Yosua 8:1 - AHYERƐLƐ KRONGRON

¹ Afei AWURADE sele Yosua kyɛ, “Nnɛsuro, yeɛ nnɛma wɔ kunu tete wɔ. Fa koɛhonɛfoɛ ne amukoraati boka wɔ nwo so, na fo kɔ Aye. Tie, mafa Aye hene ne ye mmenia, ye kuro ne, ɔne ye aseɛ mawura wɔ sa.

Yosua 8:1 Iomraidhean Croise

Edwein 27:1

AWURADE te me kanea ne me ngoalelɛ, nwa yeɛ mesuro ye ɔ? AWURADE te me ngoa ye anwoserɛ afealeɛ, nwa nwo suronyi yeɛ ɔkɔtɔ me so ɔ?

Edwein 44:3

Nna bɛ bɔbɔ bɛ ngrandɛ yeɛ bɛfa bɛhone belele aseɛ ne ɔ, yeɛ nna bɛ bɔbɔ b’anwoserɛ yeɛ ɔmaa belili ngonim ɔ; na mmom wɔ sa famaa ne, w’anwoserɛ ne, ɔne wɔ nyunu kanea bɔ ɔbokale bɛ ne ɔ, ofikyɛ ekuro bɛ dwirɛ.

Edwein 46:11

Asafo AWURADE gyi yɛ si; Yakob Nyameɛ te y’anwoserɛ afealeɛ. Sela

Yesaya 12:2

Amba, Nyameɛ te me ngoalelɛ, ngɔfa me wora ngowura ye nu, na mengosuro, ofikyɛ AWURADE Nyameɛ te m’anwoserɛ ne me dwein, na wayɛ me ngoalelɛ.”

Yesaya 43:2

Sɛ ɛnate nzue nu a, me ne wɔ yeɛ yɛwɔ berɛ ɔ, sɛ ɛpɛ asue mɔ a, bɛngɔfa wɔ ngɔhɔ; sɛ ɛnate see nu a, ɔngɔyera wɔ, na ye gyelɛ wuronyiwuronyi ne, ɔngɔyera wɔ.

Yeremia 46:27

“Nakoso wɔ, me somvoɛ Yakob, nnɛsuro, wɔ, Yisrael, nnɛma wɔ kunu tete wɔ; ofikyɛ tie, ngɔpepɛ ngole wɔ ngofi dedeede, ɔne wɔ boso ama ngofi aseɛ bɔ bahye bɛ nnure bahɔ so ne aso. Yakob kosa kɔwa kɔɔtena anwotɔ ne asomdwee nu, na ebiala ngonwunanwuna ye.

Yeremia 49:3

“Hesebon, bɔ awuye, ofikyɛ Aye abɔ! Raba mma mmrasua mɔ, ɛ́mɔsu. Ɛ́mɔfa ɛsɛen tena bɛhera, ɛ́mɔbɔ awuye ná ɛmɔli akɔneaba wɔ fasue nemɔ afia! Ofikyɛ bɛkɔhye bɛ hene ne nnure bɛkɔhɔ, bɔ ye asɔfo ne atitire mɔ bɛboka so ɔ.

Daniel 2:21

Ye yeɛ ɔsakyera mmerɛ ne ngyẽa nu ɔ, otu ahemvo mɔ bia so, yeɛ ɔfa ahemvo mɔ sie bia so; ɔma nworɛfoɛ benwu nworɛ, na ɔma bɛ bɔ b’adwene nu pi ɔ benya nimdeɛ;

Daniel 4:25

Bɛkɔfoa wɔ bekofi mmenia nu, na ɛne eburo ngaka yeɛ bɛkɔɔtena ɔ. Bɛkɔmaa ekoli ndire kyɛ nandwie, na nyameɛso bosue kɔloa wɔ. Ɛhe kɔto wɔ afoɛ nzoo, kɔpem kyɛ ekonwu ye kyɛ Anwuro Anwuroniɛ ne yeɛ ole adasa ahennie so tumi ɔ, na ebiala bɔ okuro ne yeɛ ɔfa ma ye ɔ.

Daniel 4:35

na aseɛ sofoɛ amukoraa bɛtte huu wɔ ye nye so, bɔ okuro biala yeɛ ɔyɔ ye wɔ nyameɛso lɔen mɔ nu, ɔne aseɛ sofoɛ mɔ nu ɔ, na ebiala nne berɛ bɔ ɔkɔhora kogyina ye tumi noa, anaa okobisa ye kyɛ, ‘Nzikyɛ yeɛ ɛyɔ e?’

Mateo 8:26

Na osele bɛ kyɛ, “O ɛmɔ gyidie te kãa, nzu ati yeɛ ɛserɛ ahã ɛmɔ sɔa e?” Afei odwɔsole, na ɔteateane mvrama ne ne asorɔkye ne, na bɛyɛle dinn.

Deuteronomi 1:21

Tie, AWURADE wɔ Nyameɛ afa aseɛ ne wama wɔ. Kɔ ná kɔfa tena so, kyɛbɔ AWURADE wɔ nana mɔ Nyameɛ wahyɛ wɔ bɔ ne. Nnɛsuro, yeɛ nnɛma wɔ kunu tete wɔ.

Deuteronomi 31:8

AWURADE yeɛ oli wɔ nyunu ɔ; okoli wɔ si, ongoli wɔ ngasi, yeɛ ɔngɔyakyi wɔ nu. Nnɛsuro, yeɛ nnɛma wɔ kunu tete wɔ.”

Deuteronomi 7:18

Nakoso nnɛsuro bɛ, na mmom kaye bɔ AWURADE wɔ Nyameɛ fa yɔle Faro ne Misraim amukoraati ne,

Deuteronomi 7:21

Nnɛma bɛ nwo suronyi tɔ wɔ so, ofikyɛ AWURADE wɔ Nyameɛ bɔ ogyi wɔ si ne, ɔte Nyameɛ bɔ ɔte piri, bɔ ye nwo yɛ suro ɔ.

Yosua 1:9

Yiti méhyɛ wɔ kyɛ, gyina pindinn ná ma w’ahone yɛ se; nnɛsuro, yeɛ nnɛma wɔ kunu tete wɔ, ofikyɛ AWURADE wɔ Nyameɛ gyi wɔ si wɔ nekaa biala bɔ ɛkɔhɔ ɔ.”

Yosua 10:7

Yiti Yosua ne ye koɛhonɛfoɛ amukoraa, yeɛ afei koɛhonɛfoɛ ahoneserɛfoɛ amukoraa befili Gilgal bɛfo bɛhɔle.

Yosua 10:8

Na AWURADE sele Yosua kyɛ, “Nnɛsuro bɛ, ofikyɛ mafa bɛ mawura wɔ sa; na bɛ nu ko po ngɔhora ngogyina wɔ nyunu.”

Yosua 2:24

Na besele Yosua kyɛ, “Amba, AWURADE afa aseɛ ne amukoraa wawura yɛ sa. Ɔnate yɛ ti ahunundetelɛ atɔ aseɛ ne aso ama mukoraati so dada.”

Yosua 6:2

Na AWURADE sele Yosua kyɛ, “Tie, mafa Yeriko ne ye hene ne ye koɛhonɛfoɛ mɔ mawura wɔ sa.

Yosua 7:9

Kanaanfoɛ ne aseɛ ye asofoɛ mukoraati bɛkɔte sɔ dwirɛ ye, bɛkɔpɛ yɛ nwo bekoyia, na bɛkɔma yɛ boso konua. Nzikyɛ yeɛ ɛkɔyɔ kɔfa wɔ dumaa bɔ odi mu ne anwo ɔ?