Yosua 6:17 - AHYERƐLƐ KRONGRON

¹⁷ Ɔsɛ kyɛ ɛmɔsɛkye kuro ne ɔne nu nningyein amukoraati bɔkɔɔ maa ɔyɛ afɔleɛ ma AWURADE. Sana gyanderaniɛ Rahabo ngome, ɔne mmenia bɔ bɛwɔ ye awuro berɛ amukoraati yeɛ bekonya bɛ ti bekodidi nu ɔ, ofikyɛ ye yeɛ ɔfale ɛbɔfoɛ mɔ bɔ yɛsomane bɛ ne feale ɔ.

Yosua 6:17 Iomraidhean Croise

Gyenesise 12:3

Ngoyira bɛ bɔ beyira wɔ, na ebiala bɔ ɔnoma wɔ ne, me koso ngɔnoma ye; na ɔnate wɔ so yeɛ aseɛ so mmusua amukoraa bekonya saleɛ ɔ.”

Ɛsra 10:8

kyɛ bama bɛ ɛlɛsa, na ebiala bɔ wamma ne, mbɔtam mbanyi ne mbanyi nemɔ bahyɛ mmeraa kyɛ bele ye nwo nningyein amu, ná bɛpɛ ye asue befi mmenia bɔ bafi nnurehyelɛ nu bawa ne anu.

Yesaya 34:6

Mogya ayɛ AWURADE ngrandɛ ne anwo takaa, ɛloe afɔrefɔre ye nwo, mmoaen mmaa mogya ne mbɔngye mogya wayɛ ngrandɛ ne anwo, mmoaen nyii mɔ, bɛ saa nwo loe wayɛ ye nwo, ofikyɛ AWURADE asiesie afɔleɛ wɔ Bosra, ɔne ehunɛ afɔleɛ kandinga wɔ Edom aseɛ so.

Yeremia 46:10

Sɔ kyẽa ne te AWURADE Asafo Nyameɛ ye kyẽa, ɔte wereɛtɔlɛ kyẽa bɔ ɔkɔtɔ ye pɔfoɛ mɔ so wereɛ ɔ. Ngrandɛ ne kohũhũ kɔma ye ko koyi, ná wano bɛ mogya wabo. Ofikyɛ AWURADE Asafo Nyameɛ asiesie afɔleɛ wɔ sorɔ dɔ maen ne anu, wɔ asue Yufreti noa.

Hesekiel 39:17

“Na wɔ, Sona awa, AWURADE Nyameɛ nwa nyoo: Se nnomaa ahoroɔ amukoraa ne eburo ngaka amukoraa kyɛ, ‘Ɛ́mɔhã bɛ nwo bɛbɔ nu bɛbra, ɛ́mɔboaboa ɛmɔ noa béfi nekaa biala bɛbra m’afɔleɛ poentolɛ bɔ meto mema ɛmɔ ne abo. Ɔte Yisrael mmokaa so afɔleɛ poentolɛ kandinga, na ɛmɔkoli naen bɛkɔno mogya.

Lewitikɔso 27:21

Nakoso sɛ Yubilee afoɛ ne so, bɔ odi kyɛ ebiala sa ka ye agyapadeɛ ne a, aseɛ ne kɔyɛ krongron kɔma AWURADE kyɛ aseɛ bɔ batu basie berɛ bama AWURADE ne ala; ɔkɔyɛ ɔsɔfo ne deɛ.

Mika 4:13

Ao Sion awa brasua, dwɔso ná boro, ofikyɛ wɔ mmɛen ne, ngɔyɛ ye buralɛ, yeɛ ngɔyɛ wɔ gya mmaboa ne koso kɔɔbere, na ɛkɔfa kɔsɛkye maen pee pasapasa. Ngotu b’anwonyadeɛ ngosie berɛ ngɔma AWURADE, yeɛ ngotu b’agyapadeɛ ngosie berɛ ngɔma aseɛ amukoraa Mene ne.

Mateo 25:40

Na Ɛhene ne kobua bɛ kyɛ, ‘Amba, mekã mekyire ɛmɔ kyɛ, kyɛ ɛmɔyɔ bɛmane nniɛma hemɔ anu kaaba ko po nen, me yeɛ ɛmɔyɔ bɛmane me ɔ!’

1 Korintofoɛ 16:22

Sɛ ebie nguro Awurade Yesu Kristo dwirɛ a, musue to ye! Y’Awurade bra! (Maranata).

1 Korintofoɛ 2:7

Na mmom mworɛ bɔ yɛbɔ ye nwo dawure ne te Nyameɛ mvealeɛ nu nworɛ, bɔ kyɛbɔ ɔkɔyɛ ná yanya animnyam ti, ɔhyehyɛ tole berɛ koraka yeɛ ɔbɔ wiase ɔ.

Galatiafoɛ 3:10

Na ebiala bɔ mmeraa ne aso lilɛ so yeɛ ɔfa ye nwo to ne, ye yaakɔ! Ofikyɛ bahyerɛ kyɛ, “Ebiala bɔ onni nikyee biala so kyɛbɔ bahyerɛ ye wɔ mmeraa nwomaa ne anu, ná ɔnyɔ ne, ye yaakɔ!.”

Galatiafoɛ 3:12

Na mmeraa ne de, oggyi gyidie so; nakoso ebiala bɔ odi so ne okonya nu ngoa.”

Deuteronomi 20:17

Odi kyɛ enua bɛ boso bɔkɔɔ: Hitifoɛ ne Amorifoɛ, Kanaanfoɛ ne Perisifoɛ, Hiwifoɛ ne Yebusifoɛ, kyɛbɔ AWURADE wɔ Nyameɛ hyɛle wɔ ne;

Hebrifoɛ 11:31

Ɔnate gyidie so yeɛ bangu gyanderaniɛ Rahabo bammoka bɛ bɔ banne banni nemɔ aso ɔ, ofikyɛ olele bɛ bɔ bɛɛsrale maen ne anu besiele ne nyemene so.

Hebrifoɛ 6:10

Ofikyɛ Nyameɛ de, ɔtte asisie bɔ ɔkobu ye nye kogua ɛmɔ mmɔdenbɔlɛ, ɔne ɔdɔ bɔ ɔnate ye dumaa ti ɛmɔaye ye ali bahyire anwoteefoɛ, ná ɛmɔtɛyɔ ɔ.

Yakobo 2:25

Na sɔ ala koso, aso nna nnwumaa so yeɛ begyina bebuale adwamanbɔlɛniɛ Rahabo be ɔ, mmerɛ bɔ olele ɛbɔfoɛ nemɔ, ná ɔmaa bɛfale atee foforɛ so bɛhɔle ne?

Yosua 2:1

Afei Nun awa Yosua somane maentetɛlɛfoɛ nyɔ kudɛɛ fili Sitim, na osele bɛ kyɛ, “Ɛmɔhɔ bɛɛsra aseɛ ne besie, nganga Yeriko.” Yiti besili nu bɛhɔle, na bɛɛlale braa gyanderaniɛ bie bɔ oli Rahabo awuro.

Yosua 2:22

Yisraelfoɛ nyɔ ne sili nu hɔle mmokaa ne anu dɔ, na belili berɛ ɛlɛsa, kɔpem kyɛ mmenia nemɔ sá hɔle ɔ. Né mmenia nemɔ apena bɛ dee wɔ atee ne aso, nakoso bannwu bɛ.

Yosua 7:1

Nakoso AWURADE mmeraa bɔ ɔfa nningyein bɔ watu wasie berɛ kyɛ bɛsɛkye ye ne anwo ne, Yisraelfoɛ buli so. Akan bɔ ɔse ole Karemi, bɔ ɔse ole Sabidi, bɔ ye koso ɔse ole Sera bɔ ofi Yuda abusua kure nu ne, ɔfale nningyein bɔ AWURADE atu asie berɛ kyɛ bɛsɛkye ye ne bie, yiti AWURADE fɛle Yisraelfoɛ so yaa piri paa.

1 Samuel 15:3

Yiti kɔ na kohũ Amalɛkefoɛ, ná sɛkye bɔ bele ye amu bɔkɔɔ. Nnɛma ebiala nya ye ti didi nu, na mmom ku mmienzua ne mmrasua, ngwadaa ne nnɔma, nandwie ne mmoaen, afupɔngɔ ne afunum.’ ”

1 Samuel 15:6

Na Sɔɔlo sele Kenifoɛ kyɛ, “Ɛmɔhɔ! Ɛ́mɔfi Amalɛkefoɛ mɔ nu bɛ́nwati bɛ́hɔ, ná mangu ɛmɔ mamvra bɛ. Ɔnate kyɛ, mmerɛ bɔ né Yisraelfoɛ befi Misraim bɛ́ba ne, ɛmɔyɔle bɛ mukoraa paa.” Yiti Kenifoɛ fili Amalɛkefoɛ nu bɛnwati bɛhɔle.