nyameɛ berɛ.

1 Korintofoɛ 5:13

Na Nyameɛ yeɛ okobua bɛ bɔ bɛnne ɛmɔ fekue ne anu ndɛen ɔ. Yiti ɛmɔfoa amumuyɛɛniɛ ne béfi ɛmɔ nu.

1 Timoteo 1:9

Yeɛ yɛse kyɛ mmeraa ne ɔnne berɛ mma teneneeniɛ, na mmom ɔwɔ berɛ ma mmeraatolɛfoɛ, asoserɛfoɛ, bɛ bɔ benzuro Nyameɛ, bɔnefoɛ, bɛ bɔ bɛ nwo nde, ɔne bɛ bɔ bɛ nwo agua fiɛ ɔ, bɛ bɔ beku bɛ se ne bɛ ni, awudifoɛ,

Yuda 1:16

Ɛhemɔ te mmenia bɔ bɛ kunu ndwo, somoɛbɔlɛfoɛ, bedi bɛ bɔbɔ b’akɔnnɔ si, bɛfa bɛ noa bɛhoahoa bɛ nwo, na adifuu ti bɛdɛfɛdɛfɛ mmenia.

Nyekyire 13:11

Na nwuni kaka foforɛ bie bɔ ofi aseɛ nu fite wale ɔ; né ole mmɛen nyɔ te kyɛ boaen ba, na odwudwo kyɛ sasrabɔnzam.

Nyekyire 22:20

Bɔ odi edwirɛ hemɔ nwo adanzeɛ ne, ɔnwa, “Amba, méba ndɛndɛ!” Amen. Awurade Yesu, bra!

1 Samuel 2:3

Nnɛma ɛmɔka nduhoɛ dwirɛ mbiri mbiri ko, nnɛmɔma anwomasoɛ dwirɛ fi ɛmɔ noa nu ba; ofikyɛ AWURADE te Nyameɛ bɔ onwu nikyee biala ɔ, na ye yeɛ obua ebiala yɔleɛ nwo ndɛen ɔ.