Yosua 1:7 - AHYERƐLƐ KRONGRON

⁷ Wɔ de, gyina pindinn ná ma w’ahone yɛ se paa; ná nea kyɛ mmeraa mukoraati bɔ me somvoɛ Mose hyehyɛ mane wɔ ne ekoli so ɔ. Nnɛdi ye nwo makyebu kɔ famaa anaa bɛen, amaa ɔnate so wayie wɔ yé wɔ nekaa biala bɔ ɛkɔhɔ ɔ.

Yosua 1:7 Iomraidhean Croise

1 Ahemvo 2:2

“Wahã kãa né mafi aseɛ ye aso maatoa me mbanyi mɔ. Gyina pindinn, ma wɔ hue yɛ se,

1 Ahemvo 2:3

ná di bɔ AWURADE wɔ Nyameɛ wahyɛ wɔ kyɛ ɛyɔ ne aso. Tie ye dwirɛ, ná di ye ahyɛdeɛ, ye mmeraa dwirɛ, ye nhyehyɛleɛ ne ye noa dwirɛ so, kyɛbɔ bahyerɛ ye wɔ Mose mmeraa ne anu ne, amaa wayie wɔ yé wɔ nikyee biala bɔ ɛkɔyɔ ɔ nu, ɔne nekaa biala bɔ ɛkɔhɔ ɔ.

2 Ahemvo 22:2

Ɔyɔle bɔ ɔtengyɛ wɔ AWURADE nyunu ɔ, na atee bɔ ye Nana Dawide fale so sole Nyameɛ ne, so ala yeɛ ye koso ɔfale ɔ. Wammakye wamva famaa anaa bɛen.

1 Aberɛso Dwirɛ 22:13

AWURADE ahyɛdeɛ ne nhyehyɛleɛ bɔ ɔnate Mose so fa mane Yisrael ne, sɛ ɛnea ná edi so a, okoyie wɔ yé. Gyina pindinn ná ma wɔ hue yɛ se. Nnɛsuro, yeɛ nnɛma wɔ kunu tete wɔ.

2 Aberɛso Dwirɛ 15:7

Nakoso ɛmɔ de, ɛ́mɔgyina pindinn. Nnɛma ɛmɔ abasa nu dwo, ofikyɛ ɛmɔkonya ɛmɔ adwuma nwo akatuaa.”

2 Aberɛso Dwirɛ 26:5

Mmerɛ bɔ Sakaria te ngoa nu ne, Yusia sole Nyameɛ. Sakaria hyirehyirele ye kyɛ odi kyɛ ɔfa Nyameɛ surolɛ ɔbɔ ye bra. Na mmerɛ bɔ ɔsole AWURADE ne amukoraa, Nyameɛ maa oyiele ye yé.

YOB NWOMAA NE 1:8

Yeɛ AWURADE bisale Satan kyɛ, “Aso asusu m’akoaa Yob nwo? Kyɛ sona biala nne berɛ bɔ ɔte kyɛ ye ɔ wɔ aseɛ so; kyɛ ɔte sona bɔ ye bra te sannwuu, ná ɔtengyɛ ɔ; kyɛ osuro Nyameɛ, na ɔtwe ye nwo fi bɔne nwo ɔ?”

Edwein 80:19

Ao AWURADE, Asafo Nyameɛ, maa yɛsa yɛbra wɔ berɛ; te wɔ nyunu kyire yɛ, amaa ɔnate so yanya ngoa.

Anyandera 4:27

Nnɛmakye kɔ famaa anaa bɛen, twe wɔ gya fi bɔne nwo.

Anyandera 8:20

Tenenee atimbire so yeɛ mefa ɔ, mefa ndɛenbualɛ turoloo atee so.

Daniel 10:19

Na osele me kyɛ, “O, wɔ bɔ Nyameɛ kuro wɔ dwirɛ paa ɔ, nnɛsuro, asomdwee hã wɔ, gyina pindinn, ná ma w’ahone yɛ se.” Na odwudwo hyirele me nen, me nwo yɛle me se, na ngane kyɛ, “Me mene, dwudwo, ofikyɛ ama me nwo ayɛ me se.”

Numeri 27:23

Mose fale ye sa guale Yosua so, na ɔfale ye tuale maen ne anoa, kyɛbɔ AWURADE nate Mose so hyɛle ne.

Deuteronomi 11:8

“Yiti mmeraa dwirɛ bɔ méhyɛ méma ɛmɔ ɛnɛ ye, ɛ́mɔli ye mukoraati so, amaa ɔnate so ɛmɔanya anwoserɛ baafa aseɛ bɔ ɛmɔkwaapɛ asue Yɔɔdan bɛfa ne,

Deuteronomi 12:32

“Bɔ méhyehyɛ méma ɛmɔ biala, ɛ́mɔnea yé kyɛ ɛmɔkoli so ɔ. Nnɛfa bie boka so, yeɛ nnɛye bie fi nu.

Deuteronomi 28:14

Yiti, ahyɛdeɛ bɔ méhyɛ méma ɛmɔ ɛnɛ ye, nnɛmakye fi bɛ nu biala nwo kɔ famaa anaa bɛen so kodi nyameɛ foforɛ biemɔ si ɛkɔso bɛ.

Deuteronomi 29:8

Yɛfale b’aseɛ ne, na yɛfa yɛmane Rubenfoɛ, Gadefoɛ ne Manase abusua kure ne bue maa ɔyɛle b’agyapadeɛ.

Deuteronomi 29:9

Yiti ɛ́mɔli apam he anu dwirɛ so nahorɛ nu, amaa ɔnate so bɔ ɛmɔkɔyɔ biala wasi ɛmɔ yé.

Deuteronomi 31:7

Afei Mose frɛle Yosua, na osele ye wɔ Yisraelfoɛ amukoraati bɛ nyunu berɛ kyɛ, “Gyina pindinn, ná ma w’ahone yɛ se, ofikyɛ aseɛ bɔ AWURADE ata ye nwo ndaen wahyire mmenia hemɔ bɛ nana mɔ kyɛ ɔkɔfa kɔma bɛ ne, wɔ yeɛ ɛkɔfa bɛ kɔhɔ so ɔ, na wɔ yeɛ ɛkɔhyɛ kɔma bɛ ɔ.

Deuteronomi 4:2

Mmeraa bɔ méfa méma ɛmɔ ne, nnɛma ɛmɔfa bie bɛboka so, yeɛ nnɛma ɛmɔye bie befi nu, na mmom ɛ́mɔli AWURADE ɛmɔ Nyameɛ mmeraa dwirɛ bɔ méhyehyɛ méma ɛmɔ ne aso.

Deuteronomi 5:32

Yiti bɔ AWURADE ɛmɔ Nyameɛ ahyɛ ɛmɔ kyɛ ɛ́mɔyɔ ne, ɛ́mɔnea kyɛ ɛmɔkoli so ɔ. Nnɛma ɛmɔnea bɛen anaa famaa.

Yosua 1:1

AWURADE somvoɛ Mose wue asi ne, AWURADE ha hyirele Nun awa Yosua, bɔ ɔte Mose bokafoɛ ne kyɛ,

Yosua 1:8

Nnɛyakyi Mmeraa nwomaa he kengalɛ le; na mmom dwene ye nwo alehyeleɛ ne alesaleɛ, amaa ɔnate so ali bɔ bahyerɛ ye nu amukoraati so nahorɛ nu. Na ɛhe yeɛ ɔkɔmaa nningyein kɔhɔ so yé kɔma wɔ, ná wayie wɔ yé ɔ.

Yosua 1:9

Yiti méhyɛ wɔ kyɛ, gyina pindinn ná ma w’ahone yɛ se; nnɛsuro, yeɛ nnɛma wɔ kunu tete wɔ, ofikyɛ AWURADE wɔ Nyameɛ gyi wɔ si wɔ nekaa biala bɔ ɛkɔhɔ ɔ.”

Yosua 11:15

Na kyɛbɔ AWURADE hyɛle ye somvoɛ Mose nen, sɔ ala yeɛ Mose hyɛle Yosua ɔ, na sɔ ala yeɛ Yosua koso yɔle ɔ. Nikyee biala bɔ AWURADE hyɛle Mose kyɛ ɔyɔ nen, nu ko po nne berɛ bɔ Yosua anyɔ ɔ.

Yosua 23:6

Yiti ɛ́mɔmia ɛmɔ nye, ná ɛ́mɔnea kyɛ nikyee biala bɔ bahyerɛ ye Mose mmeraa nwomaa ne anu ne, ɛmɔkoli so ná ɛmɔkɔyɔ ɔ. Nnɛma ɛmɔdi ye nwo makyebu bɛkɔ famaa so anaa bɛen so;