Yosua 23:15 - AHYERƐLƐ KRONGRON

¹⁵ Nakoso, nningyein paa bɔ AWURADE ɛmɔ Nyameɛ fa hyɛle ɛmɔ bɔ ne, kyɛbɔ ye mukoraa awa nu ne, sɔ ala yeɛ (sɛ ɛmɔanni nahorɛ a), AWURADE kɔma edwirɛ tɛɛ amukoraa kɔto ɛmɔ ɔ, kɔpem kyɛ okohũhũ ɛmɔ kofi aseɛ paa he bɔ AWURADE ɛmɔ Nyameɛ wafa wama ɛmɔ ne aso ɔ.

Yosua 23:15 Iomraidhean Croise

1 Ahemvo 14:15

“AWURADE kɔwoso Yisrael ahennie, kyɛbɔ nzue woso elemmire ɔ. Aseɛ paa he bɔ ɔfa mane bɛ nana mɔ ne, ɔkɔpɛ bɛ asue kofi so, na ɔkɔbɔ bɛ aya maa bɛkɔhɔ asue Yufreti asi, ofikyɛ bagyinagyina bosoen Asera dosii mɔ bafa bawura AWURADE apue maa wafɛ yaa.

1 Ahemvo 8:56

“Animnyam hã AWURADE bɔ wama ye maen Yisrael banya asomdwee, kyɛbɔ ɔhyɛle bɔ ne ala. Nningyein paa bɔ ɔnate ye somvoɛ Mose so hyɛle ye nwo bɔ ne amukoraa, nu ko po nne berɛ bɔ wamma nu ɔ.

Yesaya 24:6

Ɔnate sɔ ati, musue ahã aseɛ, na so ama benwu amaneɛ. Yiti aseɛ so ama bɛ́yera, na waha mmenia kaaba bie.

Yeremia 32:24

Ao nea, bagyinagyina nyinasoɛ mɔ wɔ kuro ne anwo kyɛ bɛfa betua kuro ne bedi so ngonim, na ɔnate ngrandɛ ne ɛhɔen ne ewue anwonyerɛ ne ati, bafa kuro ne bawura Kaldeafoɛ bɔ bafa koɛ bateta ye ne, bɛ sa. Edwirɛ bɔ ɛhane ne wawa nu, na nea, wɔ bɔbɔ enwu ye.

Yeremia 32:42

“Ofikyɛ AWURADE nwa nyoo: Kyɛbɔ maprapra musue kandinga he amukoraa magua maen he aso ne, sɔ ala yeɛ saleɛ amukoraa bɔ mafa mahyɛ bɛ bɔ ne, ngɔmaa ɔkɔwa bɛ so ɔ.

Yeremia 35:17

Yiti AWURADE, Asafo Nyameɛ, Yisrael Nyameɛ nwa nyoo: Ɛ́mɔtie, musue amukoraa bɔ ngane kyɛ ngɔmaa ɔkɔwa Yuda ne Yerusalemfoɛ amukoraa bɛ so ne, ngɔprapra ngogua bɛ so; ofikyɛ madwudwo mahyire bɛ, nakoso bandie; mafrɛ bɛ, nakoso bandɛ me so.”

Lewitikɔso 26:3

“Sɛ ɛmɔdi m’ahyɛdeɛ so, ɛmɔyɛ me mmeraa dwirɛ nwo sotie, ná ɛmɔfa bɛyɔ adwuma nahorɛ nu a,

1 Tɛsalonikafoɛ 2:16

Na bɛberale yɛ kyɛ nnɛmaa yɛkã edwirɛ ne yɛkyire Amaenmaensofoɛ maa benya daa ngoa. Na ɛhe ma bɛ bɔne kwangoa ne oyi tɛkyɛ daa, ofikyɛ Nyameɛ ahonehulɛ ne wanya wawa bɛ so wayie!

Maenbulɛfoɛ 13:1

Yisraelfoɛ sa yɔle bɔ ɔte bɔne wɔ AWURADE nyunu ɔ, na AWURADE fale bɛ wurale Filistifoɛ sa afoɛ aburanna.

Maenbulɛfoɛ 3:12

Yisraelfoɛ sa yɔle bɔ ɔte bɔne wɔ AWURADE nyunu ɔ. Na AWURADE mane Moabo hene Eglon nyane anwoserɛ oolili Yisrael so ngonim, ofikyɛ Yisraelfoɛ yɔle bɔ ɔte bɔne wɔ AWURADE nyunu ɔ.

Maenbulɛfoɛ 3:8

Yiti AWURADE fɛle Yisrael so yaa. Ɔfale bɛ wurale Mesopotamia hene Kusan Risatim sa, na Yisraelfoɛ sole Kusan Risatim afoɛ mmɔtwɛ.

Maenbulɛfoɛ 6:1

Yisraelfoɛ yɔle bɔ ɔte bɔne wɔ AWURADE nyunu ɔ, na AWURADE fale bɛ wurale Midian sa afoɛ nzoo.