Yosua 24:19 - AHYERƐLƐ KRONGRON

¹⁹ Nakoso Yosua sele maen ne kyɛ, “Ɛmɔngɔhora ngɔso AWURADE, ofikyɛ ɔte Nyameɛ bɔ ɔte krongron ɔ. Ɔte nungunɛ Nyameɛ; na ɔngɔfa ɛmɔ mmeraatolɛ ne ɛmɔ bɔne ngɔhyɛ ɛmɔ.

Yosua 24:19 Iomraidhean Croise

2 Aberɛso Dwirɛ 36:16

Nakoso bɛhɔle so bɛgorole Nyameɛ ɛbɔfoɛ nemɔ anwo, bamva ye dwirɛ banyɛ huu, na bɛserele ye ngɔmhyɛlɛfoɛ nemɔ alaa kɔpem kyɛ AWURADE ɛyaa piri bɔ wafɛ ye wɔ ye maen so ne, ɔhɔle anwuro maa né bɛyɔ ye nwo hwee a ɔnyɛ yé ɔ.

Edwein 99:3

Odi kyɛ bɛye wɔ dumaa piri ne wɔ dumaa nwanwa ne ayɛ. Ɔte krongron!

Edwein 99:5

Ɛ́mɔkamvo AWURADE yɛ Nyameɛ ne, ɛ́mɔsɔne wɔ ye gya bo ndiasoɛ ne anwo, ofikyɛ ɔte krongron!

Edwein 99:9

Ɛ́mɔkamvo AWURADE yɛ Nyameɛ ne, ná ɛ́mɔsɔne wɔ ye bokaa krongron ne aso, ofikyɛ AWURADE yɛ Nyameɛ ne, ɔte krongron.

Ɛksadɔso 20:5

Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

Ɛksadɔso 23:21

Suro ye ná tie ye dwirɛ. Nnɛtwi fa ye dwirɛ so, na ɔngɔfa ɛmɔ mmeraatolɛ ngɔhyɛ ɛmɔ, ofikyɛ me dumaa la ye so.

Ɛksadɔso 34:14

Nnɛsɔne bosoen biala, ofikyɛ AWURADE bɔ ye dumaa ole Nungunɛ nen, ɔte Nyameɛ bɔ ɔtwe nungunɛ ɔ.

Ɛksadɔso 34:7

bɔ ye dɔ bɔ onni ngasi wɔ berɛ ma mmenia apee apee, bɔ ɔfa amumuyɛɛ ne mmeraatolɛ ne bɔne kyɛ ɔ. Nakoso ɔmma sona bɔ odi fɔ ne ɔmva ye nwo tɔtorɔtɔɔ, na ɔprapra seɛ mɔ bɔne nwo asohwenɛ gua bɛ mma mɔ ne bɛ nnomaa mɔ so, maa okodwu aworɛ ndoatoasoɛ nza ne nna so.”

Yesaya 2:9

Ye sɔ ne ati, adasa mmaa nyunu agua ase, na kuro sona asopa ye nwo. O, nnɛfa bɛ bɔne kyɛ bɛ!

Yesaya 27:11

Sɛ ye mmaen frɔmfrɔm nemɔ bewu a, bebubu begua, na mmrasua basesa bɛfa bɛyɛ eyein. Ofikyɛ bɛte maen bɔ ndeaseɛ abɔ bɛ ɔ; ye sɔ ne ati, bɔ ɔbɔle bɛ ne ngonwu bɛ anwumvoin, bɔ ɔnwone bɛ ne ɔngɔlo bɛ.

Yesaya 30:11

ɛ́mɔmakye béfi atimbire ne aso, ɛ́mɔfi atee ne aso, nnɛmɔmaa yɛte Yisrael Krongronniɛ ne nwo dwirɛ ko.”

Yesaya 30:15

Na AWURADE Nyameɛ, Yisrael Krongronniɛ ne, ɔnwa: “Sɛ ɛmɔsa bɛba me berɛ, ɔne kyɛ ɛmɔde bɛ nwome wɔ me nu a, yeɛ ɛmɔkonya ngoa ɔ; konnyɛlɛ ne anyelasoɛ nu yeɛ ɛmɔ anwoserɛ wɔ ɔ.” Nakoso ɛmɔanguro ye sɔ,

Yesaya 5:16

Nakoso Asafo AWURADE de, bɛma ye so wɔ ye ndɛenbualɛ turoloo nu, na Krongronniɛ Nyameɛ ɔda ye krongronyɛlɛ ali wɔ tenenee nu.

Lewitikɔso 10:3

Na Mose sele Aarɔn kyɛ, “Bɔ AWURADE aha hɔ ɛhe: ‘Ɔnate bɛ bɔ bepingye me ne aso, ngɔmaa bekonwu me kyɛ nde krongron, na bɛkɔhyɛ me animnyam wɔ mmenia ne amukoraati nyunu.’ ” Na Aarɔn yɛle konn.

Lewitikɔso 11:44

Ofikyɛ me ole AWURADE ɛmɔ Nyameɛ; yiti ɛ́mɔte ɛmɔ anwo, ná ɛ́mɔyɛ krongron ofikyɛ nde krongron. Nnɛma ɛmɔfa kaka biala bɔ ɔtwe ye nwo ase begua ɛmɔ nwo fiɛ.

Lewitikɔso 11:45

Ofikyɛ me ole AWURADE bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ; yiti ɛ́mɔyɛ krongron, ofikyɛ nde krongron.”

Lewitikɔso 19:2

“Ka kyire Yisrael maen ne amukoraati kyɛ, Ɛ́mɔyɛ krongron ofikyɛ me AWURADE, ɛmɔ Nyameɛ, nde krongron.

Lewitikɔso 20:26

Ɛ́mɔyɛ krongron bɛ́ma me, ofikyɛ me AWURADE, nde krongron, na maye ɛmɔ masie ahameɛ mafi maen ngaa nemɔ anu mayɛ me deɛ.

Lewitikɔso 20:7

Yiti ɛ́mɔte ɛmɔ nwo, ná ɛ́mɔyɛ krongron, ofikyɛ me ole AWURADE ɛmɔ Nyameɛ.

Nahum 1:2

Nyameɛ ɔtwe nungunɛ, na ɔte AWURADE bɔ ɔtɔ wereɛ ɔ. AWURADE tɔ wereɛ, na ye yaafɛlɛ te piri; AWURADE tɔ bɛ bɔ bekyi ye ɔ so wereɛ, na ye ahonehulɛ wɔ berɛ ma ye pɔfoɛ mɔ.

Habakuku 1:13

Wɔ nye te krongron paa bɔ yiti ɛngora nnea bɔne, ná ɛngora nnea amumuyɛɛ ɔ. Na nzu ati yeɛ ɛnea nnakannakafoɛ, bɔ ahã wɔ noa ato nu, wɔ mmerɛ bɔ bɔnefoɛ oku sona bɔ ɔtengyɛ tra bɔnefoɛ ne ɔ?

Mateo 6:24

“Sona biala ngora nzo meneɛ nyɔ; ofikyɛ ɔba ye sɔ a, ɔkɔpɔ ko, né wahuro ko dwirɛ; anaakyɛ ɔkɔso ko nahorɛ nu, né wabu ko animtia. Ɛmɔngɔhora ngɔso Nyameɛ ne anwonyadeɛ.

Yosua 24:18

Na AWURADE foane maen maen amukoraa, yeɛ Amorifoɛ bɔ né bɛte aseɛ ne aso ne fili yɛ nyunu. Yiti yɛ koso yɛkɔso AWURADE, ofikyɛ ye yeɛ ɔte yɛ Nyameɛ ɔ.”

Yosua 24:23

Na osele kyɛ, “Nzaade ɛ́mɔgyi Amaenmaensofoɛ nyameɛ mɔ bɔ ɛmɔle ye ne begua, ná ɛ́mɔfa ɛmɔ nwo bɛ́ma AWURADE Yisrael Nyameɛ.”

Rutu 1:15

Yeɛ Naomi sele kyɛ, “Nea kyɛ ɛhora Ɔpa wasa ye si wahɔ ye abusua ne ye nyameɛ mɔ dɔ ɔ; di ɛhora ne asi.”

1 Samuel 3:14

Na ɔnate sɔ ati, meta Eli abusua nwo ndaen kyɛ, kaka afɔleɛ anaa aleɛ afɔleɛ biala nne berɛ bɔ ɔkɔhora kɔpata kɔma Eli abusua amumuyɛɛ ɔ le.”

1 Samuel 6:20

Afei Bete Semesefoɛ hane kyɛ, “AWURADE, Krongronniɛ Nyameɛ he, nwa yeɛ ɔkɔhora kogyina ye nyunu ɔ? Nwa berɛ koraa yeɛ yɛye AWURADE alaka ne yɛfi yɛ wa yɛkɔ ɔ?”