Yosua 22:5 - AHYERƐLƐ KRONGRON

⁵ Ɛ́mɔnea yé ná ɛ́mɔli mmeraa dwirɛ ne mmeraa bɔ AWURADE somvoɛ Mose hyehyɛ mane ɛmɔ ne aso: kyɛ ɛmɔhuro AWURADE ɛmɔ Nyameɛ dwirɛ, kyɛ ɛ́mɔli ye dwirɛ amukoraa so, kyɛ ɛ́mɔli ye mmeraa dwirɛ so, kyɛ ɛ́mɔfa bɛ nwo bɛbɔ ye, ná ɛ́mɔfa ɛmɔ ahone mukoraa ne ɛmɔ kra mukoraa bɛso ye.”

Yosua 22:5 Iomraidhean Croise

Edwein 106:3

Bɛ bɔ bebua ndɛen turoloo ne, ɔne bɛ bɔ bɛyɔ bɔ ɔtengyɛ daa biala ne, benya saleɛ.

Edwein 78:7

amaa ɔnate so bafa bɛ wora bawura Nyameɛ nu, ná bɛ wora amvi Nyameɛ sa noa nnwumaa, na mmom bali ye mmeraa dwirɛ so.

Ɛksadɔso 15:26

Na Mose hane kyɛ, “Sɛ ekotie AWURADE wɔ Nyameɛ dwirɛ, ná ayɔ bɔ ɔsɔ ye nye, ná ali ye mmeraa dwirɛ ne ye ahyɛdeɛ mukoraati so a, ye de anwonyerɛ bɔ nde nguale Misraimfoɛ so ne, mengɔte nu biala ngogua wɔ so; ofikyɛ me ole AWURADE, wɔ safoɛ ne.”

Ɛksadɔso 20:6

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Ɛksadɔso 23:13

Bɔ mahã mahyire ɛmɔ ne amukoraa, ɛ́mɔli so. Nnɛma ɛmɔbɔ nyameɛ foforɛ biala dumaa; yeɛ nnɛmɔma ofite ɛmɔ noa.

Ɛksadɔso 23:25

AWURADE ɛmɔ Nyameɛ yeɛ odi kyɛ ɛmɔsɔne ye ɔ, na ngoyira ɛmɔ aleɛ ne ɛmɔ nzue so, ná maye anwonyerɛ mafi ɛmɔ so.

Anyandera 4:23

Adwene bɔ ɛkɔfa ne, dwene ye nwo yé paa, ofikyɛ nu yeɛ ngoa ofi ba ɔ.

Yesaya 55:2

Nzu ati yeɛ ɛmɔfa sikaa bɛtɔ nikyee bɔ nna aleɛ ahɔ ɔ, ɔne kyɛ ɛmɔsɛkye ɛmɔ anwoserɛ wɔ nikyee bɔ ɔmma ɛmɔ ko nyi nwo ɔ? Ɛ́mɔtie me yé, ná ɛ́mɔli bɔ ɔte paa ɔ, ná ɛ́mɔma ɛmɔ kra nye gye aleɛ sɔkyee nwo.

Yeremia 12:16

Na sɛ bɛkɔyere bɛ nwo bekosua me maen ye atee, ná bɛkɔfa me dumaa bɛkɔta ndaen kyɛ, ‘Kyɛ AWURADE te ase ye’, kyɛbɔ behyirele me maen maa bɛfale Baal bɛtale ndaen ne a, ye de bɛ bo kotimu wɔ me maen ne anu.

Mateo 22:37

Na Yesu buale ye kyɛ, “Fa w’ahone amukoraati, wɔ kra mukoraati, ɔne w’adwene amukoraati kuro AWURADE wɔ Nyameɛ dwirɛ!

Mateo 4:10

Yeɛ Yesu buale ye kyɛ, “Dwɔso berɛ kɔ dɔ, Satan! Ofikyɛ Bahyerɛ kyɛ, ‘Sɔne Awurade wɔ Nyameɛ, na ye ngome twe yeɛ so ye ɔ!’ ”

Mateo 6:24

“Sona biala ngora nzo meneɛ nyɔ; ofikyɛ ɔba ye sɔ a, ɔkɔpɔ ko, né wahuro ko dwirɛ; anaakyɛ ɔkɔso ko nahorɛ nu, né wabu ko animtia. Ɛmɔngɔhora ngɔso Nyameɛ ne anwonyadeɛ.

Luka 1:74

kyɛ ɔkɔmaa bekole yɛ bekofi yɛ pɔfoɛ mɔ sa nu, ná yaso ye bɔ esurolɛ nne nu,

Yohane 12:26

Sɛ ebie so me a, ɔsɛ kyɛ odi me si; na nekaa bɔ nwɔ ne, berɛ yeɛ me somvoɛ koso kɔwa ɔ; na ebiala bɔ ɔso me ne, me Baba kɔhyɛ ye animnyam.”

Yohane 14:15

“Sɛ ɛmɔkuro me dwirɛ a, ɛmɔli m’ahyɛdeɛ so.

Asomafoɛ 11:23

Banaba hɔle oodwuli berɛ na onwuni kyɛbɔ Nyameɛ asi ayira asɔre nen, ye nye gyele, na ɔhyɛle bɛ nguraen kyɛ bɛfa b’ahone mukoraa bɛsɔ gyidie ne anu paa, na beli nahorɛ bɛma Awurade.

Asomafoɛ 27:23

Ɔnate kyɛ, ɛnɛ kɔngɔen ye, Nyameɛ bɔ nde ye deɛ ná meso ye n’abɔfo wale me berɛ,

Romanfoɛ 1:9

Nyameɛ bɔ meso ye sunzum nu, ná mebɔ Ɔwa ne nzɛmba ne dawure ne, odi me adanzeɛ kyɛ nnyakyili ɛmɔ dumaa bɔlɛ le wɔ me mbaeɛbɔlɛ nu.

Romanfoɛ 12:9

Ɛ́mɔma ɛmɔ ɔdɔ ɔyɛ kaenn; ɛ́mɔhyi bɔne, ná ɛ́mɔtira bɔ ɔte paa ɔ nu serɛserɛ.

Romanfoɛ 8:28

Yɛse kyɛ bɛ bɔ bekuro Nyameɛ dwirɛ ne, bɔ okosi biala ɔboka bɛ, bɛ bɔ ɔnate ye nhyehyɛleɛ so wafrɛ bɛ ne.

Deuteronomi 10:20

AWURADE wɔ Nyameɛ yeɛ ɔsɛ kyɛ esuro ye ɔ; ye ngome twe yeɛ sɔne ye ɔ; ye yeɛ fa wɔ nwo bɔ ye ɔ, na ye dumaa yeɛ fa ta ndaen ɔ.

Deuteronomi 11:1

“Yiti ɔsɛ kyɛ ekuro AWURADE wɔ Nyameɛ dwirɛ, ná edi ye dwirɛ, ye ahyɛdeɛ, ye nhyehyɛleɛ ne ye mmeraa dwirɛ so mmerɛ biala.

Deuteronomi 11:13

“Na sɛ ɛmɔtie me mmeraa dwirɛ bɔ méhyɛ méma ɛmɔ ɛnɛ ye, ná ɛmɔkuro AWURADE ɛmɔ Nyameɛ dwirɛ, ná ɛmɔfa ɛmɔ ahone mukoraati ne ɛmɔ kra mukoraati bɛso ye a,

Deuteronomi 11:22

Ofikyɛ mmeraa dwirɛ amukoraati bɔ méhyɛ méma ɛmɔ ye, sɛ ɛmɔdi so yé, ná ɛmɔkuro AWURADE ɛmɔ Nyameɛ dwirɛ, ná ɛmɔnate ye atee amukoraati so, ná ɛmɔfa bɛ nwo bɛbɔ ye a,

Deuteronomi 13:4

AWURADE ɛmɔ Nyameɛ ngome yeɛ ɔsɛ kyɛ ɛmɔdi ye si ná ɛmɔsuro ye ɔ. Ye mmeraa dwirɛ yeɛ ɔsɛ kyɛ ɛmɔdi so ɔ, na ye dwirɛ yeɛ ɔsɛ kyɛ ɛmɔtie ɔ. Ye yeɛ ɔsɛ kyɛ ɛmɔso ye ná ɛmɔfa bɛ nwo bɛbɔ ye ɔ.

Deuteronomi 4:29

Na dɔ yeɛ ɛmɔkɔpena AWURADE ɛmɔ Nyameɛ si atee ɔ. Na sɛ ɛmɔfa ɛmɔ ahone amukoraati ne ɛmɔ kra amukoraati bɛpena ye si atee a, ɛmɔkonwu ye.

Deuteronomi 4:4

Nakoso ɛmɔ bɔ ɛmɔfale bɛ nwo bɛbɔle AWURADE ɛmɔ Nyameɛ ne de, ɛmɔ amukoraa bɛtɛ te ase.

Deuteronomi 4:6

Ɛ́mɔli so ná ɛ́mɔfa bɛyɔ adwuma, ofikyɛ ɛhe kɔma ɛmɔ nworɛ ne ndeaseɛ kɔla ali wɔ maen maen mukoraa nyunu, amaa sɛ bɛte sɔ ahyɛdeɛ ne a, baha kyɛ, ‘Amba, maen titire he anu mmenia se nworɛ na bele ndeaseɛ!’

Deuteronomi 4:9

“Nakoso ɛ́mɔnea yé, ɛ́mɔnea ɛmɔ nwo yé, ná ɛmɔ wora amvi nningyein bɔ ɛmɔ nye anwu ye ne, yeɛ nnɛmɔma ofi ɛmɔ ti anu le wɔ mmerɛ biala bɔ ɛmɔte ngoa nu ɔ. Ɛ́mɔfa béhyirehyire ɛmɔ mma ne ɛmɔ nnomaa;

Deuteronomi 5:10

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Deuteronomi 6:17

AWURADE ɛmɔ Nyameɛ mmeraa dwirɛ, ye dwirɛ ne ye ahyɛdeɛ bɔ wahyɛ wama ɛmɔ ne, ɛ́mɔli so pɛpɛɛpɛ.

Hebrifoɛ 12:15

Ɛ́mɔnea yé na Nyameɛ adom ne ammɔ ɛmɔ, na ɛmɔ nu biala anyɛ ye nwo bakaa ndii weewee, bɔ ɔfa ɛhawo brɛ mmeni pee na ogua bɛ nwo fiɛ ɔ;

Yakobo 1:12

Sona bɔ omia ye nye fa nzɔhwɛ nu ne, onya saleɛ; ofikyɛ sɛ ɔkora gyina nzɔhwɛ ne noa a, okonya ngoa abotire bɔ Awurade afa ahyɛ bɛ bɔ bekuro ye dwirɛ bɔ ne.

Yakobo 2:5

Nniɛma mɔ bɔ ɛmɔla m’ahone nwo ɔ, ɛ́mɔtie! Aso Nyameɛ ɔnneneane nu ɔyyele wiase ahiafoɛ kyɛ bɛyɛ gyidie nu anwonyafoɛ, ná benya agyapadeɛ wɔ ahennie ne anu, ahennie bɔ wafa wahyɛ bɛ bɔ bekuro ye dwirɛ ne bɔ ne?

Yosua 23:8

Na mmom odi kyɛ ɛmɔfa ɛmɔ nwo bɛbɔ AWURADE ɛmɔ Nyameɛ, kyɛbɔ ɛmɔayɔ alaa maa waadwu ɛnɛ ye.

Nyekyire 15:3

Né bɛto Nyameɛ akoaa Mose dwein ne Boaen Ba ne dwein kyɛ, “Tuminiɛ Awurade Nyameɛ, wɔ nnwumaa te mbiri mbri na ɔyɛ nwanwa. Maen maen mɔ Hene, w’atee tengyɛ, na ɔte nahorɛ.

1 Samuel 12:20

Na Samuel sele maen ne kyɛ, “Nnɛma ɛmɔsuro. Ɛmɔayɔ amumuyɛɛ he amukoraa de, nakoso nnɛma ɛmɔyakyi AWURADE si lilɛ, na mmom odi kyɛ ɛmɔfa ɛmɔ ahone amukoraa bɛso AWURADE.

1 Samuel 12:24

Ɛ́mɔnea nningyein mbiri mbiri bɔ wayɔ wama ɛmɔ ɔ. Esurolɛ mmom yeɛ ɔsɛ kyɛ ɛmɔsuro AWURADE, ná ɛmɔfa ɛmɔ ahone amukoraa bɛso ye nahorɛ nu ɔ.

1 Samuel 7:3

Afei Samuel sele Yisrael awuro ama amukoraati kyɛ, “Sɛ ɛmɔ ahone nu paa yeɛ ɛmɔsa bɛba AWURADE berɛ a, nzaade ɔsɛ kyɛ ɛmɔye Amaenmaensofoɛ nyameɛ mɔ ne mmosoen Astarote befi ɛmɔ nu begyi begua. Ɔsɛ kyɛ ɛmɔtu ɛmɔ nwo besie berɛ bɔkɔɔ bɛma AWURADE, ná ɛmɔso ye ngome, na okole ɛmɔ kofi Filistifoɛ sa nu.”