Yosua 11:12 - AHYERƐLƐ KRONGRON

¹² Yosua lili sɔ nguro ne amukoraa ne bɛ hene amukoraa so ngonim, na ɔfale ngrandɛ huhuni bɛ; ohuhuni bɛ bɔkɔɔ kyɛbɔ AWURADE somvoɛ Mose hyɛle ne.

Yosua 11:12 Iomraidhean Croise

Deuteronomi 7:2

ná sɛ AWURADE wɔ Nyameɛ fa bɛ wura wɔ sa, ná edi bɛ so ngonim a, ye de ɔsɛ kyɛ ekuku bɛ bɔkɔɔ. Nnɛne bɛ yɛ apam, yeɛ nnɛnwu bɛ anwumvoin.

Deuteronomi 9:3

Yiti nwu ye ɛnɛ kyẽa ye kyɛ, AWURADE wɔ Nyameɛ yeɛ oli wɔ nyunu ɔkwaapɛ asue ɔ, na ɔte see bɔ ogye wuronyiwuronyi ɔ. Okoli bɛ so ngonim, ná wabrɛ bɛ ase wɔ wɔ nyunu; amaa ɔnate so afoa bɛ afi berɛ, ná ahũhũ bɛ ndɛndɛ so, kyɛbɔ AWURADE ahyɛ wɔ bɔ ne.

Yosua 10:20

Yosua ne Yisraelfoɛ huhuni bɛ pasaa yiele nen, bɛ nu kãa bie yeɛ benyane bɛ ti bedidili nu ɔ, na bɛnwatili bɛhɔle nguro bɔ bato bɛ nwo fasue nemɔ anu bɛɛbɔle bɛ nwo adwaa.

Yosua 10:28

Sɔ kyẽa ne ala, Yosua ho fale Makeda. Ɔfale ngrandɛ huhuni kuro berɛ ama ne berɛ hene; ohuhuni berɛ ama mukoraa bɔkɔɔ. Wanyakyi sona ko po. Na bɔ ɔfa yɔle Yeriko hene ne, sɔ ala yeɛ ɔfa yɔle Makeda hene ɔ.

Yosua 10:30

Na AWURADE fale Libina koso ne ye hene wurale Yisrael sa. Yisrael fale ngrandɛ huhuni kuro berɛ ama mukoraati. Wanyakyi sona ko po wɔ nu. Na bɔ ɔfa yɔle Yeriko hene ne, sɔ ala yeɛ ɔfa yɔle berɛ hene ne ɔ.

Yosua 10:32

AWURADE fale Lakise wurale Yisrael sa. Ye elenyɔ ne aso yeɛ Yisrael lili so ngonim ɔ, na ɔfale ngrandɛ huhuni kuro berɛ ama mukoraati, kyɛbɔ ɔfa yɔle Libina kuro mma ne ala.

Yosua 10:35

Belili so ngonim sɔ kyẽa ne, na bɛfale ngrandɛ behuhuni kuro berɛ ama mukoraati bɔkɔɔ sɔ kyẽa ne, kyɛbɔ ɔfa yɔle Lakisefoɛ ne ala.

Yosua 10:37

Belili so ngonim. Bɛfale ngrandɛ behuhuni nu mmenia ne nu hene, mbɔtam berɛ nguro nemɔ nu mmenia, na behuni nu mmenia amukoraa. Wanyakyi sona ko po; na kyɛbɔ ɔfa yɔle Eglon nen, sɔ ala yeɛ ɔsɛkyele Hebron bɔkɔɔ ɔ, na ohuhuni nu mmenia mukoraati.

Yosua 11:13

Nakoso nguro mɔ bɔ bɛwɔ pambaa mɔ so ne de, Yisraelfoɛ anyera bɛ nu biala, sana Hasɔ ngome yeɛ Yosua yerale ɔ.

Yosua 11:15

Na kyɛbɔ AWURADE hyɛle ye somvoɛ Mose nen, sɔ ala yeɛ Mose hyɛle Yosua ɔ, na sɔ ala yeɛ Yosua koso yɔle ɔ. Nikyee biala bɔ AWURADE hyɛle Mose kyɛ ɔyɔ nen, nu ko po nne berɛ bɔ Yosua anyɔ ɔ.

Yosua 13:6

Na Sidonfoɛ amukoraa bɔ bɛtete mmokaa aseɛ ne aso, fite Lebanon bɔ ɔkwaadwu Misrefote Maim ne, me bɔbɔ yeɛ ngɔfoa bɛ ngofi Yisraelfoɛ nyunu ɔ. Na wɔ de, kyekyɛ aseɛ ne ma Yisraelfoɛ maa ɔyɛ b’agyapadeɛ, kyɛbɔ mahyɛ wɔ kyɛ ɛyɔ ne ala.

Yosua 21:44

AWURADE bɔle bɛ atenaseɛ asomdwee nu wɔ aseɛ ne aso nekaa biala, kyɛbɔ ɔtale ye nwo ndaen hyirele bɛ nana mɔ ne. Bɛ pɔfoɛ amukoraa nu ko po wangora bɛ nyunu gyina, ofikyɛ AWURADE maa belili bɛ mukoraa so ngonim.

Yosua 8:31

kyɛbɔ AWURADE somvoɛ Mose hyehyɛle mane Yisraelfoɛ ne ala, kyɛbɔ bahyerɛ ye wɔ Mose mmeraa nwomaa ne anu kyɛ, “Afɔleɛ bokyea bɔ bafa nyɔboɛ mumua mumua basi ɔ, bɔ nna pɛwaa yeɛ bafa base ɔ.” Bɛbɔle naen yeralɛ afɔleɛ wɔ so bɛmane AWURADE, na bɛbɔle asomdwee afɔleɛ koso.

Yosua 8:8

Na sɛ kuro ne badi ɛmɔ sa nu a, ɔsɛ kyɛ ɛmɔfa see bɛto nu; ɛ́mɔyɔ kyɛbɔ AWURADE ahyɛ ne ala. Ɛ́mɔtie! Bɔ menwa ɛ́mɔyɔ hɔ ɛne.”

Yosua 9:24

Na bebuale Yosua kyɛ, “Ebie ha hyirele wɔ ngoaa mɔ pefee kyɛ, AWURADE wɔ Nyameɛ hyɛle ye somvoɛ Mose kyɛ ɔ́fa aseɛ ne amukoraa ɔ́ma ɛmɔ, ná ohuhu so mmenia amukoraa ofi ɛmɔ nyunu. Na ɔnate ɛmɔ ti, né yɛsuro paa kyɛ yɛ ngoa kofi yɛ sa ɔ; yiti yeɛ ɔmaa yɛyɔle sɔ ne.